Lebi 27:30 - Sră Goh 2018

³⁰ Dô pơnah jơt bơh jơh ală phan gơlik gơs bơh di ù tiah, bulah la kòi mbo bơh di ù hala plai đo bơh di ală tòm chi, gơrê bal mơ Yàng Jehôwa; phan hơ̆ la sàng goh Yàng Jehôwa in.

Lebi 27:30 ပူးပေါင်းရင်းမြစ်များ

Sơnròp Gơlik Gơs 28:22

Pơnai lŭ mơ añ neh bơtào lơh jrong rơp la hìu Yàng Tom Trồ, mơ tòm jơh ală phan Kơnràñ rơp ai añ in, añ rơp ơn wơl dô pơnah jơt.”

Mathiơ 23:23

Bòl glar bol mê in, cau bơto bơta boh lam mơ cau Pharisi, la cau ma blac! Bơh bol mê ơn pơnah jơt tòm biap trau, biap ƀô mơ biap krồng, mơ sang lòi bơta dờng màng rlau tòm bơta boh lam, la bơta song ring bơta kòñ nđàc, mơ bơta dòn. Ală bơta do bol mê pal lơh, mơ kung ò di lơh ñhòt ală bơta ne sơl.

Nehemi 13:12

Gen jơh làng bol Juda cèng ơn kòi pơnah jơt, tơrnòm pa mơ mơñà tòm đam jàr.

Luka 18:12

Añ ơt sa bàr dơ̆ tòm dô poh, añ ơn dô pơnah jơt bơh jơh ală phan añ dòp geh.’

II Yal Yau 31:12

Gen bol khai dòn song cèng tơmut ală phan ơn, ală phan pơnah jơt mơ ală phan ơn is sàng goh. Kônania la dô nă cau Lebi, gơs broă tòm sền gàr ală phan hơ̆, mơ Simei oh khai dê la cau gơnoar oh tòm broă hơ̆.

Sơnròp Gơlik Gơs 14:20

Pal jòng ro Yàng Tom Trồ Hơđang Rlau Jơh, Bơtau neh jào ală cau sò tơm tòm tê mê dê!” Tòm jơh ală phan Abram neh ai wơl, Abram ơn dô pơnah jơt khai in.

Luka 11:42

Mơya bòl glar bol mê in la cau Pharisi! Bơh bol mê neh ơn dô pơnah jơt biap trau, biap krồng mơ ală biap ndai, mơ sang lòi bơta song ring mơ nùs kòñ gơboh di Yàng Tom Trồ. Ală bơta do bol mê pal lơh mơ kung ò di lơi hŭi ală bơta ne sơl.

Nehemi 13:5

neh rcang Tôbiah in dô nơm ơdŭ dờng la tiah bơh lài cau neh ơn ală kòi phe, ală kơlhô, ală phan ngui, kòi pơnah jơt, tơrnòm, mơ mơñà, hơ̆ la ală phan neh geh ơn bơh bơta boh lam ai ală cau Lebi, ală cau đơs chò, mơ ală cau sền gàr mpồng in, bal mơ ală phan ơn ală cau gơnoar ơn phan duh khoai in.

Nehemi 12:44

Tòm ngai hơ̆ cau pồ bơtào ală cau sền gàr ală ơdŭ ơn phan bơh ală phan ơn, plai bồ sơnam, ală pơnah jơt, nàng tơrgòm ală phan hơ̆ jat bơta boh lam neh sồr nàng ơn ală cau ơn phan duh khoai in; bơh làng bol Juda chò hòp bơh ală cau gơnoar ơn phan duh khoai mơ ală cau Lebi neh duh broă.

Lebi 27:29

Ò gơs cau lơi neh ơn jào bơta tơnroh in rgơi geh tơwài wơl; bol khai pal kong tơnchơt.

Lebi 27:31

Dilah dô nă cau tơwài wơl dô pơnah jơt lơi khai dê, pal ơn bơtơl dô pơnah pram tòm hơ̆.

Yal Wơl 18:8

Khai rơp dòp geh pơnah phan sa ring bal bơh tòm ală phan ơn is bol khai in, ò kòp jền priă neh tac ală phan mơna gơrê bal mơ hìu nhă.

Yal Wơl 26:12

Tòm tŭ bol mê neh sir ơn is dô pơnah jơt bơh di jơh ală phan neh gơlik gơs bol mê in tòm nam dơ̆ pe rau, hơ̆ la nam ơn phan pơnah jơt, bol mê rơp ai phan hơ̆ cau Lebi, cau làng bơdìh, cau kòn đòi mơ cau ùr bơnrau in, tồ bol khai rgơi sa tòm ală ƀòn dờng bol mê dê mơ geh hòm lai.

Sơnròp Gơlik Gơs 47:24

Tus di kơnhai toès, bol mê pal boh dia wơl Pharaôn in dô pơnah pram, ai poan pơnah ne lòi mê in nàng lơh gar sơntìl tồ bol mê in ngui sa mơ hìu nhă bal mơ ală kòn dềt bol mê dê.”

Sơnròp Gơlik Gơs 47:26

Jôsep lơh dô bơta boh lam gam jơl tus di ngai do, hơ̆ la pal boh dia wơl Pharaôn in dô pơnah pram bơh phan gơlik bơh ù tòm Ejiptơ. Mìng sre brê ală cau gơnoar ơn phan duh khoai dê ò gơrê mơ Pharaôn.