2 Sam 14:25 - Kaqchiquel Bible

²⁵ Ri Absalón kan janila k'a jebel ok. Y kan man jun k'a chikikojol ri israelita ri achi'el ta rija'. Kan chijun ri rubanik kan jebel nitzu'un. Y roma ri' ri winaqi' kan xaxe rija' ri nikinataj.

2 Sam 14:25 ပူးပေါင်းရင်းမြစ်များ

1 Rey 1:6

Jak'a ri David man jun bey k'a xuch'olij ri ruk'ajol ri',*f1* ni man jun bey xuk'utuj chire achike roma keri' nuben. Y ri ala' ri' kan janila jebel ok nitzu'un.

Wuj Richin ri Achin Job 2:7

Ri Satanás xel k'a el chiri' rik'in ri Jehová, y kan xuya' k'a pa tijoj-poqonal ri Job y xuya' k'a ch'a'k chirij chijun ruch'akul ri janila ruchikopil.

Wuj Richin Etamabel-Tzij 31:30

Ri jebejoj ok nitzu'un jun ixoq y ri jebel rubanik, xa chi'anin niq'ax; jak'a ri ixoq ri kan k'o rukiy ri Jehová chuwech, kan xtinimirisex ruq'ij.

Wuj Richin ri Isaías 1:6

roma ri imak kan achi'el chik ri sokotajik ri nuk'uaj jun wineq; nitiker k'a el pan iwaqen y napon k'a pan ijolon. Kan man jun chik utz chire ri ich'akul; xa kan xaxe chik k'a sokotajik, kajtajik y ch'a'k. Xa kan man banon ta iwaq'omal, ni man e pison ta rik'in jun tzieq, ni man e ya'on ta juba' aceite chiwij richin yixch'uch'u' ta juba'.

Ez 23:15

K'o ximibel-kipan, kuchubel-kijolon retal ri kisamaj, konojel rije' yetzu'un achi'el xa ta e q'atbel taq tzij richin Babilonia.

Dn 1:4

Rije' kan nik'atzin chi kan e tz'aqet y kan e jebel ok, y e tijon jebel rik'in ronojel etamabel y kan e nowineq, ri kan e nojineq chuqa' rik'in na'oj y kan ruk'amon richin yek'oje' pa rachoch ri rey. Y chuqa' xubij chike chi ketijox rik'in ri kich'abel ri aj-Babilonia, y tik'ut rutz'ibaxik ri ch'abel ri' chikiwech.

San Mateo 23:27

¡Toq'ex k'a iwech rix etamanela' chirij ri pixa' y rix fariseo ri xa ka'i' ipalej! Roma xa ix junan rik'in jun tz'aq ri akuchi ya'on-wi jun kamineq; ri rij seq y ch'ajch'oj, jak'a ri rupan man keri' ta, roma xa ruyon baq kichin kaminaqi' k'o chupan.

Efesios 5:27

Keri' xuben richin chi roj ri qakuquban qak'u'x rik'in, man jun ta qamak xtiq'alajin chuwech. Xa nrajo' chi kan ch'ajch'oj ri yojapon rik'in, achi'el jun tzieq ri ch'ajch'oj chik; banon chik ruchojmil, y man yochoyik ta chik.

Deut 28:35

Ri Jehová xtuben chiwe richin xtitej poqon rik'in awas pa taq ich'ek y xkebe'el-pe chijun ich'akul y kan man xkixaq'omatej ta chik.

1 Sam 16:7

Jak'a ri Jehová xubij chire ri Samuel: Man tatzu' ri rubanik, ni man tatzu' ri rupalen, roma yin man ja ta la' nucha'on richin nok kan rey. Ri wineq ja ri rubanik ri nutzu', jak'a yin kan ja ri ránima y ri ruch'obonik ri nintz'et, xcha'.

1 Sam 9:2

y k'o k'a jun ruk'ajol rubini'an Saúl ri k'a man jani k'o k'iy rujuna' y kan janila jebel ok nitzu'un. Chikikojol ri israelita kan man jun chik ala' ri más ta jebel chuwech rija', y kan xaxe rija' ri más nim rupalen chikikojol ri ek'o chupan ri ruwach'ulew ri'.