1 Crón 11:3 - Kaqchiquel Bible

³ Toq konojel k'a ri achi'a' ri k'o kiq'ij richin ri tinamit Israel xebe y xech'on rik'in ri David pan Hebrón, jari' toq rija' kan xuben jun jikibel-tzij kik'in, y kan chuwech ri Dios xuben-wi. K'ari' rije' xkiqasaj aceite pa ruwi' ri David richin xok kan rey pa ruwi' ri Israel, achi'el ri ch'abel ri rubin kan ri Dios chire ri Samuel.

1 Crón 11:3 ပူးပေါင်းရင်းမြစ်များ

1 Sam 16:1

Chirij re' ri Jehová xubij k'a chire ri Samuel: ¿K'a jampe' k'a yatane' chi oq'ej chirij ri Saúl? Roma ja yin ri xibin chire chi man rey ta chik pa ruwi' ri Israel. Wakami tanojisaj k'a ri uk'a' rik'in aceite y xkabe rik'in ri Isaí aj-Belén, roma jun chike ri ruk'ajol rija' nucha'on richin nibe'ok rey, xcha'.

2 Sam 5:3

Chuqa' xepe k'a konojel ri aj-raqen richin ri Israel rik'in ri David pan Hebrón. Y ri David xujikiba' k'a rutzij chuwech ri Jehová y chikiwech rije'. Y xkiqasaj k'a aceite pa ruwi' richin xok kan rey richin chijun Israel.

2 Sam 2:4

Y xeri' xe'apon k'a ri e aj-raqen richin ri Judá rik'in ri David richin xbekiqasaj aceite pa ruwi' richin xok kan rey. Chirij ri' xtzijox chire ri David chi ja ri achi'a' aj-Jabés ri richin Galaad ri xebanon utzil richin xkimuq ri Saúl.

1 Sam 16:3

Y toq xtasuj ri kamelabel ri' tawoyoj ri Isaí, y yin xtink'ut chawech ri k'o chi naben. Y ri xtink'ut chawech yin, pa ruwi' ri' xtaqasaj ri aceite, xcha' ri Jehová.

2 Crón 23:3

Ri janila chi winaqi' ri xe'apon, xkimol-ki' chiri' pa rachoch ri Jehová, richin xkijikiba' kitzij rik'in ri Joás ri ruk'ajol kan ri rey. Jari' toq ri Joiadá xubij chike: Jare' k'a ri ruk'ajol kan ri rey, y ja rija' k'a xtibeq'aton-tzij pa qawi' achi'el ri rubin kan ri Jehová pa kiwi' ri e rijatzul kan ri David.

2 Rey 23:30

K'ari' ri rusamajela' ri Josías xkiya-el pa jun carruaje y xkik'uaj-el pa Jerusalem. Xkimuq kan chiri' ri akuchi rubanon chik kan rutzil rija'. Y ri winaqi' aj-Judá xbekik'ama-pe ri Joacaz ri ruk'ajol kan, y xkiya' aceite pa ruwi' y xkiben rey chire pa ruk'exel ri rutata'.

2 Rey 11:17

K'ari' ri sacerdote Joiadá xuben jun jikibel-tzij chuwech ri Jehová, y chuwech ri rey y ri winaqi' richin ri tinamit, richin chi rije' nikitzeqelibej ri Jehová. Chuqa' xuben chi ri rey y ri tinamit xjunamatej-kiwech.

1 Sam 28:17

Rija' xuben achi'el ri xinq'alajirisaj chawe, roma ri Jehová xrelesaj ri q'atbel-tzij pan aq'a', y xuya' yan pa ruq'a' ri David ri awachibil.

1 Sam 23:18

Chi e ka'i' xkiben jun jikibel-tzij chuwech ri Jehová, y ri Jonatán xtzolej chirachoch. Jak'a ri David xk'oje' kan chiri' pa k'echelaj.

1 Sam 15:28

K'ari' ri Samuel xubij: Ri Jehová xtrelesaj-el ri q'atbel-tzij pan aq'a' achi'el xretzetej ri nutziaq yin, y xtuya' k'a chire jun chik qawinaq ri más utz chawech rat.

1 Sam 11:15

Chijun k'a tinamit Israel xebe pa Guilgal, y chiri' xkijikiba-wi ri ruq'atbal-tzij ri Saúl. Y konojel k'a ri winaqi' xenimaq'ijun chuwech ri Jehová chiri' pa Guilgal y xekisuj k'a sipanik richin nuq'alajirisaj chi junan kiwech rik'in ri Jehová. Y ri Saúl janila xkikot y keri' chuqa' konojel israelita.

Wuj Kichin ri To'onela' 11:11

Jari' ri Jefté xpe kik'in ri achi'a' ri k'o kiq'ij richin Galaad, y xukamuluj rubixik chuwech ri Jehová chiri' chunaqaj ri Mispá, ronojel ri ruch'abel ri rubin-pe chike rije'. Y ri winaqi' e richin ri ruwach'ulew ri' xkiben chi xok aj-raqen pa ruwi' ri tinamit, y chuqa' pa kiwi' ri aj-labal.

2 Sam 5:5

Wuqu' juna' rik'in nik'aj xq'aton-tzij pa ruwi' ri Judá chiri' pan Hebrón. Y juwineq oxlajuj juna' xq'aton-tzij pa ruwi' chijun ruwach'ulew Israel chiri' pa Jerusalem.

1 Crón 11:10

Ja achi'a' re' ri k'o más kiq'ij, ri ek'o pa kiwi' ri aj-labal ri maneq xibinri'il chikiwech; y rije' xeto'on richin ri David chupan ri ruq'atbal-tzij. Xjunamatej k'a kiwech kik'in ri ch'aqa' chik israelita richin chi ri David xok kan rey, achi'el ri rubin-pe ri Jehová chire ri tinamit Israel.