1 Sam 9:3 - Kaqchiquel Bible

³ Y ri Cis ek'o k'a rubur y k'o k'a jun q'ij xesach-el re bur re'. Roma ri' rija' xubij chire ri Saúl chi tuk'uaj-el jun chike ri rusamajela' y kebekikanoj ri bur ri xesach-el.

1 Sam 9:3 ပူးပေါင်းရင်းမြစ်များ

Wuj Kichin ri To'onela' 10:4

Re achin re' xek'oje' e juwineq lajuj ruk'ajol, y chikijujunal rije' k'o jujun kibur richin yech'oke' chirij. Chuqa' chikijujunal rije' k'o jujun kitinamit pa ruwach'ulew Galaad, y ronojel ri tinamit ri' nibix tinamit richin Jaír chire.

Wuj Kichin ri To'onela' 5:10

Rix ri k'o iq'ij ri yixch'oke' chikij seq taq bur, rix ri ix to'onela', chi'iwonojel rix winaqi' richin ri tinamit, kan titzijoj k'a ronojel ri xuben ri Jehová.

1 Sam 10:14

Y k'o k'a jun ruch'utitata' ri Saúl, xuk'utuj chire ri rusamajel y ri Saúl ri akuchi e peteneq-wi. Y rija' xubij: Xojbe chikikanoxik ri taq bur y roma man xeqil ta, roma ri' xojbe rik'in ri Samuel, xcha'.

1 Sam 10:2

Wakami k'a ri xkabe, xke'awil ka'i' achi'a' ri ek'o chunaqaj ri akuchi xmuq-wi ri Raquel, ri pa ruwach'ulew ri Benjamín, chiri' pa Selsah. Rije' xtikibij chawe chi ri taq bur ri xebe'ikanoj xe'ilitej yan. Y ri atata' xa xerumestaj yan qa y wakami kan ja chik k'a rix ri nuch'ob iwij. Y nukanoj achike nuben richin yixril.

1 Sam 9:2

y k'o k'a jun ruk'ajol rubini'an Saúl ri k'a man jani k'o k'iy rujuna' y kan janila jebel ok nitzu'un. Chikikojol ri israelita kan man jun chik ala' ri más ta jebel chuwech rija', y kan xaxe rija' ri más nim rupalen chikikojol ri ek'o chupan ri ruwach'ulew ri'.

1 Sam 9:20

Y pa ruwi' ri taq bur ri k'o yan chik oxi' q'ij ke'asech, man chik tach'ob, roma xa xe'ilitej yan. Man tach'ob rij, roma ronojel ri k'o rejqalen re wawe' pan Israel, ronojel ri' xtok awichin rat y kichin ri e aj pan awachoch, xcha' ri Samuel.

1 Sam 9:4

Xebe k'a rije' y xkiq'axaj ri ruwi' taq juyu' richin Efraín, y k'ari' xeq'ax chupan ri ruwach'ulew Salisá y man xekil ta. K'ari' xeq'ax pa ruwach'ulew Saalim y chupan ri ruwach'ulew Benjamín y chuqa' man xekil ta chiri'.