1 Crón 15:29 - Kaqchiquel Bible

²⁹ Y toq ri káxa richin ri rujikibel-tzij ri Dios xapon pa rutinamit ri David, ri rumi'al kan ri Saúl rubini'an Mical ri rixjayil ri David, xtzu'un-pe pa ventana y xutz'et-pe ri rey David nitzopiyaj roma kikoten; y ri ixoq ri' kan xrixowaj ri David ri rachijil.

1 Crón 15:29 ပူးပေါင်းရင်းမြစ်များ

2 Sam 6:16

Toq ri káxa ri' xapon pa Jerusalem, jari' toq ri Mical ri rixjayil nitzu'un-pe pa jun ventana. Ri Mical ri' rumi'al kan ri Saúl. Y toq xutz'et-pe chi ri David nitzopiyaj roma kikoten chuwech ri Jehová, jari' toq rija' kan xretzelaj k'a ri rachijil.

Hebreos 9:4

Chiri' k'o-wi ri porobel-pom ri banon rik'in q'anapueq, ri káxa richin ri rujikibel-tzij ri Dios ri ya'on q'anapueq chirij y chupan. Chupan ri' k'o jun xára banon rik'in q'anapueq ri k'o juba' aj-chikajil-wey chupan, ri ruch'ame'y ri Aarón ri xjotayin chik pe. Y chuqa' ri tz'alem taq abej ri tz'ibatel-wi kan ri jikibel-tzij.

2 Corintios 5:13

Wi rix nich'ob chi roj oj ch'ujerineq, kan ja ri Dios ri etamayon. Y wi nich'ob chi oj raxneq, kan k'o k'a utz xtuk'en-pe chiwe rix.

1 Corintios 2:14

Ri winaqi' ri man k'o ta ri Loq'olej Espíritu richin ri Dios kik'in, man niq'ax ta chikiwech ri tijonik ri e peteneq rik'in rija'. Chikiwech rije' xa kan man jun rejqalen, roma xaxe ri k'o ri Loq'olej Espíritu qik'in, ri niq'ax chiqawech y qetaman ri tijonik ri'.

Hechos 2:13

Jak'a ek'o k'a winaqi' ri xa yetze'en-apo chikij ri yech'on jun chik ch'abel, y nikibila' k'a chi xa e q'abarela'.

Wuj Richin ri Jeremías 33:11

Jak'a xtapon jun q'ij chi ri chiri' xtak'axatej chik bix richin kikoten, bix richin k'ulubik y bix kichin ri yek'amon-pe sipanik richin matioxinik chuwe. Y kere' ri nikibixaj: Tiya' matioxinik chire ri Jehová ri k'o ronojel uchuq'a' pa ruq'a', roma rija' kan janila utz, y ri rajowabal kan richin q'asen, xkecha' rije'. Roma kan xtinben chi ri kulew xtiwachin chik jun bey achi'el ri pa nabey.

Wuj Richin ri Jeremías 30:19

Iwik'in k'a rix xtel-pe bix richin matioxinik y tze'en richin kikoten. Man xkixk'is ta qa roma yin kan xtinben chiwe richin yixk'iyer. Chuqa' yin xtinya' iq'ij y roma ri' kan man jun bey chik xtiqasex iq'ij.

Wuj Richin ri Jeremías 3:16

Y toq xixk'iyer yan chupan ri iruwach'ulew, man k'atzinel ta chik richin xtinataj ri káxa richin nujikibel-tzij, ni man jun chik xtich'obon pa ruwi' re' y man xtoqaqa ta chik chi'ik'u'x, ni man xtik'atzin ta chik chiwe ni man xtiteq ta rubanik jun k'ak'a'.

Wuj Richin ri Molojri'il 3:4

Napon k'a ruq'ijul richin oq'ej, y chuqa' napon k'a ruq'ijul richin kikoten. Napon k'a ruq'ijul richin jiloj, y chuqa' napon ruq'ijul richin yaropin roma kikoten.

Wuj Richin Bix Chire ri Dios 150:4

Tiya' ruq'ij ri Dios rik'in pandereta, y kan kixropiyaj roma kikoten. Tiya' ruq'ij rik'in xul y q'ojom ri e banon rik'in k'an.

Wuj Richin Bix Chire ri Dios 149:3

Kan tibixex k'a ri rubi' y ketzopin roma kikoten. Rik'in ri pandero y ri arpa kebixan richin nikiya' ruq'ij.

Wuj Richin Bix Chire ri Dios 30:11

Ri nuq'axo'n kan xajel k'a rik'in kikoten; xawelesaj k'a ri janila bis chuwij y xinanojisaj rik'in kikoten.

1 Sam 25:44

Jak'a ri Saúl xa xujech chik el ri Mical ri rixjayil ri David chire ri Paltí ruk'ajol ri Lais aj-Galim.

1 Sam 4:3

Toq xetzolej k'a el ri israelita ri akuchi ek'o-wi-qa, jari' toq ri rijita'q taq achi'a' ri k'o kiq'ij xkibij: ¿Achike roma ri Jehová xuya' q'ij chike ri aj-Filistea richin xojkich'ek? Wakami tibeqak'ama' ri káxa richin ri rujikibel-tzij ri Jehová ri k'o pa Siló, richin keri' nibe pa qanik'ajal roj, y kan xqojrukol chikiwech ri etzelanel qichin, xecha'.

Wuj Kichin ri To'onela' 20:27

Chupan ri q'ij ri' ri káxa richin ri rujikibel-tzij ri Dios k'o chiri', y ja k'a ri Finees ri ruk'ajol ri Eleazar, y rumam kan ri Aarón, ri nisamej rik'in ri káxa. Y xkik'utuj chik k'a chire ri Jehová wi utz yebe chik jun bey richin nibekibana' oyowal kik'in ri aj-Benjamín ri e kach'alal. Y ri Jehová xubij chike chi kebe chik jun bey, roma pa rox q'ij xkerujech ri aj-Benjamín pa kiq'a'.

Deut 31:26

Tiyaka' k'a re wuj re', ri richin ri pixa' chuxikin ri káxa ri richin ri rujikibel-tzij ri Jehová ri qa-Dios; y tik'oje' k'a chiri' richin chi jari' ri q'alajirisabel pan iwi' rix chire ri man ja ta ye'iben.

Wuj Richin ri Q'axanri'il 10:33

Y keri' k'a rubanik toq rije' xkiya' kan ri juyu' richin ri Jehová y oxi' k'a q'ij ri xebiyin y kan ja ri káxa ri richin ri rujikibel-tzij ri Jehová ri ik'owineq chikiwech rije' y nuk'utula' k'a chikiwech ri akuchi utz chi ye'uxlan-wi.

Ex 15:20

Y jak'a ri María, ri q'alajirisey ruch'abel ri Dios, ri rana' ri Aarón, xuchop jun q'ojom rubini'an pandero, richin xubixaj rubi' ri Dios. Y konojel k'a ri ixoqi' xkitzeqelibej-el y rije' kik'ualon chuqa' ki-pandero y yetzopiyaj ri yebixan.

1 Crón 17:1

Y toq ri David k'o chik chupan ri k'ak'a' rachoch, jari' toq xubij chire ri Natán ri q'alajirisey ruch'abel ri Dios: Wakami yin ink'o pa jun utzilej jay ri kan rik'in tiox-che' banon-wi. Jak'a ri káxa richin ri rujikibel-tzij ri Dios xa pa jun ok ti jay banon rik'in tzieq ri k'o-wi, xcha'.

Wuj Richin ri Josúe 4:7

jari' toq xtikibij chike: Toq ri káxa ri akuchi beneq-wi ri rujikibel-tzij ri Dios xapon chuchi' ri raqen-ya', jari' toq xch'aratej ri raqen-ya' Jordán, xkecha'. Y kan keri' k'a xtiben, roma ri' re jun molaj abej re' xtik'atzin richin natabel chike ri iwiy-imam richin q'asen, xcha' ri Josué.

1 Crón 15:28

Keri' k'a konojel ri aj-Israel yekikot kik'uan ri káxa richin ri rujikibel-tzij ri Jehová; y nikireq k'a kichi' roma kikoten. Chuqa' nikixupuj ri trompeta y ri uk'a'; y nikiq'ojomaj ri platillo, ri salterio, y ri arpa.