Sră Ôse 3:4 - Sră Goh 2018

⁴ Bơh làng bol Israel rơp kis jŏ ngai mơ ò gơs bơtau, ò gơs kwang at bồ, ò gơs phan ơn duh khoai, ò gơs cơnòng duh khoai, ò gơs ephot, mơ kung ò gơs theraphim.

Sră Ôse 3:4 ပူးပေါင်းရင်းမြစ်များ

Sơnròp Gơlik Gơs 31:19

Tòm tŭ Laban neh lòt siat sơnò ală belàt khai dê, gen Racel kơñau rùp duh khoai bơh tòm hìu bèp khai.

Sơnròp Gơlik Gơs 31:34

Racel neh ai ală rùp duh khoai hơ̆ mơ pồn tòm tiah ừn làkđa mơ nggui hơđang. Laban jòi nền tòm sàl mơ ò gŏ gơ.

Sơnròp Gơlik Gơs 49:10

Gai gơnap gơnoar bơtau dê ò gơtă bơh di Juda, Gai jra cau at bồ ò ngài bơh di jơng khai, Tus di tŭ Bơtau Silô tus, Mơ ală làng bol dòn duh Kơnràñ.

II Samuel 6:14

Dabit tòmya di đap Yàng Jehôwa jơh nùs jơh pràn; Dabit soh dô nơm ephot mơ bài che dơmài lơbơn.

II Ală Bơtau 23:24

Jôsia kung tơnroh ală cau gru bơjơu, ală cau sền dà, mơ ală rùp ràk cù kìr tòm Juda mơ tòm Jerusalem, nàng lơh jat ală bơta boh lam neh cih tòm sră mơ cau gơnoar ơn phan duh khoai Hilkia neh jòi bàn tòm hìu duh khoai Yàng Jehôwa dê.

II Yal Yau 15:2

Khai lik lòt tòm mat mơ bơtau Asa mơ đơs lah: “Ơ bơtau Asa mơ jơh bol mê la ală cau Juda mơ Benjamin, iat tĕ añ. Yàng Jehôwa ơm bal mơ bol mê tòm tŭ bol mê ơm mơ Kơnràñ. Dilah bol mê jòi jat Kơnràñ, bol mê rơp jòi bàn Kơnràñ, mơya dilah bol mê sang lòi Kơnràñ, gen Kơnràñ rơp sang lòi bol mê.

Lik Ejiptơ 28:4

Do la ală ồi ào mơ bol khai rơp lơh gơs: dô pang ồi dềt kơt ntơh, dô nơm ephot, dô blah ào jrùh, dô blah ào soh dơlam, dô nơm sơgơn mơ dô nơm che kơt but. Bol khai rơp lơh gơs ală ồi ào ơn is sàng goh hơ̆ Arôn bi mê in, bal mơ ală kòn klau khai dê nàng lơh gơs cau gơnoar ơn phan duh khoai duh broă Añ.

Lik Ejiptơ 28:6

Lơh tĕ ephot mơ che màh, bal mơ che brài dà tơlir trồ, dà phồng, mơ bài che dơmài lơbơn tàñ hàng mơnĕ, la broă dô nă cau chài tàñ.

Ñìm Rac 2:9

Ală mpồng ƀòn dờng gơkram tòm ù; Kơnràñ neh tơnroh mơ dơrkă ală kai kal gơ dê. Cau bơtau mơ ală kwang at bồ gơ dê ơm digùl ală lơgar ò gơs bơta sơnio lam tai! Ală cau gơnoar hwơr ò dòp bơta tơnggŏ bơh Yàng Jehôwa.

Ejekiel 19:14

Ồs neh lik bơh di ală ntê dờng gơ dê, mơ neh sa pơrguc ală ntê mơ plai gơ dê. Gen tàng ò gơs dô nơm ntê pràn kơldang gam wơl, ò gơs gai gơnoar at bồ. Hơ̆ la dô jơnau ñìm rac geh ngui nàng ñìm rac pơt wòl.”

Ejekiel 20:32

Gơs bơta lơi bol mê kơlôi tòm dơngoh rơp ò gơlik gơs, bol mê đơs lah: “Lòi bol hi gơlik ndròm be ală lơgar mơ ală làng bol tòm dunnia duh khoai chi mơ lŭ.”’

Ejekiel 21:21

Bơh cau bơtau Babilôn rơp ơm dơh wơl di tiah jơnum ală gùng hơ̆ dê, di sơnah bàr nơm gùng hơ̆ nàng sền dà. Bơtau hơ̆ rơp ai kam tă khà; khai rơp hòi lùp ală yàng rùp ràk khai dê, khai rơp sền sơwì klòm ală phan ơn.

Ejekiel 21:31

Añ rơp tuh bơta gơjrañ dờng Añ jê hơđang bol mê mơ khồm ồs bơta gơjrañ Añ jê hơđang bol mê, Añ rơp jào phi bol mê tòm tê ală cau iơh rmơh ngan, jak chài tòm bơta tơnroh.

Daniel 11:31

Mpồl ling khai sồr rơp lơh ƀơ̆ ƀơl tiah sàng goh mơ ƀòn dờng kơp gàr; ò ai ơn phan ơn chu kòp ngai, mơ bơtào bơta ngkòr ngkàc la bơta lơh gơlik gơs bơta tơnroh gơprah gơpring.

Daniel 12:11

Bơh tŭ tơngai pơndut phan ơn chu kòp ngai mơ bơtào gơs bơta ngkòr ngkàc lơh gơlik gơs bơta tơnroh gơprah gen rơp gơs dô rbô bàr rhiang sin jơt ngai.

Daniel 9:27

Khai rơp lơh kơ̆ nền dô bơta ho bal mơ oă cau tòm dô poh, mơya tus di nggùl poh, khai rơp pơndut jơh phan ơn duh khoai mơ phan ơn; mơ tòm tiah bol khai dê rơp gơlik bơta ngkòr ngkàc, bơta hơ̆ tơnggơs bơta tơnroh gơprah, jơl tus di bơta lồi dut neh lơh nền tuh hơđang cau lơh tơrlah tơrling.”

Sră Ôse 13:10

Tŭ do ntềng đah bơtau mê dê nàng khai dong tă mê taih? Ntềng đah ală cau kwang at bồ tòm jơh ală ƀòn dờng mê dê, nàng mê đơs mơ bol khai lah: “Ai tĕ añ in dô nă cau bơtau mơ ală cau kwang at bồ”?

Sră Ôse 13:11

Behơ̆ tòm bơta gơjrañ Añ jê, Añ ai mê in dô nă bơtau, mơ tòm bơta gơjrañ dờng Añ jê, Añ tă tơlik cau bơtau hơ̆.

Sră Ôse 2:11

Añ rơp pơndut jơh ală bơta pơjum chò hòp khai dê, ală ngai pơjum sa kòp nam, ală ngai Dùl lik, ală ngai Saƀat, mơ jơh ală ngai pơjum sa ndai jat be neh lơh nền.

Lebi 8:7

Khai tơnsoh ào dơlam Arôn in, kơt che but khai in, tơnsoh khai in ào jrùh mơ ơn ephot di khai. Môise kung kơt ephot di Arôn mơ che kơt ntơh neh tàñ hàng mơnĕ ngan.

Sacari 10:2

Tài bơh ală rùp ràk đơs bơta blac pơrlồm. Ală cau sền dà gŏ bơta gơtơnggŏ ma blac; bol khai yal bơta mpau ò song, mơ ai bơta pơndòm pơniang ò kwơ. Behơ̆ tàng làng bol nrah nring kung be belàt, kong rồn bơklơn tài bơh ò gơs cau ê.

Sacari 13:2

Yàng Jehôwa Gơnap Gơnoar Dờng Làm Jơh đơs lah: “Tòm ngai hơ̆, Añ rơp tă sang sơnđan ală rùp ràk bơh di lơgar, cau rơp ò tai kah bol gơ. Añ rơp tă tơlik ală cau gơnoar hwơr mơ hwềng bơta ƀơ̆ ƀơl bơh di lơgar.

Luka 21:24

Bol khai rơp gơplơ̆ hơđơm mat đào, gơkòl cau kup lơh dĭ digùl jơh ală làng bol, Jerusalem rơp gơkòl ală làng bol bơdìh jă trơm jơl tus di ală tŭ tơngai làng bol bơdìh dê geh wil tơl.

Jang 19:15

Bol khai driau dờng lah: “Tơnroh tĕ khai, tơnroh tĕ khai! Pơng tĕ khai di chi pơng!” Pilat đơs mơ bol khai lah: “Añ rơp pơng bơtau bol mê di chi pơng ơ?” Ală cau gơnoar lam bồ ơn phan duh khoai ho lah: “Bol hi ò gơs bơtau ndai tai rlau mơ Sesa.”

Hebrơ 10:26

Bơh dilah tơnơ̆ mơ tŭ bol he neh dòp git jơnau song rau, mơ kư̆ lơh nền tìs glài jat nùs kòñ is, gen ò gam gơs phan ơn tơwài glài tai,

Ală Kwang Cahrña 17:5

Gen hìu Mika gơlik dô nơm bơmồng, mơ khai lơh dô nơm Ephot mơ ală rùp ràk, mơ bơtào dô nă tòm ală kòn klau khai dê lơh gơs cau gơnoar ơn phan duh khoai.

Ală Kwang Cahrña 18:14

Gen pram nă cau klau neh lòt sền rwang ù tiah Lais đơs mơ oh mi bol khai dê lah: “Oh mi git la tòm ală hìu do gơs dô nơm Ephot, rùp ràk ală yàng ndai tòm hìu, dô nơm rùp pac sềr, mơ dô nơm rùp tŏ sơl ơ? Tŭ do oh mi git bơta lơi pal lơh.”

Ală Kwang Cahrña 8:27

Gideôn ai phan hơ̆ lơh dô nơm Ephot, ơn gơtòm Ôphra, ƀòn khai dê. Tềng hơ̆ jơh Israel duh khoai gơ, mơ gơ gơlik gơs dô nơm dă Gideôn mơ hìu nhă khai in.

I Samuel 14:3

Tòm hơ̆ kung gơs dô nă cau soh ephot sơnđan la Ahija kòn klau Ahitup bi klau Ikabôt, la kòn klau Phineas, sau Heli, cau gơnoar ơn phan duh khoai Yàng Jehôwa dê tòm Silô. Ò gơs cau lơi git la Jônathan neh lik lòt.

I Samuel 15:23

Bơta tòmdră la kung be tồi glài juh proh, bơta kơldang bồ la iơh kung be bơta duh rùp ràk. Tài bơh mê neh sang lòi jơnau Yàng Jehôwa dê, gen Kơnràñ kung neh sang lòi mê, ò ai mê gơs bơtau at bồ tai.”

I Samuel 2:18

Samuel duh broă di đap Yàng Jehôwa; khai la dô nă kơnòm klau soh dô nơm Ephot mơ bài che dơmài lơbơn.

I Samuel 21:9

Cau gơnoar ơn phan duh khoai ho lah: “Tềng do gơs đào Gôliat dê la cau Philistin mơ ồng neh tơnchơt tòm thòng Elah, gơ geh pùt mơ bài ơn đah ngkòi ephot. Dilah ồng kòñ ngui gơ gen ai tĕ; tềng do ò gơs đào lơi ndai rlau mơ gơ.” Dabit đơs lah: “Ò gơs đào lơi ndai ndròm be gơ, ai tĕ gơ añ in.”

I Samuel 22:18

Gen cau bơtau ai jơnau sồr Dôek mơ đơs lah: “Mê wèt mơ tơnchơt tĕ ală cau gơnoar ơn phan duh khoai hơ̆.” Behơ̆ Dôek cau Edôm wèt mơ tơnchơt ală cau gơnoar ơn phan duh khoai. Tòm ngai hơ̆ khai tơnchơt phàm jơt pram nă cau soh ephot lơh mơ bài che dơmài.

I Samuel 23:6

Tòm tŭ Abiatha kòn klau Ahimelek dô pleh tus hơ Dabit tòm Keila, khai neh cèng bal dô nơm ephot tòm tê khai dê.

I Samuel 23:9

Tòm tŭ Dabit git Sol neh bơtào kai gơrmơ̆i iơh nàng tòmdră mơ khai, gen khai đơs mơ cau gơnoar ơn phan duh khoai Abiatha lah: “Cèng tĕ ephot hơ do!”

I Samuel 30:7

Gen Dabit đơs mơ Abiatha cau gơnoar ơn phan duh khoai, kòn klau Ahimelek lah: “Cèng tĕ ephot añ in.” Behơ̆ Abiatha cèng ephot Dabit in.