1 Crón 14:11 - Kaqchiquel Bible

¹¹ Xejote' k'a el pa Baal-perasim, y chiri' xeruch'ek-wi kan. Roma ri' ri David xubij: Kan achi'el jun raqen-ya' toq nujeq-el rubey, kan keri' xuben ri Dios wik'in; kan xujeq nubey chikiwech ri e etzelanel wichin, xcha'. Y roma ri' xubini'aj kan ri chiri' Baal-perasim.*f7*

1 Crón 14:11 ပူးပေါင်းရင်းမြစ်များ

Wuj Richin ri Isaías 28:21

Ri Jehová kan xtiyakatej achi'el xuben chiri' pa juyu' Perasim; kan xtuben achi'el toq xyakatej royowal pa taq'aj richin Gabaón. Xtuben jun samaj ri kan man jun bey tz'eton.

Ex 14:28

Toq ri ya' ri' xutz'apej-ri', kan xqaqa-wi pa kiwi' ri carruaje, ri kiej y pa kiwi' ri aj-labal ri e richin ri rey ri xe'ok-apo chikij ri israelita chupan ri Kaqa-Palou y kan man jun k'a chike rije' ri xkolotej ta kan.

San Mateo 7:27

Xqaqa k'a job, xpe k'a raqen taq ya' y ri kaq'iq' xberupaxij-ri' chirij ri jay; y ri jay ri' xa xtzaq; y xwuluwu' jumul roma xa man jikil ta ri ruxe', xcha' ri Jesús.

Wuj Richin Bix Chire ri Dios 144:10

Rat Jehová, ri yaya'on ch'akonik chike ri e rey. Rat ri xakolon richin ri David ri asamajel chuwech ri espada.

Wuj Richin ri Achin Job 30:14

Xe'ok k'a pe k'a re akuchi ink'o-wi, achi'el xa ta xkiteq'uj-pe jun wopol chire ri wachoch, kan e yakatajineq k'a chuwij rik'in kuchuq'a'.

2 Sam 5:20

Y ri David kan xyakatej k'a el chikij, y xeruch'ek k'a. Y rija' xubij k'a: Ri Jehová kan xerumes k'a el ri ye'etzelan wichin achi'el nuben jun nimalej raqen-ya' ri nuqirirej-el ronojel, xcha'. Y roma ri' chiri' xubini'aj Baal-perasim.*f4*

Wuj Richin Bix Chire ri Dios 144:1

Nimalej ruq'ij ri Jehová, ri nuto'onel; ri kan nuben chuwe richin yitikir ninben oyowal.

Wuj Richin Bix Chire ri Dios 44:3

Rije', man roma ta ri kikamisabal xe'ok kan chuwech ri ruwach'ulew ri', ni man ja ta ri kuchuq'a' rije' ri xekolo. Kan ja ri awijkiq'a' y ri asaqil rat kik'in rije' ri xbanon chike chi xech'akon, Kere' xaben kik'in roma kan xeqa' chawech.

1 Crón 14:10

Y roma ri' ri David xuk'utuj chire ri Dios, y xubij: ¿Utz kami yinel-el chubanik oyowal kik'in ri aj-Filistea? ¿Kan xke'ajech kami pa nuq'a'?, xcha'. Y ri Jehová xubij chire chi tibe y kan xkerujech pa ruq'a'.

1 Crón 14:12

Chirij ri' ri aj-Filistea xekimalij kan ri ruwachibel ri ki-dios rije' y ri David xuteq kiporoxik.