1 John 3:2 - Korafe-Yegha

² Nanda nano namendi, namonde oroko God da sasingu edo irera. Avata sifo gombuda, namonde kau mavega arera ava, namonde jo kasama e gogoghombae irera. Avata dabako kasama erera amo, eviri. Keriso jovereghe furarira ainda sifoda, nu kau mavega, ava fuge gido, namonde kau numongo ava edo irarera.

God da geka seka

² Nanda nano namendi, namonde oroko God da sasingu edo irera. Avata sifo gombuda, namonde kau mavega arera ava, namonde jo kasama e gogoghombae irera. Avata dabako kasama erera amo, eviri. Keriso jovereghe furarira ainda sifoda, nu kau mavega, ava fuge gido, namonde kau numongo ava edo irarera.

1 John 3:2 ပူးပေါင်းရင်းမြစ်များ

Matthew 5:8

“Evetu genembo mave enda eminda irise, nenda dubo joká simbugedo, kotari eveva avanembo kotise irá gheraera amo, ne ivugaghae iraeteri. Ainda beká mo: sifo amboda, ne ya God da dombu garera.

Luke 17:30

Kau daba aminga ava ururoro, Evetu Genembo da Koro+ foa buvudo isagha arira.

Luke 20:36

Ne aneya da kau avavaga irarera, jo ambae arera.

John 1:12

Avata mave, nundae nati joká doruse nu tumondusera amo, God da sasingu aore dae sedo, nemokena fakina futusira.

John 11:52

Kotugo, nu jo Jusi embo nesuka nendae sedo, ambae arira. Numo, evetu genembo mendeni God tumonduse nunda sasingu edo irarera ava, bu tatari dabako aoro dae sedo, nu ambarira. Ava ari sirorare dae sise, God setiri Caiaphas Iesu da ambari aindae, osa setiri ne nininguseri.

John 17:24

“Afa, ni evetu genembo namokena futusesa aindae resena. Na uju erena amo, na vasa reda irarena, vasa daba aminda, ne namonde dabade iraeteri. Irise, ne nanda duro a usasa ava gosuse iroro dae, uju erena. Duro a usasa amo, ni enda jo ae irise ainda gitida, na dubo ruruse namokena futusesa, ava gosuse iroro dae uju erena.

Rome Embokena 8:16

God da Asisi, nu namonde sonembeari namondeda dubo jokáda kasama eraera amo, namonde nunda sasinguri.

Rome Embokena 8:18

Na erekotena: namonde enda eminda irise mema itatameraera amo, kitako bekári. O, God sari namonde amboda usasa jokáda fefeturoro duro arira amo, teria bekári. Jo mema endada itatameraera ainghae dabade, inono ari da kaugo iraeri.

Rome Embokena 8:19

Eregoseva: utu, enda, a roera isambu God etiri sirorusira amo, mema tafuse aoro sise irira. Kau evetu mandi sasingu fumbari dae use mema tamburaira aminga ava, mema tafuse aoro sise irira. Ainda beká mo: God setiri, utu, enda, a roera isambu eko use jaghudo refira. Jo roera setena aimi, uju use eko ae usira. God nune setiri amingusira. Avata roera setena aimi, God nunda sasingu ijugari isagha arera ainda sifo, ava gigituse irira. God sari nunda sasingu ambarida ghe jebugedo erarera da sifo ava gigituse irira. Gigituse irira ainda beká mo: kau God da sasingu nenda tamo enda eminda kae budo amburaera ava kosughe dodo, ambarida ghe jebugedo tamo evovodae irari ava barera aminga ava, utu enda God setiri jaghudo refira evia, udo ya kau eni edo evovodae irarira. Avata oroko mo, utu enda aoro sise irira.

Rome Embokena 8:29

God evetu genembo gategusira setena amo, ne jo sirorae irero, nu anakora ne kasama use, nunda Mandi da kau aminga ava aoro dae sedo, ne gategusira. Ainda tuka mo: God da ujuimi, nunda Mandi evetu genembo digari ainda koro ava nune aeti.

1 Corinth Embokena 13:12

Kau namonde sasingako irise edo ghusera, aminga ava, oroko namonde God da dangio mo, tumba jokáda garigo garigo eraera. Avata sifo amboda diti basari, nu namonde, dombu minonde minonde garera. Ainda beká mo: namonde oroko God itako kasama arigerera avata, namondeda kasama tufakori, jo inono iraeri. Avori, oroko mo, God nu namonde kasama e gogoghombuse irira. Kau daba ava, amboda namonde nu kasama e gogoghombarera.

1 Corinth Embokena 15:49

Oroko namonde, Adam giti endada sirorusira, ainda tamo da kaugo ava asugedo irera. Kau daba aminga ava, Genembo utuda ghe vose fusira ainda tamo da kaugo ava, namonde amboda asugedo irarera.

1 Corinth Embokena 2:9

Avata kotugo, God da Geka dubo kotari aindae sise, eminge resira: “Evetu genembo mave God dubo buraera aindae sise, God roera evevago esimbugusira. Roera resena emo, jo evetu genembo eniimi ditii gido kasama aeri, a ainda binó jo dengoroi ningido kasama aeri, a kotugo dubo jokáda itako jo sirorari kotaeri.”

2 Corinth Embokena 3:18

Ava sedo, namonde isambu Bajaride dabade tatedo, munju afigedo Bajari da duro ava tataseguse irera. Namonde aminguse iroro, Bajari da Asisi duro daba aimi budo, namondeda dubo jokáda saramana ururari, namonde nunda fakinaimi kau numongo ava eraera. Kau dombu gari da ititu ijii gayari ainda usasa giraera aminga ava, namonde numo gosuse, kau numongo ava use, nunda duro ava ijugeraera. Duro amo jo dadabae arira, nu baji teriago arira.

2 Corinth Embokena 4:17

Amo, namane oroko sifo tufako einda jokáda, bouvu fufuse mema itatameraera da beká mo: namanenda dubo joká nange kau ari, namane duro evovodae irari ava baetera aindae, God seari mema itatameraera. Namanenda bouvu a mema kitakori. O duro amo, teriago bekári.

Galesia Embokena 3:26

Amo, ne tumonduse Iesu Keriso de dabade tatedo, God da sasingu edo ireva.

Galesia Embokena 4:6

A ne nunda sasingu useva, ava ijugari dae sedo, God nunda Mandi da Asisi nemokena futusira. Mutiri ruruseva ainda fakinaimi, ne God dae javono gatise, “Eri, Afa, Afako!” sise irá gheraeva.

Filipai Embokena 3:21

Nu fakina rurusira aimi, nune sari roera isasambu nunda sari ningari edo irarira. Amboda nu foama, fakina daba aimi, nune sari namondeda tamo betisira evia jovereghedo, kau nunda tamo durode aminga ava arira.

Kolosi Embokena 3:4

Avori, nenda jebuga beká mo, Keriso numori. Nu jovereghe foa isagha arira amo, nemonde dabade nunda duro a usasa ainda jokáda fetareva.

2 Peter 1:4

A kotugo, nunda fakina futuse, nu joba teria a evevago, anakora beka gagojuse mutari dae sisira, ava futusira. Joba futusira da beká mo eviri. Evetu genembo endada irise guguadae teria futo dighighi use aimi, nenda dubo joká bebeta eraera ava, darigaoro dae sedo, nunda joba a fakina namondekena mutiri ruruseri. A kotugo, nu namonde dabade tatedo, nunda kaugo ava aoro dae sedo, amingusira.

1 John 2:28

Avori, nanda sasingu, sekago eminge resena. Erá nunda furari da sifo aminda meka geove dae sise, Keriso de dabade tatedo, tumo fainghevu!

1 John 2:7

Nanda kokomana, na ne dubo ererurena. Na rea oroko aovo dae resena emo, jo agho dari seka iraeri. Ne anakora tuturoda ningido ghusevu.

1 John 3:1

Kote givu! God Afa da dubo bari namondekena mo, tomanako bekári! Nunda dubo bari namondekena ijuguse, namonde nunda sasingudae bari sisira. Sisira ava, beká siroretiri namonde nunda sasingu edo irera. Evetu genembo fisi da uju use irera, ne God a nunda irari ava jo kasama ae irera. Aindae sedo, ne namonde a namondeda irari barago, jo kasama ae eraera.

1 John 3:10

God da sasingu mavejori, kotugo Satan da sasingu mavejori, ava nange kasama areri? Amo kau evavagori! Evetu genembo mave ari ekoko use irarera, o nenda nano namendi imboe use irarera amo, ne jo God da sasingu iraeri.

1 John 3:21

O namondeda dubo jokáda, ari eko eni jo itatamae arera amo, namonde fakina edo, God da dombuda fete gogoghombarera.

1 John 5:1

God Genembo dirigari furare dae sisira amo, Iesu ri. Geka ava, mave tumonderaira amo, nu God da mandi o gagara edo irira. A mave genembo eni ava dubo barira amo, nu genembo ainda sasingu barago dubo barira.

Amboda Sirorarira 2:28

A eni mo: na numokena sifo da saura ainda usasa ava mutono barira.

Amboda Sirorarira 22:4

Ne God da dombu ava, nene gosuse irarera, a nunda javo nenda dombuda gembari irarira.