Ex 23:8 - Kaqchiquel Bible

⁸ Man jun bey tik'ul méro toq ri winaqi' nikajo' yixkipuaqij, roma re' xa xtuben chiwe chi man yixtzu'un ta chik rik'in ruchojmilal y nuxotoba' rubanik ri iq'atbel-tzij ri kan ix choj.

Ex 23:8 ပူးပေါင်းရင်းမြစ်များ

Wuj Richin Bix Chire ri Dios 15:5

ri man nuk'utuj ta ral ri méro toq nuya' pa qajik, ri man niqa' ta chuwech nipuaqix richin nich'on itzel chirij jun ri xa maneq rumak. Ri kere' ruk'aslen man jun bey k'a xtibe pa xulan.

Wuj Richin Bix Chire ri Dios 26:10

roma kik'in rije' k'o ch'obonik ri man utz ta, y kan yepuaqix kan.

Wuj Richin Etamabel-Tzij 15:27

Kan nuk'en-wi-pe ruk'ayewal pa jay, toq jun wineq man utz ta ri akuchi nipe-wi ri ruch'akoj; jak'a ri wineq ri kan man nrajo' ta chi nipuaqix, kan kikoten xtik'ase'.

Wuj Richin Etamabel-Tzij 17:23

Ri itzel q'atoy-tzij, kan yeruk'ul kan ri sipanik ri nikiya' kan ri winaqi' pa ruq'a'; y xa roma ri' toq rija' nujel rubanik ri ruq'atbal-tzij.

Wuj Richin Etamabel-Tzij 17:8

Ek'o winaqi' nikinimaj chi ri yepuaqin kan achi'el jun ti abej ri tzeqel chikiqul richin yeruto' chupan ri kik'aslen; y nikich'ob chi xabakuchi yebe-wi kan yeruto' richin nikiben ri achike nikajo'.

Wuj Richin Etamabel-Tzij 19:4

Ri beyomel kan yeroyola' k'a janila chi winaqi', richin yerachibilaj; jak'a ri wineq ri xa man jun ok k'o rik'in, xa man jun najowan nachibilan.

Wuj Richin ri Molojri'il 7:7

Kan qitzij wi chi toq niq'at rusamaj jun aj-na'oj nisach ruk'u'x, y toq nipuaqix niyojtej rubanik ri ránima.

Wuj Richin ri Isaías 1:13

Man tik'en-pe sipanik chuwe ri xa man jun rejqalen. Ri pom kan man niqa' ta chik chinuwech, chuqa' toq ninimaq'ijuj ri k'ak'a' ik', ri q'ij richin uxlanen, y ri q'ij richin molojri'il. Kan man ninkoch' ta chik ri itzel taq ibanobal toq nimol-iwi' richin yixnimaq'ijun.

Wuj Richin ri Isaías 1:23

Ri e aj-raqen ri ek'o pan iwi' kan man e nimey ta tzij, y kan xe'ok kachibil ri eleq'oma'. Chikijujunal niqa' chikiwech chi yepuaqix, y xaxe sipanik nikajo' nikik'ul. Man nikiben ta pa ruchojmilal kik'in ri meba'i', ni man yekito' ta ri malkani' toq ek'o chuwech ri q'atbel-tzij.

Wuj Richin ri Isaías 33:15

¿Achike kami wineq ri nibiyin pa ruchojmilal? Ri nibin ri qitzij; ri man nibeyomer ta rik'in ri man ruch'akon ta; ri man nuya' ta q'ij chi nipuaqix; ri man nrajo' ta nrak'axaj toq niban ch'owen chirij jun kamik; y ri man nuch'ob ta nuben ri itzel taq banobel.

Wuj Richin ri Isaías 5:22

Toq'ex iwech rix ri kan inimirisan-iwi' niqum vino, y kan ix nima'q nina-iwi' toq nixolola-qa ri ya' ri yeq'abarisan.

Wuj Richin ri Isaías 5:23

Rix chuqa' yixpuaqix xaxe richin chi nibij chi ri wineq man jun rumak. Jak'a rik'in ri wineq ri choj ruk'aslen, kan man niben ta ri k'atzinel.

Ez 22:12

Chuqa' jujun chiwe rix yixtoj richin niben jun kamik. Niya' méro pa qajik chike ri iwinaq y kan nik'utuj ral. Y jujun chiwe rix janila k'iy ral ri méro nik'utuj chike ri man e iwinaq ta. Janila k'iy nik'utuj chike ri iwachpochel toq rije' ek'o pa ruk'ayewal. Y pa ruwi' ronojel re' kan xinimestaj kan yin Jehová ri ink'o pa ruwi' ronojel.

Os 4:18

Ri vino ri nikiqum xa kan xeruq'abarisaj, kan janila k'a chi mak yekiben. Ri e tata'al kan ruyon chik k'a ruk'ixbilal ri yekibanala'.

Am 5:12

Roma yin wetaman jebel ri itzel taq ibanobal kan xik'o yan ruwi'. Ri imak kan janila e nima'q. Ye'itz'ila' ri choj kik'aslen y yixpuaqix. Y rix man niya' ta q'ij chike ri winaqi' ri man jun k'o kik'in richin yech'on kik'in ri to'onela'.

Wuj Richin ri Miqueas 7:3

Konojel ri winaqi' kan e nowineq k'a chubanik etzelal. Ri e tata'al man jun nikiben wi maneq naya' chike. Ri to'onela' xa nikik'ayij-ki'. Ri winaqi' ri k'o kuchuq'a' xa nikiben ri nikajo' rije'. Y konojel xa kiya'on chikiwech.

Deut 10:17

Roma ri Jehová ri qa-Dios kan ja rija' ri Dios pa kiwi' konojel ri dios ri ek'o, y kan ja rija' ri Ajaw pa kiwi' konojel ajaw ri ek'o. Rija' kan Dios nim rejqalen ri k'o ronojel uchuq'a' pa ruq'a' y kan ruk'amon yojbaybot chuwech. Rija' man nuben ta rukojol kik'in ri winaqi', ni man yojtikir ta niqapuaqij.

Deut 16:19

Kan tibana' ronojel pa ruchojmilal. Man tiben chi niya' chire jun ri xa man ruk'amon ta richin nuk'ul, y man tiben chi man niya' ta chire jun ri ruk'amon richin nuk'ul. Man tirayij chi yixpuaqix. Roma wi keri' niben xa nuben chiwe richin nutz'apej runaq'-iwech richin niben pa ruchojmilal y ri iq'atbel-tzij xa nuben chi ja ri e choj yeqaqa kan chuxe'.

1 Sam 12:3

Wakami k'a jare' ink'o chiwech. Tiq'alajirisaj ronojel chuwij chuwech ri Jehová y chuwech ri rey. Wi jun chiwe rix ri weleq'an ri rubóyix o ri rubur, tubij. O wi k'o jun nutz'ukun-tzij chirij o nuyoq'on ta, o wi k'o jun ri in rupuaqin, tibij-pe; y xtintzolij chire, xcha' ri Samuel chike.

1 Sam 8:3

Jak'a rije' man xkiben ta achi'el xuben ri kitata'. Rije' xa ja ri méro ri xkirayij ruwech y xekik'ul ri sipanik ri man ruk'amon ta richin nikik'ul y keri' xkiq'ej ri ruchojmilal ri k'aslen.