Sră Age 2:4 - Sră Goh 2018

⁴ ‘Mơya tŭ do, ơ Jerubabel, khin cha tĕ!’ Yàng Jehôwa đơs behơ̆. ‘Ơ Jôsua, kòn klau Jehôjadak, cau gơnoar dờng lam bồ ơn phan duh khoai, khin cha tĕ!’ Yàng Jehôwa đơs behơ̆. ‘Jơh làng bol tòm lơgar, khin cha tĕ mơ lơh broă. Bơh Añ ơm bal mơ bol mê,’ Yàng Jehôwa Gơnap Gơnoar Dờng Làm Jơh đơs behơ̆.

Sră Age 2:4 ပူးပေါင်းရင်းမြစ်များ

II Samuel 5:10

Mơ Dabit sơlo ơm sơlo pràn rlau, tài bơh Jehôwa la Yàng Tom Trồ Gơnap Gơnoar Hơđang Jơh ơm bal mơ khai.

I Yal Yau 22:13

Gen kòn rơp geh bơtoah bơtoài dilah kòn kơrhia lơh jat ală jơnau sồr mơ bơta boh lam mơ Yàng Jehôwa neh kơnòm di Môise ai Israel in. Lơh tĕ pràn kơldang mơ khin cha. Bañ rngòt mơ bañ gơplơ̆ nùs.

I Yal Yau 28:20

Dabit kung đơs mơ Salômôn kòn klau khai dê lah: “Lơh tĕ pràn kơldang mơ khin cha, mơ lơh broă. Bañ rngòt mơ gơplơ̆ nùs bơh Jehôwa Yàng Tom Trồ la Yàng Tom Trồ añ jê, ơm bal mơ kòn. Kơnràñ rơp ò sang, ò lòi kòn jơl tus di tŭ jơh ală broă bơt bơtào hìu duh khoai Yàng Jehôwa dê neh sir.

Ejra 10:18

Digùl ală kòn sau ală cau gơnoar ơn phan duh khoai dê, ală cau tơnơ̆ do neh bau mơ cau ùr làng bơdìh: Bơh di ală kòn sau mpồl Jôsua kòn klau Jôjadak mơ ală oh mi khai dê: Maaseyah, Eliejer, Jarip mơ Gedalia.

Ejra 5:2

Gen Jerubabel kòn klau Sealthiel mơ Jesua kòn klau Jôjadak lik lòt nàng bơt wơl hìu Yàng Tom Trồ dê tòm Jerusalem; bal mơ bol khai gơs ală cau gơnoar hwơr Yàng Tom Trồ dê dong kòl bol khai.

Lik Ejiptơ 3:12

Yàng Tom Trồ đơs lah: “Añ rơp ơm bal mơ mê. Do rơp la tềl ai mê in nàng git lah Añ la Bơtau neh sồr mê lòt: Tòm tŭ mê neh lam làng bol lik klàs bơh di lơgar Ejiptơ rau, bol mê rơp duh khoai Yàng Tom Trồ hơđang mơnơm do”.

Sră Age 1:13

Gen Age, cau kong sồr Yàng Jehôwa dê, bơto yal làng bol in jơnau sồr Yàng Jehôwa dê, lah: “Añ ơm bal mơ bol mê,” Yàng Jehôwa đơs behơ̆.

Sacari 4:6

Behơ̆ khai đơs mơ añ lah: “Do la jơnau Yàng Jehôwa đơs mơ Jerubabel: ‘Hơ̆ ò di la bơh gơnoar pràn, kung ò di la bơh gơnap gơnoar, mơya la bơh Hwềng Añ,’ Yàng Jehôwa Gơnap Gơnoar Dờng Làm Jơh đơs behơ̆.

Sacari 8:9

Yàng Jehôwa Gơnap Gơnoar Dờng Làm Jơh đơs be do: “Bol mê la ală cau pa do kơno ală jơnau hơ̆ bơh bơr ală cau gơnoar hwơr neh gơs mat tòm tŭ bơt bơtào wơl mơnàng hìu duh khoai, la hìu Yàng Jehôwa Gơnap Gơnoar Dờng Làm Jơh dê, lơh tĕ tê bol mê dê gơlik pràn kơldang.

Jơnau Niam Jat Mak 16:20

Ai ală cau bơtê lik lòt bơto yal Jơnau Niam làm bă tiah. Yàng lơh broă bal mơ bol khai, mơ ai ală tềl krơi jat bal nàng lơh kơ̆ cê Jơnau Yàng.]

Broă 7:9

Ală ồng pàng hơ̆ ƀoah gơjrañ di Jôsep, behơ̆ tàng tac khai hơ lơgar Ejiptơ; mơya Yàng Tom Trồ ơm bal mơ khai,

I Kôrintô 16:13

Oh mi drơng kơp tĕ, ơm kơ̆ tĕ tòm bơta dòn, lơh tĕ be cau dờng, mơ pràn kơldang tĕ.

Ephesô 6:10

Lồi tơnơ̆ wơl, oh mi gơs tĕ pràn kơldang tòm Yàng, mơ tòm gơnap gơnoar pràn kơldang Kơnràñ dê.

Yal Wơl 31:23

Yàng Jehôwa ai jơnau gơnoar sồr do Jôsue in kòn klau Nun dê mơ đơs lah: “Lơh tĕ pràn kơldang mơ khin cha bơh mê rơp cèng ală cau Israel mut tòm lơgar mơ Añ neh ho ai bol khai in, mơ Añ rơp ơm bal mơ mê.”

II Timôthe 2:1

Behơ̆ ơ kòn, pràn kơldang tĕ tòm bơta nđàc tòm Yàng Krist Jesu.

II Timôthe 4:17

Mơya Yàng neh ơm dô đah bal mơ añ mơ bơtơl pràn añ in, tồ bơh añ mơ Jơnau Niam geh bơto yal wil tơl, nàng jơh ală cau làng bol bơdìh geh kơno; behơ̆ añ neh geh dong tă bơh di bơr klìu triă.

Jôsue 1:6

Lơh tĕ pràn kơldang mơ khin cha, bơh mê rơp ơn làng bol do tòm lơgar Añ ai bol khai in lơh gơs sre brê jat be Añ neh srat să ho nền mơ ală ồng pàng bol khai dê.

Jôsue 1:9

Añ do neh ai jơnau gơnoar sồr mê in: Lơh tĕ pràn kơldang mơ khin cha. Bañ rơm să rngòt; bañ rngòt rngơt, bơh Jehôwa Yàng Tom Trồ mê dê rơp ơm bal mơ mê tiah lơi mê lòt.”

Ală Kwang Cahrña 2:18

Tŭ lơi Yàng Jehôwa bơtào tơngguh bol khai in dô nă cau kwang cahrña, Kơnràñ ơm bal mơ cau kwang cahrña hơ̆ tòm jơh rài kis khai dê nàng dong Israel lik bơh di tê cau sò tơm bol khai dê; bơh Yàng Jehôwa gơs nùs nđàc sơngit di bol khai tòm tŭ bol khai rơnđơh, bơh ală cau kup kơryan mơ rồn bơklơn bol khai.

I Samuel 16:18

Dô nă cau tòm mpồl cau duh broă ho lah: “Añ neh gŏ dô nă kòn klau Jese cau Betlehem git rơs kơñi. Khai la dô nă cau khin cha mơ la dô nă cau ling jak tòmlơh, git kơrhia tòm jơnau đơs, niam klau, mơ Yàng Jehôwa ơm bal mơ khai.”