Deut 32:4 - Kaqchiquel Bible

⁴ Ri Jehová achi'el jun nimalej abej ri akuchi niqato-wi-qi', y chuqa' ri rusamaj kan tz'aqet rubanik, roma ronojel ri rubey kan e choj-wi. Kan nuben ri nubij y kan man jun q'oloj rik'in. Rija' kan choj k'a nuben rik'in ronojel, y man jun ri man ta pa ruchojmilal ri nuben.

Deut 32:4 ပူးပေါင်းရင်းမြစ်များ

Wuj Richin ri Rutikeribel 1:31

Y jare' k'a ri rusamaj ri xuben ri Dios y xutz'et chi ronojel ri xuben kan janila wi utz. Y rik'in ri' xtz'aqet ri chaq'a' y ri paq'ij richin ri ruwaq q'ij.

Wuj Richin ri Rutikeribel 18:25

Rat kan at choj-wi y man naben ta keri', chi xtak'is ta ruk'aslen ri utz rubanobal kik'in ri itzel taq kibanobal. Chi junan ta naben chike. Y roma rat kan at choj-wi, kan tabana' k'a ri ruk'amon, xcha' ri Abraham chire ri Dios.

2 Sam 22:47

Nimalej ruq'ij ri Jehová roma ja rija' ri tobel wichin yin. Xtinnimirisaj k'a ri nu-Dios, ri xya'on ri nukolotajik.

2 Sam 23:3

Ri qa-Dios roj israelita xch'on. Ja ri to'onel qichin ri xbin re ch'abel re' chuwe: Toq jun niq'aton-tzij pa ruchojmilal, kan achi'el ri saqil ri nel-pe nimaq'a' yan ri man jun sutz' k'o chuwech. Toq jun q'atoy-tzij kan k'o rukiy ri Dios chuwech, kan achi'el ri job ri nibanon chi nibek'ulun-pe ri q'ayis pan ulew.

2 Crón 19:7

Tik'oje' rukiy ri Jehová ri qa-Dios chiwech y titz'eta' jebel ri ye'iben, roma rija' man utz ta nutz'et ri man pa ruchojmilal ta ye'iben, chuqa' chi man junan ta niben kik'in ri winaqi' y toq yepuaqix ri q'atoy taq tzij.

Wuj Richin ri Nehemías 9:8

Y xatz'et k'a, chi rija' kan xukuquba' ruk'u'x awik'in. Chuqa' kan xajikiba-atzij chire chi naya' chike ri rijatzul rija', ri ruwach'ulew kichin ri cananeo, ri hitita, ri amorreo, ri ferezeo, ri jebuseo y ri gergeseo. Y kan keri' k'a xaben roma rat kan naben ri nabij.

Wuj Richin ri Achin Job 34:10

Roma ri' rix nowineq taq achi'a', kan kiniwak'axaj k'a: Ri Dios kan man jun bey k'a xtuben ta jun itzel banobel; ri Dios ri k'o ronojel uchuq'a' pa ruq'a' man jun bey xtuben ta jun banobel ri man pa ruchojmilal ta.

Wuj Richin ri Achin Job 35:14

Stape' rat man natzu' ta ruwech ri Dios, rija' kan yarak'axaj-pe. Ri ach'ojinik kan k'o chik k'a q'anej rik'in rija'; roma ri' rat xaxe k'a tawoyobej ri achike xtuben awik'in.

Wuj Richin ri Achin Job 36:23

Kan man jun wi k'a ri nitikir ta nik'utu chuwech ri Dios ri achike ruk'amon chi nuben; chuqa' kan man jun ri nitikir ta nibin chire: Re' xa man ja' ta rubanik xaben chire.

Wuj Richin ri Achin Job 8:3

¿Nuben kami ri Dios chi nuxotoba' rubanik ri ruq'atoj-tzij? ¿Nuben kami rija', ri k'o ronojel uchuq'a' pa ruq'a', chi nuxotoba' rubanik ri chojmilal?

Wuj Richin Bix Chire ri Dios 100:5

Roma ri Jehová kan janila utz. Ri rajowabal man k'isel ta, y man jun bey yojrumalij kan roj ri oj ruwinaq.

Wuj Richin Bix Chire ri Dios 138:8

Rat Jehová, kan xtaben k'a chupan ri nuk'aslen ri nawajo' rat. Ri ajoyowanik rat Jehová kan richin k'a jantape'. Roma ri' tabana' utzil man ta malij kan ri ja rat at banayon.

Wuj Richin Bix Chire ri Dios 145:17

Rat Jehová kan choj k'a naben rik'in ronojel. Kan janila k'a awutzil pa ruwi' ronojel ri abanon.

Wuj Richin Bix Chire ri Dios 146:6

Roma ja rija' xbanon ri kaj y ri ruwach'ulew, xuben chuqa' ri palou y ronojel ri ek'o chupan; ri kan jantape' nuben ri nubij.

Wuj Richin Bix Chire ri Dios 18:2

Jehová, rat kan at achi'el k'a jun abej ri ninwewaj-wi' chirij, achi'el jun jay ri akuchi utz ninto-wi-wi'. rat kan yinakol-wi. Kan xtinkuquba' k'a nuk'u'x awik'in. ja rat ri at nutobal yin. rat yinakol chikiwech ri e etzelanel wichin y ja rat yato'on wichin chuwech ronojel.

Wuj Richin Bix Chire ri Dios 18:46

Nimalej ruq'ij ri Jehová roma ja rija' ri tobel wichin yin. Xtinnimirisaj k'a ri nu-Dios, ri xya'on ri nukolotajik.

Wuj Richin Bix Chire ri Dios 19:7

Ri rupixa' ri Jehová kan tz'aqet y kan nuya' k'ak'a' qak'aslen; ri ruchojmilal ri xuya' ri Jehová, kan richin q'asen y nuben chire ri maneq retamabal chi nok aj-na'oj.

Wuj Richin Bix Chire ri Dios 31:5

Pan aq'a' k'a rat ninjech-wi' richin yinachajij. Kinakolo' k'a roma rat at jun Dios ri man yinamalij ta kan.

Wuj Richin Bix Chire ri Dios 33:4

Roma ri ruch'abel ri Jehová kan choj-wi. Ronojel ri rusamaj, kan nuk'ut chiqawech, chi rija' kan nuben-wi ri nubij.

Wuj Richin Bix Chire ri Dios 78:35

K'ari' noqaqa chikik'u'x chi ja ri Dios ri kitobal, chuqa' noqaqa chikik'u'x chi ja ri nimalej Dios koloyon kichin.

Wuj Richin Bix Chire ri Dios 9:16

Ri Jehová kan xuk'ut k'a ri' chi rija' pa ruchojmilal niq'aton-wi-tzij; jak'a ri e banoy taq etzelal xa xetzaq chupan ri pikbel ri kibanon rije'.

Wuj Richin Bix Chire ri Dios 90:16

Xtiq'alajin ta chik pe ri meyel taq abanobal qik'in roj ri oj asamajela'. Ri ak'ojlemal rat kan ta xtiq'alajin-pe pa kiwi' ri qijatzul.

Wuj Richin Bix Chire ri Dios 92:15

Y keri' nitalutej ri utzilej rutzijol, chi ri Jehová ri nutobal kan choj-wi, y chi rik'in rija' kan xaxe ri ruchojmilal k'o.

Wuj Richin Bix Chire ri Dios 97:2

Ri sutz' y ri q'equ'm kan kisutin k'a rij rija'. Ri q'atoj-tzij y ri ruchojmilal kan jari' ri ruxe' ri rajawaren.

Wuj Richin Bix Chire ri Dios 98:3

Xuben k'a ri rubin chike ri e rijatzul kan ri Israel. Roma ri rajowabal ri man k'isel ta, man yerumalij ta kan. Konojel k'a winaqi' ri ek'o k'a pa taq ruk'isibel chire ri ruwach'ulew xkitz'et ri rukolotajik.

Wuj Richin Bix Chire ri Dios 99:4

Ri rey kan niqa' chuwech ri ruchojmilal. Kan ja rija' ri yoyon re ruchojmilal re' pan Israel. Kan xuben k'a ri ruchojmilal y ri q'atoj-tzij pa kiwi' ri winaqi' israelita.

Ex 34:6

Y jari' toq ri Jehová xq'ax k'a el chuwech ri Moisés y xubij: ¡Ja yin Jehová! ¡Jehová jari' ri nubi'! Ri kan in joyowanel y koch'onel y man chi'anin ta k'a nipe woyowal y kan janila nim ri nujoyowanik y kan ninben ri ninbij.

Wuj Richin ri Molojri'il 3:14

Y chuqa' wetaman chi ronojel ri rubanon ri Dios kan man richin ta jun ka'i-oxi' q'ij. Roma ri' kan man jun k'a nitikir niya'on ruwi' ni man jun chuqa' nelesan ta juba' chire ri rubanik, y kere' xuben chire richin chi ri achin tik'oje' rukiy ri Dios chuwech.

Wuj Richin ri Isaías 17:10

Kan xinimestaj yin ri xikolon iwichin, y kan man xoqaqa ta chi'ik'u'x chi ja yin ri itobal. Jak'a pa ruk'exel, rix nitik k'a ruwech ri qejoj ri kan jebel niwachin, richin niya' kiq'ij ri ch'aqa' chik dios.

Wuj Richin ri Isaías 25:1

Ja rat Jehová, ja rat ri at qa-Dios, xtiqanimirisaj y xtiqabixaj ri abi'. Ri ojer kan rat xach'ob xe'aben meyel taq banobel, y wakami kan xaben ri xabij. Kan xaben ri xasuj.

Wuj Richin ri Isaías 26:4

Kan tiqakuquba' qak'u'x rik'in ri Jehová tibe-q'ij tibe-seq, roma rik'in ri Jehová ri qajaw k'o-wi ri uchuq'a' richin q'asen.

Wuj Richin ri Isaías 28:16

Roma ri' ri Jehová nubij: Kan xtinya' chiri' pa Sión jun abej ri cha'on y janila rejqalen. Ja abej ri' ri xtok k'atzinel chire ri ruxe' ri jay. y xtitike' kan jebel. Y xabachike k'a ri rukuquban ruk'u'x rik'in, kan man jun xtiberuk'uluwachij.

Wuj Richin ri Isaías 30:18

Jak'a ri Jehová kan nrajo' nujoyowaj iwech; rija' kan janila nrajo' nuk'ut ri rajowabal chiwech, roma rija' kan jun Dios richin chojmilal. Jebel ruwa-kiq'ij ri kikuquban kik'u'x rik'in ri Jehová.

Wuj Richin ri Isaías 32:2

Chikijujunal rije' xke'ok achi'el tobel chuwech jun kaq'iq', y xke'ok achi'el jun jay, ri kan xtikito-ki' chupan chuwech jun q'eqel-job. Rije' kan xtikiben chike ri winaqi' richin xkech'uch'u', achi'el nuben jun ti raqen-ya' ri nibiyin chupan ri tz'iran ruwach'ulew, y achi'el rumujal jun nimalej abej chupan ri tz'iran ruwach'ulew.

Wuj Richin ri Jeremías 10:10

Jak'a rat Jehová kan at qitzij Dios. Ja rat ri at k'aslik Dios, rey richin q'asen. Toq nipe awoyowal, ri ruwach'ulew kan nisilon y ri tzobaj taq winaqi' man yetikir ta nikikoch' ri awoyowal.

Wuj Richin ri Jeremías 9:24

Jak'a wi k'o ta jun ri nuna' ri' chi runimirisan-ri', kan tunimirisaj k'a ri' roma retaman chi ja yin Jehová y kan ronojel ninben rik'in ajowabel, ruchojmilal y joyowanik, roma kan jari' ri niqa' chinuwech. Yin Jehová ri yibin.

Dn 4:34

Jak'a toq xtz'aqet ri juna' ri janipe' xq'at pa nuwi', jari' toq yin Nabucodonosor xtzolej-pe nuk'u'x, y kan jari' xich'obon chik achi'el yech'obon ri winaqi'; y jari' k'a toq yin xinnimirisaj ruq'ij ri nimalej Dios. Xinya' ruq'ij ri kan jantape' k'es y kere' k'a ri xinbij: Ri ruchuq'a' ri aq'atbel-tzij rat nimalej Dios, kan richin q'asen, ri awajawaren kan xtik'oje' k'a pa kiwi' ri chi wiq chi tanaj winaqi'.

Dn 4:37

Wakami k'a, yin Nabucodonosor, kan ninya' k'a ruq'ij y ninnimirisaj ri Dios ri niq'aton-tzij chila' chikaj, roma ronojel ri nuben rija' kan jari' ri qitzij, y kan pa ruchojmilal-wi. Rija' kan nuqasaj k'a kiq'ij ri janila kinimirisan-ki' chuwech rija', xcha' ri Nabucodonosor.

Wuj Richin ri Habacuc 1:12

Chirij re' yin xich'on chik rik'in ri Dios y xinbij: Jehová, rat ri at Dios ri atk'o-pe pa rutikeribel. Nimalej Jehová ja rat ri at Loq'olej nu-Dios yin, y at richin tibe-q'ij tibe-seq. Ja rat Jehová xayako-pe kichin re winaqi' re' chiqij, richin xtikiya' ri rutojbalil-mak pa qawi'. Ja rat nimalej to'onel xabanon kichin re winaqi' re', richin xtikiya' ri tijoj-poqonal pa qawi'.

Wuj Richin ri Habacuc 1:13

Rat Jehová kan at ch'ajch'oj y man nakoch' ta natz'et ri mak. Chuqa' man nakoch' ta natz'et ri etzelal ri yebanatej. ¿Achike k'a roma xtaya' q'ij chike ri aj-Babilonia richin xtikiben ri etzelal? ¿Achike k'a roma kan man jun xtabij, toq rije' xqojkiya' pa tijoj-poqonal, stape' roj más choj qak'aslen chikiwech rije'?

Wuj Richin ri Sofonías 3:5

Jak'a ri Jehová kan k'o chiri' pa tinamit, y kan man jun itzel nuben. Rija' kan ronojel nimaq'a' nuq'et-tzij pa ruchojmilal, y kan man jun ri man ta nuben. Man rik'in ri' ri nibanon etzelal xa kan maneq ruk'ix.

San Mateo 5:48

Rix kan kixok k'a tz'aqet rik'in ri ibanobal achi'el ri aj-chikajil qatata' ri kan tz'aqet rik'in ri rubanobal.

San Juan 1:14

Ri ch'abel ri' xoqaqa k'a chuwech re ruwach'ulew y kan xok k'a chuqa' jun wineq. Y kan xqatz'et k'a chi ja rija' ri juney ruk'ajol ri Dios, y kan k'o ruq'ij-ruk'ojlen ri Dios rik'in. Chuqa' kan nojineq k'a rik'in ri qitzij y ri utzil.

San Juan 1:17

Ri pixa' xya'ox roma ri Moisés, jak'a ri utzil ri' y ri qitzij, xya'ox roma ri Jesús ri Cristo ri nibix chuqa' ch'abel chire.

San Juan 14:6

Y ri Jesús xubij: Ja yin ri bey, yin ri qitzij y ja yin chuqa' ri k'aslen. Xaxe k'a ri xtiniman wichin xtapon rik'in ri nata'.

San Juan 5:22

Man xaxe ta ri', ri nata' Dios kan pa nuq'a' k'a chuqa' yin ri ruk'ajol rujachon-wi ri q'atoj-tzij, y man ja ta k'a rija' ri xtibanon.

Romanos 1:32

Rije' stape' ketaman chi ri Dios rubin chi ri yebanon etzelal ke taq ri', k'o chi niqa' ri kamik pa kiwi'. Man rik'in ri' k'a nikiben na ronojel etzelal, y chuqa' yekikot toq k'o ch'aqa' chik ri keri' nikiben.

Romanos 2:2

Kan qetaman k'a chi ri Dios kan pa ruchojmilal nuben toq nuq'et-tzij pa kiwi' ri winaqi' ri nikiben ri etzelal ri'.

Romanos 2:5

Xa kowirineq ri iwánima, y man niwajo' ta niya' kan ri mak. Y rik'in ri', xa nimol ruk'ayewal chiwij. Kan xtiqaqa k'a ri royowal ri Dios pan iwi' chupan ri q'ij toq rija' xtuq'et-tzij.

Romanos 3:5

Wi ri qamak nik'atzin richin chi ri ruq'atoj-tzij ri Dios niq'alajin jebel, ¿itzel kami nuben ri Dios chi nuya' ruk'ayewal pa qawi'? Jujun xtikibij chi ja'.

1 Corintios 10:4

chuqa' xkiqum ri ya' ri xuya-pe ri Dios chike. Ri ya' ri' xel-pe pa jun nimalej abej ri kan kachibilan. Y ri abej ri', nuk'exewachuj ri Cristo.

Deut 10:18

Rija' kan yeruto' k'a ri meba'i' y ri malkani', y chuqa' kan yerajo' ri man e aj pa qatinamit ta, y roma ri' kan nuya' kiway y kitziaq.

Deut 32:15

Jak'a rix aj-Jesurún,*f5* toq jebel xixtzuq yan, xa xixyakatej chirij ri xilin iwichin. Rix xixok k'a achi'el jun chikop ri liq'-liq' rij, kan jebel k'a xixti'ojir. Jari' toq kan xipiskolij-el-iwi', jari' toq xixbe nej chire ri Dios ri xbanon iwichin. Xa xiwetzelaj kan ri Dios, ri nimalej abej, ri akuchi xiwil to'onik.

Deut 32:18

Rix winaqi' israelita xa xiya' kan ri nimalej abej ri akuchi xiwil-wi to'onik, y ja nimalej abej ri', ri xixkolon. Rix xa ximestaj kan ri Jehová ri xya'on ik'aslen.

Deut 7:9

Kan tiwetamaj k'a chi ri Jehová ri qa-Dios jari' ri qitzij Dios y kan nuben ri nubij achi'el ri rutzij ri rujikiban, y kan nujoyowaj iwech ri yixajowan richin y nitaqej ri rupixa' ri richin jantape', stape' yeq'ax janila chi sol winaqi' chuwech ri ruwach'ulew.

Santiago 1:17

Ronojel sipanik niqaqa-pe chila' chikaj rik'in ri Dios ri xbanon ri saqil, achi'el ri q'ij, ri ik', ri ch'umila'. Ri Dios man jun bey nijalatej achi'el nijalatej ri mach'ach'il.

Santiago 4:12

Xaxe ri Dios ri niya'on ri pixa', y xaxe rija' ri niq'aton-tzij pa ruwi'. Y xaxe rija' nitikir yojkolon, y xaxe chuqa' rija' ri nitikir yojtaqon pa q'aq'. Y rat, ¿achike roma toq nabij chi ri jun chik man utz ta rubanon ri ruk'aslen chuwech ri Dios?

1 Pedro 2:6

Roma ri' nubij chupan ri ruch'abel ri Dios:*f3* chiri' pa Sión kan xtinya' k'a jun abej ri cha'on y janila rejqalen. Ja abej ri' ri xtok k'atzinel chire ri ruxe' ri jay. Y xabachike k'a ri rukuquban ruk'u'x rik'in, kan man xtik'ixbitej ta, nicha'.

1 Sam 2:2

Man jun loq'olej k'o, achi'el rat Jehová: kan xaxe wi rat ri atk'o. Man jun chik achi'el rat, y man jun chik tobel niqil achi'el ri k'o awik'in rat.