Am 4:10 - Kaqchiquel Bible

¹⁰ Xinteq-pe nimalej taq yabil pan iwi' achi'el ri xinya' pa kiwi' ri aj-Egipto, Xinben chi ri alaboni' xeken kan chupan ri labal. Chuqa' ri e etzelanel iwichin xkimej kan ri ikiej. Xinben chi xiseq kichuwil ri kaminaqi' ri chiri' ri akuchi ixk'o-wi-qa. Man rik'in ri' man xtzolej ta pe ik'u'x wik'in. Yin Jehová ri yibin.

Am 4:10 ပူးပေါင်းရင်းမြစ်များ

2 Rey 10:32

Chupan ri q'ij ri' ri Jehová xuchop nrelesaj ri ruwach'ulew Israel roma ri Hazael rey richin Siria.

2 Rey 13:3

Y ri Jehová kan xyakatej janila royowal pa ruwi' ri tinamit Israel, y k'iy juba' juna' xerujech pa ruq'a' ri Hazael rey richin Siria, y pa ruq'a' ri Ben-hadad ri ruk'ajol.

2 Rey 13:7

Y kan man e k'iy ta chik aj-labal ri xek'oje' kan rik'in ri Joacaz, xaxe chik k'a e kawineq lajuj achi'a' ri yech'oke' chirij kiej, e lajuj carruaje y 10,000 aj-labal ri nikiben oyowal chikaqen, ri xekanej kan rik'in; roma ri rey richin Siria kan xeruk'is k'a konojel, kan xuben chike achi'el ri poqolaj.

2 Rey 8:12

Y ri Hazael xubij chire: ¿Achike roma yatoq' wajaw?, xcha' chire. Y ri Eliseo xubij: Roma wetaman chi rat kan k'iy itzel ri xtabebana' chike ri nuwinaq israelita; y ri tz'aq xtabeya' ruq'aq'al, y xke'akamisaj ri alaboni' rik'in espada. Kan xke'abojla' ri taq ak'uala' chuwech abej, y kan xtachobila' kipan ri ixoqi' ri e yawa'i' chik, xcha'.

Ex 10:27

Jak'a ri Jehová kan xukowirisaj chik jun bey ri ránima ri rey, y man xuya' ta q'ij richin xebe.

Ex 10:3

K'ari' ri Moisés y ri Aarón xebe rik'in ri rey y xkibij chire: Ri Jehová ri qa-Dios roj israelita nubij: ¿K'a janipe' k'a xtaqasaj-awi' chinuwech? Taya' q'ij chire ri nutinamit richin nel-el wawe' richin chi yiberusamajij.

Ex 14:4

Y yin kan xtinkowirisaj k'a ri ránima rija' richin chi kan xtiyakatej-pe chiwij, jak'a yin xtink'ut ri nuq'ij-nuk'ojlen chuwech y chikiwech konojel ri aj-labal. Xtiketamaj k'a konojel ri aj-Egipto chi ja yin ri' ri in Jehová, xcha' ri Jehová chire ri Moisés. Y rije' kan xetzolin juba' chikij.

Ex 15:26

Y xubij: Wi kan qitzij xtiwak'axaj ri nuch'abel yin Jehová ri i-Dios, y kan xkixbiyin choj chinuwech, y kan xtiben ronojel ri nubij ri pixa' y kan xtiyek pan iwánima, kan man jun k'a yabil xtinteq-pe pan iwi' achi'el ri xinteq pa kiwi' ri aj-Egipto, roma ja yin Jehová ri in aq'omanel iwichin, xcha' ri Jehová.

Ex 8:19

Roma ri' ri aj-itza' xkibij chire ri rey: Re' kan rusamaj-wi ri Dios, xecha'. Jak'a ri rey xa más xukowirisaj ri ránima, y man xerak'axaj ta chik ri Moisés y ri Aarón, kan achi'el ri rubin ri Jehová.

Ex 9:12

Y ri Jehová xukowirisaj chik k'a jun bey ri ránima ri rey y roma ri' man xerak'axaj ta ri Moisés y ri Aarón kan achi'el ri bin chik chike.

Ex 9:17

Man rik'in ri' rat kan k'a animirisan na awi' y man naya' ta q'ij chi ri nuwinaq ye'el-el.

Wuj Richin ri Isaías 34:3

Ri kaminaqi' kan xkepunupuxin kan xabakuchi, y kan xkechuwir k'a pe. Ri kikik'el kan xtuch'eqeba' chijun k'echelaj.

Wuj Richin ri Isaías 50:11

Rix ri nibox jun q'aq' richin nitz'et ri ibey, kan kixbiyin k'a chupan ri saqil ri'. Y rix ri nitzij jun chej richin nuya' saqil, kan titzeqelibej k'a ri saqil richin ri chej ri'. Jak'a ri Jehová kan xtuteq-pe jun nimalej ruk'ayewal pan iwi', y ronojel re' xa xtuk'en-pe bis.

Wuj Richin ri Isaías 9:12

Ri pa relebel-q'ij xkepe ri aj-Siria, y ri pa qajbel-q'ij ja ri aj-Filistea. Y rije' kan xkekitej chi rex ri israelita. Y man rik'in ri' man ik'owineq ta qa ri royowal ri Jehová. Xa kan k'a ruya'on na q'ij richin yek'is konojel.

Wuj Richin ri Isaías 9:13

Jak'a rije' xa man xtzolej ta kik'u'x rik'in ri Dios, ni man xkikanoj ta ri Jehová k'iytisanel richin ronojel, stape' rija' xuya' tijoj-poqonal pa kiwi'.

Wuj Richin ri Isaías 9:17

Xa roma ri' ri Jehová kan man xtujoyowaj ta kiwech; ri alaboni', ri meba'i' y ri malkani'. Roma konojel rije' xa xkimalij kan ri Dios, y kan janila e itzel. Konojel xaxe yoq'onik ri k'o pa kichi'. Y man rik'in ri' man ik'owineq ta qa ri royowal ri Jehová. Xa kan k'a ruya'on na q'ij richin yek'is konojel.

Wuj Richin ri Jeremías 11:22

Y ri Jehová k'iytisanel richin ronojel xubij: Xtinbenya' rutojbalil pa kiwi'. Ri achi'a' ri kan k'o kuchuq'a' xkeken chupan ri labal y ri kimi'al-kik'ajol xkeken roma wayjal.

Wuj Richin ri Jeremías 15:3

Yin Jehová ri yibin. Yin xtinteq kaji' ruwech ruk'ayewal pa kiwi': Xkekamisex pa labal o chuqa' xkekiwech' tz'i' o ja ri aj-xik' taq chikopi' ri xketijo ri kich'akul o ri chikopi' k'uxunela' xkek'ison kichin.

Wuj Richin ri Jeremías 16:4

Xkeken konojel rik'in itzel taq yabil y man jun xtoq'en y man jun xtimuqun kichin. Kan xkech'otot kan pa taq bey, achi'el ri pamaj, roma ch'aqa' xkekamisex chi espada y ch'aqa' chik xkeken roma wayjal. Y ri aj-xik' taq chikopi' y ri chikopi' ri ek'o pa k'echelaj xtikitej ri kich'akul.

Wuj Richin ri Jeremías 18:21

Jak'a re wakami nink'utuj utzil chawe richin xtaben ta chi xkeken ri kalk'ual roma wayjal y roma ri espada. Ri ixoqi' kan xkemalkanej ta kan y xkek'is ta el konojel kal. Ja ta ri nima-yabil xtikamisan kichin ri achi'a', y ri alaboni' xkeken ta pa taq labal.

Wuj Richin ri Jeremías 48:15

xtapon k'a ri niwulan richin ri iruwach'ulew y ri itinamit. Ri jebel rubanon chupan ri ruk'ajolil xtiken. Keri' ninbij yin ri rey pa ruwi' chijun ri ruwach'ulew, yin Jehová ri k'o ronojel uchuq'a' pa nuq'a'.

Wuj Richin ri Jeremías 49:26

Roma ri' wakami konojel ri alaboni' ri ek'o wawe' kan xkepunupuxin kan pa taq bey y konojel ri aj-labal xkeken chupan ri q'ij toq yin xtinq'et-tzij pan iwi'. Ja yin Jehová ri k'o ronojel uchuq'a' pa nuq'a' ri yibin.

Wuj Richin ri Jeremías 5:3

Jehová, ¿man ja ta kami ri qitzij nakanoj rat? Rat xaya' rutojbalil-mak pa kiwi' y man xeq'axomer ta; xaya' wululen pa kiwi', jak'a man xkajo' ta xatkinimaj. Kan xkikowirisaj k'a ri kánima, más chuwech ri abej y kan man xkajo' ta xetzolin chupan ri utzilej bey.

Wuj Richin ri Jeremías 6:11

Kan woyowal achi'el rat y janila xikos yan richin ninkoch', xicha'. Roma ri' ri Dios nubij: Kan xtinya' k'a pa kiwi' ri taq ak'uala' ri ye'etz'an pa taq bey y chuqa' pa kiwi' ri alaboni' ri nikik'uaj-ki' pa taq tzobaj. Chuqa' chi achi'a' chi ixoqi' xke'uk'uex ta el pa ximonri'il, junan kik'in ri más taq e rijita'q.

Wuj Richin ri Jeremías 9:22

Ri Dios kan rubin k'a chiqe chi ri kaminaqi' kan xkech'otot kan, achi'el ri pamaj ri ch'ototajineq kan pa juyu'. Y ri kich'akul ri kaminaqi' kan xkepunupuxin kan achi'el ri espiga ri nitzaq kan toq niq'at ri trigo y kan man jun nisik'o-el richin, xecha'.

Os 11:5

Rije' man xketzolin ta chik k'a pan Egipto, pa ruk'exel ri' xa jak'a ri rey richin Asiria ri xtik'oje' pa kiwi'. Kere' xtikik'uluwachij roma kan man xkajo' ta xtzolej kik'u'x wik'in.

Joel 2:20

Y xkenwelesaj k'a el ri aj-labal ri yepe pa xaman y xkenteq-el pa tz'iran ruwach'ulew ri akuchi tolan-tolan-wi. Xtinben chi xkejiq' ri e ik'owineq chikiwech chupan ri Tzayi-Choy, y ri e ruk'isibel kan xkejiq' chupan ri palou. Y kan xkeq'ey y kan xtutaluj-ri' ri kichuwirinen, xticha' ri Jehová. Kan qitzij na wi chi ri Jehová chupan ri q'ij ri' xtuben ri nima'q taq banobel ri'.

Wuj Richin ri Chojmirisabelri'il 26:16

yin kan xtinteq k'a pe jun nimalej ruk'ayewal ri nuk'en-pe xibinri'il. Chuqa' xtinteq k'a pe jun nimalej yabil chiwij richin xtuk'is ri iwuchuq'a' y xtinteq k'a pe nimalej k'aten chiwij y xtipe k'a por pa runaq' taq iwech roma ri nimalej k'aten ri'. Y kan xkixmayamo' k'a qa. Ri itiko'n ri xtiben-qa kan man xtitej ta chik roma xa ja ri etzelanel iwichin xketijo.

Wuj Richin ri Chojmirisabelri'il 26:25

Y kan xtinya' k'a labal pan iwi', richin nitoj roma xiq'ej ruwi' ri jikibel-tzij ri qabanon. Y wi rix kan xtiwajo' xtito-iwi' pa jun tinamit ri sutin rij chi tz'aq, yin kan xkenteq-pe nimalej taq yabil chiwij ri nikitaluj-ki' y kan xkixtzaq pa kiq'a' ri etzelanel iwichin.

Am 4:6

Roma re mak re' yin xinben chiwe richin xq'urul ipan roma wayjal. Chupan ronojel tinamit man xinya' ta chik wey. Man rik'in ri' man xtzolej ta pe ik'u'x wik'in. Yin Jehová ri yibin.

Am 8:3

Chupan ri q'ij ri' ri bix ri nibixex chupan ri rachoch ri ki-dios xa xtok jun bix richin bis. Janila e k'iy winaqi' ri xkeken, y xkepunupuxin kan ri kich'akul chupan ri ruwach'ulew, xcha' ri Jehová.

Wuj Richin ri Hageo 2:17

Ri Jehová xuya-pe ruyabil ri tiko'n y chuqa' ri saqboch richin xuk'is ronojel ri isamaj rix. Man rik'in ri' man xtzolin ta pe ik'u'x rik'in.

Deut 28:21

Kan xtuteq k'a pe jun nima-yabil ri xtuk'en-pe kamik pan iwi' y kan xkixruk'is-el chuwech ri ruwach'ulew ri akuchi xkixbek'oje-wi ri xtiwichinaj kan.

Deut 28:22

Chuqa' xtuteq-pe jun nima-yabil chiwij ri kan xtuk'is iwuchuq'a', rik'in nimalej k'aten, sipojik ri kan yerepo. Chuqa' xtipe jun nimalej saq'ij y man xtiqaqa ta chik job y kan xtipe k'a yabil pa ruwi' ri itiko'n. Ronojel re' kan man xkixruya' ta kan k'a toq xkixruk'is na jumul.

Deut 28:60

Rija' xtuya' pan iwi' rix ronojel ruwech yabil, achi'el ri xuya' pa kiwi' ri aj-Egipto ri kan janila xixibij-iwi' chuwech, y ri yabil ri' kan man xkixruya' ta k'a kan.

Deut 7:15

Ri Jehová kan xtrelesaj-el ronojel ruwech yabil y xtrelesaj ri nimalej ruk'ayewal, achi'el ri xuya' pa kiwi' ri aj-Egipto, xa kan xaxe pa kiwi' ri winaqi' ri ye'etzelan iwichin xtuya-wi.