2 Crón 18:9 - Kaqchiquel Bible

⁹ Y ri Acab y ri Josafat rey richin Judá e tz'uyul pa kich'akat y kikusan ri kitziaq richin rey, chiri' akuchi niban-wi molojri'il chuwech-apo ri ruchi' ri tinamit Samaria, y konojel k'a ri e q'alajirisey ruch'abel ri ki-dios kan ye'ajin nikik'ul ri achi'el achik' chikiwech ri e ka'i' rey ri'.

2 Crón 18:9 ပူးပေါင်းရင်းမြစ်များ

San Mateo 19:28

Ri Jesús xubij: Kan qitzij k'a ninbij chiwe chi toq xtapon ri ruq'ijul toq ronojel k'ak'a' chik rubanik, y toq yin, ri xiqaqa-pe achi'el wineq chi'ikojol, k'o chik nuq'ij-nuk'ojlen y xkitz'uye' pa nutz'uyubal richin q'atoy-tzij, jari' toq rix ri xixtzeqeliben wichin, chi'ijujunal xkixtz'uye' pa tz'uyubel richin niq'et-tzij pa kiwi' ri kablajuj tzobaj richin ri qawinaq judío.

San Mateo 11:8

Ri xibetz'eta' rix xa jun achin ri xa man jebelej ta taq tzieq ri e rukusan, roma ri achi'a' ri e kikusalon jebelej taq tzieq, kan pa taq kachoch ri e rey ek'o-wi.

San Mateo 6:29

Y rix iwetaman achike xuben ri Salomón ri ojer kan. Rija' kan xuwiq k'a ri' rik'in jebelej taq tzieq, jak'a kan man jun bey xk'oje' ta jun rutziaq jebel achi'el titzu'un ri kotz'i'j lirio.

Dn 7:9

Chirij ri' yin xintz'et k'a chi ek'o tz'uyubel richin q'atbel-tzij ri xechololex-qa. Xintz'et k'a jun chik tz'uyubel, y chiri' xtz'uye-wi ri k'aslik Dios. Ri rutziaq kan lox-lox k'a nitzu'un achi'el ri chuma-tew. Ri rusumal-ruwi' kan seq-seq, achi'el ri betz' seq. Ri rutz'uyubal richin ri ruq'atbal-tzij kan nik'a'on pa q'aq', Y chuxe-qa ri rutz'uyubal ek'o rueda, y ri ru-rueda kan keq-keq rubanon pa q'aq'.

Ez 26:16

Jari' toq konojel k'a ri e rey pa kiwi' ri ch'aqa' chik tinamit ri', kan xkeyakatej k'a el pa kitz'uyubal, y xtikelesaj k'a el ri jebelej taq tzieq y rik'in k'a janila xibinri'il xkebetz'uye' pan ulew. Y jantape' k'a k'o xibinri'il kik'in y roma ri' xkebaybot y xtikimey ri xbanatej.

Wuj Richin ri Isaías 14:9

Ri akuchi ek'o-wi ri kaminaqi', konojel rije' xkich'ob xesilon-el, richin xatokik'ulu' k'a el. Kan xeyakatej-pe konojel richin xatokiq'ejela-el. Ri tata'al ri xek'oje-pe ojer, e tz'uyul pa kitz'uyubal richin q'atoj-tzij; y toq xatapon-qa rat, rije' yepa'e' richin xatokik'ulu-el.

2 Crón 18:29

Y ri Acab xubij chire ri Josafat: Yin xtinjel-el nuwech y xkinok-apo chupan ri oyowal, jak'a rat takusaj ri atziaq richin rey, xcha'. Y keri' ri Acab kan xujel k'a el ruwech y xbe pan oyowal.

Wuj Richin ri Rut 4:1

Toq xpaq'ijer k'a q'anej, jari' toq ri Booz xbetz'uye' chuchi' ri tinamit ri akuchi nikimol-wi-ki' ri winaqi'. Y xq'ax k'a el keri' ri ach'alalri'il ri achoq pa ruwi' ch'owineq-wi y ri Booz xubij k'a chire ri achin ri': Táta, katanpe na juba' wawe' y katz'uye' wik'in, xcha' chire. Y ri achin ri' kan xpe k'a y xtz'uye' rik'in.

2 Crón 18:8

Y keri' ri Acab xroyoj jun chike ri rusamajel y xubij chire chi tiberuk'ama' ri Micaías ruk'ajol ri Imlá.

2 Crón 18:10

Y jun k'a chike rije' ri rubini'an Sedequías, ruk'ajol ri Quenaaná, e rubanon ka'i' oxi' ruwachibel uk'a' rik'in q'eqapueq, y rija' xuq'alajirisaj k'a: Kere' nubij ri Jehová: Rik'in k'a re uk'a' re' xke'ikoq'ila-wi ri aj-Siria achi'el nitoq'on jun wákix, k'a toq xkek'is na pan iq'a', xcha' chike.