2 Rey 10:26 - Kaqchiquel Bible

²⁶ Y xekelesaj k'a el ri wachibel e paban-q'anej chiri' pa rachoch ri Baal, y xekiporoj.

2 Rey 10:26 ပူးပေါင်းရင်းမြစ်များ

1 Rey 14:23

Rije' xekipaba-q'anej ri akuchi nikiya-wi ruq'ij ri wachibel ri pa ruwi' taq juyu', y chuqa' xekipaba-q'anej abej y che' richin nikiya' kiq'ij ri ki-dios. Re' xeban pa ronojel ruwi' taq juyu' y chuxe' taq che' ri jebel kimujal.

2 Rey 19:18

Y kan xekik'eq pa q'aq' ri ki-dios ri e banon rik'in che' y abej, y xa achi'a' ri e banayon. Y konojel ri dios ri' kan xekik'is.

2 Rey 3:2

Y xuben k'a ri man utz ta chuwech ri Jehová stape' man xuq'i' ta ri kibanobal ri rute-rutata'; roma xrelesaj-el ri paban-abej richin ri Baal, ri rubanon kan ri Acab ri rutata'.

2 Sam 5:21

Y ri aj-Filistea, toq xe'animej, xekiyala' k'a kan ri wachibel ri nikiya' kiq'ij. Y ri David y ri aj-labal xkik'uaj k'a el ronojel re'.

1 Rey 16:32

Y xuben jun rachoch ri Baal ri chiri' pa Samaria, y chupan ri jay ri', xuben jun porobel richin nikiya' ruq'ij ri Baal.

2 Rey 11:18

K'ari' konojel ri winaqi' xe'ok-apo chupan ri rachoch ri Baal, y xkiwulaj-el. Keri' chuqa' xkiwulaj-el jumul ri porobel y ri wachibel. Y xkikamisaj ri Matán sacerdote richin ri Baal chuwech-pe ri porobel. Y ri Joiadá xeruya' chajinela' chupan ri rachoch ri Jehová.

Wuj Richin ri Isaías 27:9

Xaxe k'a k'o jun rubanik richin xtukuy ri kimak ri qawinaq israelita; wi xtikiben k'a ronojel re', kan xtikuyutej ronojel ri man utz ta kibanon: Kan xkeruyoj k'a ronojel porobel ri xa e kichin ch'aqa' chik dios, y kan xkeke'ex achi'el niban rik'in ri chum. Chuqa' xke'elesex ronojel paban-che' ri nikiya' ruq'ij ri Asera, y ronojel porobel richin pom.

Deut 7:5

Ke'iwulaj ronojel ri porobel, ri wachibel, ri paban taq che' ri nikiya' ruq'ij; kan ke'iporoj k'a kan.

1 Rey 15:13

Y chuqa' xuben chire ri rati't chi xel-pe chupan ri q'atbel-tzij, roma rija' xuben-q'anej jun itzel ruwachibel Asera. Ri Asá xuwulaj-el ri wachibel ri', y xberuboxo' pa q'aq' chuchi' ri ch'uti'n raqen-ya' Cedrón.

2 Rey 18:4

Rija' xrelesaj k'a ri akuchi nikiya-wi kiq'ij wachibel pa ruwi' taq juyu'. Xerupaxij ri dios ri e banon rik'in abej y xuqupij-el ri paban-che' richin ri Asera. Chuqa' xuwulaj ri kumetz ri banon rik'in q'enq'oj-pueq ri chuqa' xkibij Nehustán*f7* chire. Ri winaqi' kan nikiya-wi k'a ruq'ij ri kumetz y kan nikiporoj pom chuwech.

2 Rey 23:4

K'ari' ri rey xuteq rubixik chire ri Hilquías ri nimalej sacerdote, ri ch'aqa' chik sacerdote y ri e chajiy ruchi' ri rachoch ri Dios, chi kekelesaj-pe ri chiri' pa rachoch rija', ronojel ri banon richin ri Baal, richin ri Asera y kichin ri ek'o chuwech ri kaj. Ronojel re' xerelesaj-el k'a chuchi' ri tinamit Jerusalem chiri' pa siwan ri napon-qa pa ch'uti'n raqen-ya' Cedrón. K'ari' ri rey chiri' k'a xeruporoj-wi. Y ri kichajul xuk'uex-el pa tinamit Betel.

2 Rey 23:6

Y chuqa' xberelesaj-pe ri paban-che' richin Asera ri k'o chiri' pa rachoch ri Jehová, y xuk'uaj k'a el chuchi' ri tinamit ri akuchi yemuq-wi ri winaqi' rik'in ri siwan ri napon-qa pa ch'uti'n raqen-ya' Cedrón. K'ari' xuporoj y xuben chi xjok' ri k'o kan, y xtalux pa kiwi' ri kaminaqi'.

2 Rey 23:12

Y chuqa' xeruwulaj-el ri porobel ri ek'o kan pa ruwi' ri taq'aj-ruwi' rachoch ri Acaz, ri kibanon kan ri ch'aqa' chik rey. Chuqa' xerelesaj-el ri porobel ri rubanon kan ri Manasés ri ek'o chupan ri ka'i' ruwa-jay richin ri rachoch ri Jehová. Xuk'ajij-el y k'ari' xberuk'aqa' pa siwan ri napon-qa pa ch'uti'n raqen-ya' Cedrón.

1 Crón 14:12

Chirij ri' ri aj-Filistea xekimalij kan ri ruwachibel ri ki-dios rije' y ri David xuteq kiporoxik.

2 Crón 34:7

Y xeruwulaj k'a kan ronojel porobel, ronojel ri paban-che' richin ri Asera y ronojel ri ch'aqa' chik wachibel e paban. Ronojel re' xeruk'ajij kan y xuben poqolaj chike. Keri' chuqa' xeruwulaj kan ronojel ri porobel-pom. Y chirij ronojel re' xtzolin pa Jerusalem.