Luka 9:33 - Sră Goh 2018

³³ Dơ̆ bàr nă cau hơ̆ guh rê bơh di Yàng Jesu, gen Pier đơs mơ Kơnràñ lah: “Ơ Kơnràñ, bol he ơm tềng do la niam ngan. Lòi bol hi lơh pe nơm sàl, dô nơm Kơnràñ in, dô nơm Môise in, mơ dô nơm Eli in.” Mơya khai ò git khai đơs jơnau lơi.

Luka 9:33 ပူးပေါင်းရင်းမြစ်များ

Đơs Crih 27:4

Añ neh dan mơ Yàng Jehôwa dô bơta, mơ rơp jòi jat bơta hơ̆; Hơ̆ la añ kòñ jơl jơh rài kis añ jê geh ơm tòm hìu Yàng Jehôwa, Nàng sền gŏ bơta hàng mơnĕ Yàng Jehôwa dê, Mơ jòi lùp tòm hìu duh khoai Kơnràñ dê.

Đơs Crih 73:28

Mơya đah mơ añ, niam añ in ơm rềp mơ Yàng Tom Trồ; Añ neh bơtào Yàng Jehôwa la tiah kìng crŭ añ jê, Nàng añ yal wơl bơh jơh ală broă Kơnràñ dê.

Mathiơ 17:14

Tòm tŭ Yàng Jesu mơ ală cau bơtê tus wơl hơ mpồl làng bol, gen gơs dô nă cau tus cùn gơltang di đap Kơnràñ mơ đơs lah:

Mathiơ 17:4

Gen Pier đơs mơ Yàng Jesu lah: “Ơ Yàng, bol he ơm tềng do niam ngan. Dilah Kơnràñ kòñ, gen añ rơp lơh pe nơm sàl tềng do: dô nơm Kơnràñ in, dô nơm Môise in mơ dô nơm Eli in.”

Jơnau Niam Jat Mak 10:38

Mơya Yàng Jesu ho lah: “Bol mê ò git bơta bol mê dan hơ̆. Bol mê rgơi hùc mơngàn mơ Añ hùc, mơ rgơi gơs ƀaptem mơ bơta ƀaptem Añ gơs sơl?”

Luka 5:5

Simôn đơs lah: “Ơ Kơnràñ, bol hi neh lơh broă bòl glar mang àng tơn, mơya ò geh dô nơm ka lơi! Bulah behơ̆, jat jơnau Kơnràñ añ rơp dang bơtơng tai.”

Luka 9:34

Tòm tŭ khai gam đơs, gơs dô puk mhwal jơm gòm bol khai; mơ tòm tŭ mut tòm puk mhwal hơ̆ gen bol khai rngòt rngơt.

Luka 9:49

Jang đơs lah: “Ơ Kơnràñ, bol hi neh gŏ dô nă cau ai sơnđan Kơnràñ nàng bơtrơh cà, gen bol hi bơkơŭ khai tài bơh khai ò lòt bal mơ bol he.”

Jang 14:8

Philip đơs lah: “Ơ Yàng, dan sơnio Bèp bol hi in, gen tơl rau.”

II Kôrintô 4:6

Bơh Yàng Tom Trồ la Bơtau neh đơs lah: “Bơta àng pal pơnđàng sòl tòm bơta klam jơngo,” kung neh pơnđàng sòl tòm nùs bol hi, nàng bơh bol hi mơ pơnđàng sòl bơta git wă bơh bơta gơklŏ Yàng Tom Trồ dê tòm muh mat Yàng Jesu Krist dê.