Malaci 1:14 - Sră Goh 2018

¹⁴ “Pal srat sơntơm cau lơi in blac pơrlồm, la cau gơs tòm mpồl khai dê dô nơm phan poan jơng dam di pal mơ khai ho pơgon ơn gơ Yàng in, mơya khai ơn dô nơm phan poan jơng sồt rmàñ Yàng in!” Yàng Jehôwa Gơnap Gơnoar Dờng Làm Jơh đơs lah: “Bơh Añ la Bơtau Dờng, mơ sơnđan Añ la pal rngòt digùl ală làng bol.”

Malaci 1:14 ပူးပေါင်းရင်းမြစ်များ

Sơnròp Gơlik Gơs 27:12

Digơlan bèp rơp ƀư dê añ mơ đal git añ be cau pơrlồm gen añ rơp àñ bơta srat rma, ò di la geh bơta lơngai ò.”

II Samuel 24:24

Mơya bơtau ho wơl mơ Arauna lah: “Ò, añ rơp ai jền nàng blơi jơh ală phan hơ̆ bơh mê. Añ rơp ò ơn Jehôwa Yàng Tom Trồ añ jê phan ơn chu pơrguc mơ ò roh jền blơi.” Behơ̆ Dabit blơi làn jă kòi mơ ală kơnrồ mơ tơm pram jơt sieklơ priă.

Đơs Crih 102:16

Tòm tŭ Yàng Jehôwa rơp bơt bơtào Siôn, Gen Kơnràñ rơp tơlik mat tòm bơta gơklŏ Kơnràñ dê.

Đơs Crih 47:2

Bơh Yàng Jehôwa la Bơtau Hơđang Rlau Jơh, la Bơtau pal duh rngòt; Kơnràñ la Bơtau dờng at bồ hơđang làm jơh plai ù.

Đơs Crih 47:3

Kơnràñ lơh ală làng bol dòn duh bol hi, Mơ lơh ală lơgar dòn duh hơđơm jơng bol hi.

Đơs Crih 47:8

Yàng Tom Trồ at bồ ală lơgar, Yàng Tom Trồ nggui di sơbàn sàng goh Kơnràñ dê.

Đơs Crih 48:2

Mơnơm Siôn, jòng jơnhoa hàng mơnĕ ngan, Mơ la bơta hòn chò jơh ală cau in tòm làm plai ù, la tiah jơnhoa rlau jơh Saphôn dê, La ƀòn dờng Bơtau dờng rlau jơh dê,

Đơs Crih 68:35

Cau pal rngòt di Yàng Tom Trồ tòm tiah sàng goh Kơnràñ dê; Yàng Tom Trồ Israel dê la Bơtau ai gơnap gơnoar mơ pràn kơldang làng bol Kơnràñ in. Pal jòng ro Yàng Tom Trồ!

Đơs Crih 76:12

Kơnràñ tơnroh ală hwềng cau kwang at bồ dê, Ală cau bơtau tòm dunnia rngòt rơm să di đap Kơnràñ.

Đơs Crih 95:3

Bơh Jehôwa la Yàng Tom Trồ dờng ngan, Mơ la Bơtau dờng hơđang rlau jơh ală yàng.

Esai 57:15

Bơh Bơtau hơđang jòng rlau jơh, la Bơtau ơm tòm tiah gam sùm sùm, Sơnđan Kơnràñ la Bơtau Sàng Goh, đơs be do: “Añ ơm tòm dô bă tiah jơnhoa mơ sàng goh, mơya kung ơm mơ cau gơs nùs jê sồt gơjrañ sang glài mơ pơndêt să, nàng lơh pa wơl hwềng nùs cau pơndêt să, mơ lơh pa wơl nùs cau gơjrañ sang glài.

Jeremi 10:10

Mơya Yàng Jehôwa la Yàng Tom Trồ song ngan; Kơnràñ la Yàng Tom Trồ kis sùm, la Bơtau gam sùm sùm. Bơh bơta gơjrañ Kơnràñ dê ù gơlơnggơr, Ală làng bol ò jai kong bơta gơjrañ Kơnràñ dê.

Jeremi 46:18

Bơtau, sơnđan Kơnràñ la Yàng Jehôwa Gơnap Gơnoar đơs lah: “Ngan kung be Añ kis sùm, Cau sò tơm rơp tus, kung be mơnơm Thabôr ơm digùl ală mơnơm, kung be Karmel mpòl di gah dàlềng.

Jeremi 48:10

Pal srat sơntơm cau lơi lơh broă Yàng Jehôwa dô bă ma blac! Pal srat sơntơm cau lơi ò prap đào he bơh lơh gơtuh mhàm!

Jeremi 48:15

Môap kong phà tơnroh, ală ƀòn kong tòmpìt ai; cau pơnu jak rlau jơh gơ dê kong tơnchơt,” Bơtau, sơnđan Kơnràñ la Yàng Jehôwa Gơnap Gơnoar, đơs behơ̆.

Daniel 4:37

Tŭ do, añ la bơtau Nebukatnessar jòng ro, mơ yò tơngguh mơ lơh àng sơnđan Bơtau Hơđang Trồ; jơh ală broă Kơnràñ dê la song ngan: ală gùng dà Kơnràñ dê la song ring; mơ Kơnràñ rgơi tơmù liah cau lơi lòt tòm bơta pơnhừ să.

Daniel 9:4

Behơ̆, añ hòi dan mơ Jehôwa Yàng Tom Trồ añ jê, yal glài mơ đơs lah: “Ơ Yàng la Yàng Tom Trồ dờng rlau jơh mơ pal rơm să rngòt, Kơnràñ prap gàr jơnau ho bal tòm bơta kòñ gơboh kơ̆ dơn gơwèt hơ ală cau kòñ gơboh dê Kơnràñ mơ lơh jat ală bơta sồr lam Kơnràñ dê.

Sôphôni 2:11

Yàng Jehôwa rơp gơlik gơs bơta rngòt rngơt bol khai in; Kơnràñ rơp tơnroh jơh ală yàng tòm ù dê. Ală làng bol ơm di gah dàlềng mơ ală bồt pơlào, tòm lơgar bol khai dê, rơp duh khoai Kơnràñ.

Sacari 14:9

Yàng Jehôwa rơp lơh gơs bơtau at bồ jơh plai ù. Tòm ngai hơ̆ rơp gơs mìng dô Bơtau la Yàng Jehôwa lơm, mơ sơnđan Kơnràñ la sơnđan mìng dô sơnđan lơm.

Malaci 1:11

Bơh đah mattơngai lik jơl tus di đah mattơngai mut sơnđan Añ la dờng digùl ală lơgar, mơ kòp bă tiah gơs chu kơlhô ơn sơnđan Añ in, mơ dô nơm phan ơn sàng goh; Bơh sơnđan Añ la dờng digùl ală lơgar,” Yàng Jehôwa Gơnap Gơnoar Làm Jơh đơs behơ̆.

Malaci 1:8

Tòm tŭ bol mê cèng ală phan poan jơng jơngo mat lơh gơs phan ơn duh khoai, bơta hơ̆ la ò tìs sơl ơ? Tòm tŭ bol mê ơn ală phan poan jơng kwet gơlte hala kòp jê, bơta hơ̆ la ò tìs sơl ơ? Lòng ơn bol gơ cau kwang đơng lơgar mê in! Khai rơp niam nùs di mê hala khai rơp dòp phan mê sơl ơ?” Yàng Jehôwa Gơnap Gơnoar Dờng Làm Jơh đơs behơ̆.

Malaci 2:1

Mơ tŭ do, Ơ ală cau gơnoar ơn phan duh khoai, do la gơnoar sồr bol mê in.

Malaci 3:9

Bol mê kong srat sơntơm, jơh dô nơm làng bol bol mê dê, tài bơh bol mê neh sa kơñau bơh di Añ.

Mathiơ 24:51

Cau tòm rơp pù tac poac khai mơ tơmut khai bal mơ cau ma blac. Tềng hơ̆ rơp gơs ñìm rac mơ rkiat sề.”

Mathiơ 5:35

bañ sơnio tiah, bơh gơ la kơrnòl jơng Yàng Tom Trồ dê; bañ sơnio Jerusalem, bơh gơ la ƀòn dờng Bơtau dờng dê.

Jơnau Niam Jat Mak 14:8

Khai neh lơh bơta khai rgơi lơh, neh bong mơñà lài nàng rcang tơp să Añ.

Luka 12:46

Cau tòm khai rơp tus tòm ngai khai ò kơlôi mơ tòm jơ khai ò git, pù tac poac khai, mơ tơmut khai bal mơ cau ò dòn song.

II Kôrintô 8:12

Bơh dilah cau lơi gơs nùs kòñ ơn, gen phan ơn geh Yàng Tom Trồ dòp jat bơta he gơs, ò di jat bơta he ò gơs.

Yal Wơl 28:58

Dilah bol mê ò kơrhia lòt jat jơh ală jơnau bơta boh lam do, la jơnau neh cih tòm sră do, mơ ò ki ngàm di sơnđan gơklŏ mơ pal rngòt rngơt do, hơ̆ la Jehôwa Yàng Tom Trồ bol mê dê,

I Timôthe 6:15

la di di tơngai mơ Bơtau gơnoar dờng gơs mìng dô nă lơm mơ pal jòng ro rơp yal tơlik, la Bơtau ală bơtau dê, mơ Yàng ală yàng dê,

Hebrơ 12:29

bơh Yàng Tom Trồ bol he dê la be ồs chu pơrguc.

Yal Tơlik 15:4

Khoai Yàng, ñcau khin ò duh rngòt mơ ò jòng ro sơnđan Kơnràñ taih? Bơh mìng dô nă Kơnràñ la sang goh; Jơh ală làng bol rơp tus mơ duh khoai Kơnràñ, Bơh ală bơta cahrña song ring Kơnràñ dê neh geh yal tơlik.”

Yal Tơlik 21:8

Ai ală cau rngòt ò khin cha, ală cau ò gơs bơta dòn, ală cau ngkòr ngkàc, ală cau tơnchơt cau, ală cau rềs àr bơrnàn, ală cau bơjơu, ală cau duh rùp ràk, mơ jơh ală cau đơs blac, pơnah bol khai dê ơm tòm brong ồs hơng mơ siau, hơ̆ la bơta chơt dơ̆ bàr.”