2 Rey 4:42 - Kaqchiquel Bible

⁴² K'o k'a jun q'ij xapon rik'in ri Eliseo jun achin aj-Baal-salisá; y re achin re' ruk'uan-apo chire ri Eliseo juwineq kaxlan-wey ri banon rik'in ri nabey taq ruwech cebada, y chuqa' kan ruk'uan k'a apo juba' trigo ri k'a k'o pa rij. Y ri Eliseo xubij chire ri rusamajel chi tuya' ri kaxlan-wey ri' chikiwech ri winaqi' richin yewa'.

2 Rey 4:42 ပူးပေါင်းရင်းမြစ်များ

1 Sam 9:7

Y ri Saúl xubij chire: Jo' k'a; jak'a ¿Achike ta k'a niqak'uaj-el chire ri achin ri'? Roma maneq chik kaxlan-wey qik'in, y man jun chik k'o qik'in richin niqak'uaj chire. ¿Achike ta k'a yojtikir niqaya' chire?, xcha'.

San Juan 6:13

Ri tijoxela' kan xbekimolo' k'a pe, y xkinojisaj kablajuj chakech rik'in ri man xk'is ta rutijik, toq e wayneq chik konojel. K'a ja na ri' xmolotej kan chire ri wo'o' kaxlan-wey banon rik'in cebada.

San Juan 6:9

Wawe' k'o jun ala' ri k'o wo'o' kaxlan-wey rik'in, ri banon rik'in cebada; chuqa' ka'i' taq ker e ruk'amon-pe, ¿xaxe ta k'a ok re' ri xtiqaya-apo chikiwech konojel re winaqi' re'?, xcha' ri Andrés.

2 Rey 7:1

K'ari' ri Eliseo xubij: Tiwak'axaj ri ruch'abel ri Jehová: Rija' nubij chi ke taq wa chua'q, xtibek'ayix ri lajuj libra k'ej chayun chi nik'aj onza saqipueq, y ri juwineq libra cebada xtibek'ayix chi nik'aj onza saqipueq; y re' kan ja re wawe' chuchi' ri tinamit Samaria xtibanatej-wi, xcha'.

1 Sam 9:4

Xebe k'a rije' y xkiq'axaj ri ruwi' taq juyu' richin Efraín, y k'ari' xeq'ax chupan ri ruwach'ulew Salisá y man xekil ta. K'ari' xeq'ax pa ruwach'ulew Saalim y chupan ri ruwach'ulew Benjamín y chuqa' man xekil ta chiri'.

1 Corintios 9:11

Y wi roj xqatik pa taq iwánima ri ruch'abel ri Dios ri xa man k'isel ta, ¿k'ixbel ta kami chi roj niqak'ul iwik'in ri k'atzinel chiqe richin niqaq'axibej-qi' ri xa k'isel?

2 Rey 4:38

Chirij ronojel re', ri Eliseo xtzolin pa Guilgal, y chiri' janila wayjal k'o. Y ri e q'alajirisey ruch'abel ri Dios e tz'uyul k'a apo rik'in rija'. Ri Eliseo xubij k'a chire ri rusamajel: Taya-qa jun bojo'y nim pa ruwi' q'aq', y tabana' kiq'utun ri e q'alajirisey ruch'abel ri Dios, xcha'.

Deut 32:14

Chuqa' chiri' xitej jebelej mantequilla roma ri iwawej kan janila chi leche xkiya'. Xitej kich'akul karne'l y tzuntzun richin Basán, ri jebel e ti'ojirisan. Y xitej ri jebelej taq trigo y xiqum ri jebelej taq vino.

Deut 12:6

Chiri' k'a xtik'uaj-wi ri isipanik: Ri chikop ri niporox, ri sipanik richin ri jun chire ri lajuj, ri sipanik ri nalex-pe pan iwánima, ri sipanik toq nijikiba-tzij y ri nabey taq kal ri iwawej.

Deut 8:8

Jun ruwach'ulew ri akuchi niwachin ri trigo, ri cebada, ri uva, ri wíkix, ri granada, ri olivo y ri kab ri nikiya' taq chikopi'.

Ex 23:16

Chuqa' xtiben ri nimaq'ij richin ri nabey ruwech ri itiko'n, ri niwelesaj chuwech ri iwulew. Y pa ruk'isibel, toq nik'is ri juna', xtiben chuqa' ri jun nimaq'ij richin toq nik'ol ronojel ruwech ri itiko'n ri xiben.

Gálatas 6:6

Y rix ri yixtijox chire ri ruch'abel ri Dios, kan ke'ito' k'a ri yetijon iwichin. Ronojel ri utz ri k'o iwik'in rix kan tiya' chuqa' juba' chike rije'.

1 Rey 14:3

Tak'uaj-el chire lajuj kaxlan-wey, y jun chik kaxlan-wey ri más nim, y chuqa' tak'uaj-el jun xára kab ri nikiya' ri taq chikopi'. Kabiyin k'a chila' rik'in ri Ahías, y rija' xtubij-pe chawe achike xtiberuk'uluwachij ri ti qalk'ual, xcha'.

2 Rey 5:5

Y ri rey richin Siria xubij chire ri Naamán: Kabiyin, y yin xtinteq-el jun wuj chire ri rey richin Israel richin xkaruk'ul chi utzil, xcha'. Keri' xbe ri Naamán pa ruwach'ulew Israel, y xuk'uaj-el jubama wuqu' quintal saqipueq, jun quintal rik'in nik'aj q'anapueq y lajuj jal tzieq.

Wuj Richin ri Q'axanri'il 18:12

Kan ronojel k'a chire ri nabey ruwech tiko'n ri nikiya-pe chuwe yin, kan jari' ri xtinya' chuqa' chiwe rix. Ninya' k'a chiwe ri más utz chire ri aceite olivo, ri más utz chire ri ruya'al uva y ri más utz chire ri jalajoj ruwech ixin.

Wuj Richin ri Q'axanri'il 18:13

Ronojel ri nabey taq ruwech ri tiko'n ri nuya' ri kulew ri awinaq, ri nikisuj chuwe yin, re' kan xtok-wi awichin rat; y konojel k'a ri ek'o pan awachoch ri kan e ch'ajch'oj utz chuqa' nikitej.