2 Rey 9:7 - Kaqchiquel Bible

⁷ Rat kan xke'ak'is k'a ri e rijatzul kan ri Acab, richin chi niqaqa pa kiwi' rije' ri xkiben chike ri nusamajela' ri e q'alajirisey ri nuch'abel, toq ri Jezabel xuben chi xbiyin kikik'el.

2 Rey 9:7 ပူးပေါင်းရင်းမြစ်များ

1 Rey 21:15

Y ri Jezabel kan xaxe toq xrak'axaj chi ri Nabot xk'aq chi abej y chi xken yan, jari' toq xubij chire ri Acab: Wakami kabiyin pa Jezreel roma awichin chik rat ri qejoj ri tikon uva chuwech ri richin kan ri Nabot, ri man xrajo' ta xuk'ayij chawe. Wakami rija' xa maneq chik, roma xa xken yan, xcha'.

Deut 32:43

Rix ch'aqa' chik tinamit kixkikot k'a qik'in, roma ri Jehová xtuya' rutojbalil ri kimak ri e etzelanel qichin, roma rije' xekikamisaj jujun chiqe roj ri rusamajela'. Ri Jehová ri Dios kan xtuya' k'a ruk'exel chike ri e etzelanel richin, y roj xtijunamatej chik qawech rik'in, y rija' chuqa' utz chik xtutz'et ri qaruwach'ulew, xcha' ri Moisés.

1 Rey 21:25

Kan qitzij na wi chi man jun chik xbanon achi'el ri xuben ri Acab, ri kan xujech-ri' chubanik ri etzelal chuwech ri Jehová, y ja ri Jezabel ri rixjayil ri xbanon chire richin xmakun chuwech ri Jehová.

1 Rey 21:21

Roma ri' ri Jehová Dios rubin-pe: Yin xtinteq-pe ruk'ayewal pan awi', y kan xkenk'is k'a el jumul konojel achi'a' ri aj pan awachoch y ri asamajela' ri e yuqul pa samaj. Kan xkatinwelesaj k'a el jumul pa tinamit Israel.

Deut 32:35

Juba-apo ri e etzelanel qichin xtikik'ul ri rutojbalil ri ruk'amon. Chaq k'ate' rije' xkejilijo' y xketzaq. Y kan chi'anin k'a xkek'is jumul.

Apocalipsis 19:2

Roma ri ruq'atbal-tzij rija' kan qitzij y choj; kan xuya' ruk'ayewal pa ruwi' ri ixoq itzel ruk'aslen, ri xbanon chike ri winaqi' ri ek'o chuwech ri ruwach'ulew richin xeqaqa pa mak, xuya' ruk'ayewal pa ruwi' roma xerukamisaj ri rusamajela' ri Dios, yecha'.

Apocalipsis 18:20

Y jari' k'a toq xak'axatej jun ch'abel y xubij: Kan kixkikot k'a rix ri ixk'o chila' chikaj, ri ix taqon roma ri Cristo, rix q'alajirisey ruch'abel ri Dios y rix ralk'ual ri Dios, roma ri Dios kan xutz'et ri xik'owisaj pa ruq'a' ri Babilonia. Roma ri' xuya' rutojbalil chire.

Hebreos 10:30

Y roj qetaman k'a achike ri biyon chi pa ruq'a' rija' k'o-wi ri ruk'ayewal, y nuya' rutojbalil chike ri yemakun. Chuqa' chupan ri ruch'abel ri Dios nubij: Ri ajaw xtuq'et-tzij pa ruwi' ri rutinamit, nicha'.

Romanos 13:4

Roma rije' kan ja ri Dios ri e yoyon, richin yojkisamajij roj. Jak'a wi niqaben ri man utz ta, tiqaxibij-qi' chikiwech, roma ja rije' xkeya'on ruk'ayewal pa qawi'. Kan e ya'on-wi roma ri Dios richin nikiya' ruk'ayewal pa kiwi' ri e banoy taq etzelal.

Romanos 12:19

Rix ri yalan yixinwajo', ninbij k'a chiwe chi wi ek'o ri yebanon itzel chiwe, man tiben ruk'exel chike. Xa tiya' pa ruq'a' ri Dios, roma ja rija' ri xtiya'on rutojbalil ri itzel taq kibanobal, kan achi'el ri nubij ri ruch'abel ri Dios ri tz'ibatel kan:*f47* Pa nuq'a' yin k'o-wi ri ruk'ayewal y ninya' rutojbalil chike ri yemakun, nicha'.

San Mateo 23:35

Y ronojel re' kan xtuben k'a chiwe chi ja rix yixejqalen ri kikamik konojel ri choj kik'aslen: Ri xtiker-pe rik'in ri rukamik ri Abel, k'a rik'in ri rukamik ri Zacarías, ri ruk'ajol ri Berequías; ri xkikamisaj ri iwati't-imama' ri chiri' chunaqaj ri porobel ri k'o pa rachoch ri Dios.

Apocalipsis 2:20

Xa jak'a k'o jun ibanobal ri man niqa' ta chinuwech, y ri' ja ri jantape' ikoch'on ri rubanobal ri ixoq Jezabel. Roma rija' kan nubij chi q'alajirisey ruch'abel ri Dios, jak'a xaxe richin yeruq'ol ri nusamajela', kan nuk'ut chikiwech chi nikitej ri kamelabel ri sujun chikiwech ch'aqa' chik dios, y chi ri achi'a' y ri ixoqi' tikikanola-ki' richin yemakun.

2 Rey 10:10

Tiwetamaj k'a chi ri xubij ri Jehová pa ruwi' ri rachoch ri Acab kan k'o chi xtibanatej ronojel. Wakami ri Jehová kan xuben-wi ri rubin chi nuben, ri xuq'alajirisaj chire ri Elías ri rusamajel, xcha'.

2 Crón 22:7

Ri Dios xuben chire ri Ocozías chi nibeken toq xtiberuq'ejela-el ri Joram. Toq ri Ocozías xapon rik'in ri Joram, kan jari' k'a xe'el-el richin nibekibana' oyowal rik'in ri Jehú, ruk'ajol ri Nimsí. Jak'a ri Jehová kan rucha'on ri Jehú richin yeruk'is konojel ri e ralk'ual y ri rixjayil ri Acab.

Wuj Richin ri Jeremías 26:5

Chuqa' tinimaj ri kich'abel ri e q'alajirisey nuch'abel ri e nuya'on chi'ikojol, stape' k'a re wakami rix man iniman ta kitzij rije'.

2 Rey 10:11

Keri' ri Jehú xerukamisaj k'a konojel ri k'a ek'o kan chire ri rijatzul kan ri Acab ri ek'o pa tinamit Jezreel, y chuqa' konojel ri tata'al, konojel ri e kachibil, keri' chuqa' ri e sacerdote ri xesamajin richin; kan man jun k'a xk'oje' kan chike.