2 Rey 9:26 - Kaqchiquel Bible

²⁶ Yin kan xintz'et ri rukik'el ri Nabot, y ri kikik'el ri e ralk'ual ri xbiyin. Roma ri' xtinbenya' ruk'exel chawe chupan re ulew re', xcha' kan ri Jehová chire. Wakami k'a tak'uaj, y tabek'aqa' kan pa rulew kan ri Nabot, achi'el rubin ri Jehová, xcha' ri Jehú.

2 Rey 9:26 ပူးပေါင်းရင်းမြစ်များ

Ez 18:19

Rik'in juba' rix xtik'utula' chiwech ri achike roma man nrejqalej ta ri alk'ualaxel ri rumak ri rutata'. Roma ri alk'ualaxel ri' kan xuben pa ruchojmilal y choj xbiyin y kan xutaqej ronojel ri nubij ri nupixa'. Roma ri' kan qitzij ninbij chi re alk'ualaxel re' kan xtik'ase' kan.

2 Crón 25:4

Jak'a man xerukamisaj ta k'a ri kalk'ual rije'; xa kan xuben achi'el ri tz'ibatel kan chupan ri wuj richin ri pixa' ri ruya'on kan ri Moisés, akuchi nubij-wi ri Jehová, chi man yeken ta ri te'ej-tata'aj roma ri kimak ri alk'ualaxela', ni ri alk'ualaxela' roma ri kimak ri te'ej-tata'aj; xa kan chikijujunal k'a xkeken roma ri kimak.

2 Crón 24:25

Ri Joás kan xsokotej k'a kan chire ri oyowal ri' y kan jurayil xuben kan y toq ri aj-Siria xe'el-el chiri', jari' toq ri rusamajela' xeyakatej chirij y xkikamisaj kan chiri' pa ruch'at, roma rija' xukamisaj ri Zacarías, ruk'ajol kan ri Joiadá. Ri Joás xmuq chiri' pa rutinamit kan ri rey David y man xmuq ta k'a ri akuchi e muqun-wi ri ch'aqa' chik rey.

1 Rey 21:19

Y kere' tabij chire: Kere' rubin-pe ri Jehová chuwe: Rat xakamisan richin ri Nabot, y chuqa' xamej kan ri ruqejoj. Wakami k'a, akuchi xkireq' tz'i' ri rukik'el ri Nabot, chiri' chuqa' xtikireq' tz'i' ri akik'el rat, xcha' ri Jehová chuwe, xcha' ri Elías.

Deut 24:16

Ri te'ej-tata'aj man yekamisex ta roma kimak ri alk'ualaxela', y ni ta ri alk'ualaxela' man yeken ta roma ri kimak ri kite-kitata', xa kan chikijujunal k'o chi yekamisex roma ri kimak.

Deut 5:9

Man k'a kixxuke' chikiwech rije', ni man tiya' kiq'ij, roma ja yin Jehová ri i-Dios ri kan man niqa' ta chinuwech richin niya' ruq'ij jun chik. Y wi k'o ta jun ri nibanon keri' xtinwetzelaj y xtiqaqa ri woyowal pa ruwi', y pa kiwi' ri rijatzul k'a pa rukaj sol.

Ex 20:5

Man k'a kixxuke' chikiwech rije', ni man tiya' kiq'ij, roma ja yin Jehová ri in i-Dios ri kan man niqa' ta chinuwech richin niya' ruq'ij jun chik. Jak'a wi yiniwetzelaj, ri woyowal yin xkeruq'i' ri iwalk'ual, k'a pa rox o pa rukaj sol.

1 Rey 21:13

Xepe k'a ri e ka'i' achi'a' ri e banoy taq etzelal y xetz'uye' k'a chuwech ri Nabot y xkibij chi ri Nabot xuyoq' rubi' ri Dios y xuyoq' ri rey. Y keri' ri winaqi' xkelesaj-el ri Nabot chiri' pa tinamit, y xkik'eq k'a chi abej richin xken.

2 Rey 9:21

K'ari' ri Joram xubij chi tichojmirisex ri ru-carruaje rija'. Y toq banon chik rutzil ri carruaje, jari' toq xe'el-pe ri Joram rey richin Israel y ri Ocozías rey richin Judá, chikijujunal pa ki-carruaje. Xbekik'ulu' k'a ri Jehú, y xbekila' chiri' pa rulew kan ri Nabot ri k'o chunaqaj ri Jezreel.

2 Rey 9:25

K'ari' ri Jehú xubij chire ri aj-raqen rubini'an Bidcar: Tabek'ama-pe, y tabeya' pa rulew kan ri Nabot ri aj-Jezreel. Toqaqa k'a chi'ak'u'x toq rat y yin junan oj beneq rik'in ri Acab ri rutata' pa carruaje, toq ri Jehová xubij chi kere' xtuk'uluwachij rija' toq xubij:

Wuj Richin ri Habacuc 2:10

Kan ayon k'a rat xawoyoj ruk'ayewal pa kiwi' ri janila chi winaqi', y roma ri' xak'en-pe k'ixbilal pa kiwi' ri e aj pan awachoch, y ri ak'aslen kan k'o pa kamik.

Wuj Richin Bix Chire ri Dios 9:13

Tabana' utzil Jehová tajoyowaj nuwech yin; tatzu' re q'axo'n re nink'owisaj koma ri ye'etzelan wichin, kan kinakolo' k'a chuwech ri kamik,