1 Rey 18:10 - Kaqchiquel Bible

¹⁰ Chuwech k'a ri k'aslik Jehová ri qa-Dios ninbij-wi chi konojel ri ruwach'ulew y q'atoy taq tzij ri akuchi rutaqon-wi akanoxik ri wajaw, konojel kibin-pe chi man atk'o ta chiri'. Y toq keri' nikibij-pe rije', ri Acab kan xuben chike chi nikijikiba' ri kitzij chi man atk'o ta chupan ri kiruwach'ulew.

1 Rey 18:10 ပူးပေါင်းရင်းမြစ်များ

1 Rey 17:1

Y k'o k'a jun q'ij k'o jun q'alajirisey ruch'abel ri Dios ri xch'on rik'in ri rey Acab. Y ri q'alajirisanel ri' rubini'an Elías, y rija' aj-Tisbé, ri k'o pa ruwach'ulew Galaad. Y ri Elías xubij chire: Chuwech ri k'aslik Jehová Dios richin Israel, ri achoq chuwech in pa'el wi yin, ninbij chawe chi man xtiqaqa ta job ni raxq'ab pa ruwi' re ruwach'ulew Israel, k'a ja toq xtinbij na yin, xcha'.

San Juan 8:59

Roma ri' ri achi'a' ri' kan xbekisik'ila-pe abej richin nikik'eq chi abej ri Jesús. Jak'a rija' xrewaj-ri' y xel-pe ri chiri' pa rachoch ri Dios.

Wuj Richin ri Jeremías 36:26

Ri rey xroyoj ri Jerahmeel ri ruk'ajol, ri Seraías ruk'ajol ri Azriel y ri Selemías ruk'ajol ri Abdeel y xeruteq richin chi yekichop ri Jeremías y ri Baruc ri rutz'ibanel. Jak'a ri Jehová xa xerewaj chikiwech ri e etzelanel kichin.

Wuj Richin Bix Chire ri Dios 91:1

Ri nikito-ki' rik'in ri nimalej rutzil ri Dios, kan kuqul k'a kik'u'x yek'oje' chuxe' ri rumujal rija'.

Wuj Richin Bix Chire ri Dios 31:20

Kan ye'achajij k'a chuwech ri kich'obonik ri e banoy etzelal. Kan awik'in k'a rat nikito-ki' chire ri kiyoq'onik ri winaqi' ri'.

Wuj Richin Bix Chire ri Dios 10:2

Ri banoy etzelal rik'in nimirisanen rutzeqeliben ri k'o pa meba'il. Ri pikbel ri rubanon xa ja rija' ri xtitzaq chupan.

1 Rey 18:15

Y ri Elías xubij chire: Chuwech k'a ri k'aslik Jehová k'iytisanel richin ronojel, ri achoq chuwech ink'o-wi, ninbij chawe chi kan ja re wakami xtink'ut-wi' chuwech ri Acab, xcha' ri Elías.

1 Rey 17:12

Y ri ixoq xubij: Chuwech k'a ri Jehová ri k'aslik a-Dios ninbij chi maneq kaxlan-wey wik'in, xaxe jun moq' k'ej ri k'o kan chupan ri bojo'y, y ti juba' ti aceite ri k'o kan chupan ri xára. Y wakami ninmol juba' ti nusi' richin ninchaq'arisaj jun kaxlan-wey qichin chi oj ka'i' rik'in ri ti wal. Xtiqatej k'a ri jun ti kaxlan-wey ri' y chirij ri' xqojken roma wayjal, xcha'.

1 Rey 17:9

ja yan ri' tibe pa tinamit Sarepta ri k'o pa ruwach'ulew Sidón, y chiri' tik'oje-wi, roma rija' rubin chik chire jun malka'n ixoq chi ja rija' ri nilin richin.

1 Rey 17:5

Y ri Elías kan xbe k'a, y xuben achi'el xubij ri Jehová chire. Xbe k'a richin xbek'oje' chiri' chuchi' ri ch'uti'n raqen-ya' chiri' pa Querit ri k'o-apo la juk'an chire ri raqen-ya' Jordán, y xk'oje' k'a chiri'.

1 Rey 2:24

Y ri Salomón chuqa' xubij: Ja ri Dios ri xya'on q'ij richin ja yin xik'oje' kan pa ruk'exel ri David ri nata', y chuqa' rija' kan xutaqej ri rubin chi kan ja ri wijatzul yin ri xkek'oje' chupan ri ajawaren, y roma ri' chuwech ri Jehová, ninbij chi kan k'atzinel chi nikamisex ri Adonías, xcha'.

1 Rey 1:29

Y ri rey xuya' rutzij y xubij: Chuwech k'a ri Jehová, ri xkolon ri wánima chuwech ronojel ri nubis,

1 Sam 29:6

K'ari' ri rey Áquis xroyoj ri David y xubij chire: Kan qitzij ninbij chawe chi rat kan at choj-wi, kan janila at qajineq chinuwech y ninrayij chi yabe ta wik'in pan oyowal. Roma kan ja ri q'ij toq xatoqaqa qik'in y k'a re wakami man jun itzel nutz'eton chawij, jak'a ri aj-raqen kan man yaqa' ta chikiwech.

1 Rey 18:9

Jak'a ri Abdías xubij chire: ¿Achike k'a numakun yin ri in asamajel richin yinajech pa ruq'a' ri Acab richin yirukamisaj?

1 Rey 18:11

Y wakami rat nabij chuwe chi yibe rik'in ri wajaw y ninbenbij chire chi rat atk'o wawe'.

1 Rey 22:14

Jak'a ri Micaías xubij: Chuwech k'a ri k'aslik Jehová, ninbij chi achike xtubij ri Jehová chuwe, jari' ri xtinbij yin, xcha' chire ri oyonel richin.

Wuj Richin ri Jeremías 36:19

K'ari' xkibij chire ri Baruc: Rat y ri Jeremías más utz tibewewaj-iwi' y man jun tetaman akuchi xkixbek'oje-wi, xecha' chire.

1 Sam 23:23

Kan tibetz'eta' k'a jebel ri akuchi k'o-wi, y k'ari' xtik'en-pe rutzijol chuwe. Y yin xkibe chuqa' chiwij richin xtibeqanik'oj. Wi kan chiri' k'o-wi, yin kan xtinkururej chikikojol konojel ri winaqi' aj-Judá, xcha' ri Saúl chike.