Lebi 11:44 - Sră Goh 2018

⁴⁴ Añ la Jehôwa Yàng Tom Trồ bol mê dê; ơn is tĕ sàng goh să tòm bol mê dê mơ gơlik gơs tĕ sàng goh, tài bơh Añ la sàng goh. Bañ lơh să tòm bol mê in gơlik gơs ò goh tài bơh dô nơm phan neh geh crơng gơs lơi wìn hơđang ù.

Lebi 11:44 ပူးပေါင်းရင်းမြစ်များ

Đơs Crih 99:5

Jòng ro tĕ Jehôwa Yàng Tom Trồ bol he dê, mơ duh khoai di kơrnòl jơng Kơnràñ dê. Yàng la sàng goh!

Đơs Crih 99:9

Jòng ro tĕ Jehôwa Yàng Tom Trồ bol he dê, Mơ duh khoai hơđang mơnơm sàng goh Kơnràñ dê; Bơh Jehôwa Yàng Tom Trồ bol he dê la sàng goh!

Lik Ejiptơ 16:12

“Añ neh kơno jơnau yoam cau Israel dê. Đơs tĕ mơ bol khai lah: ‘Di trồ mho bol mê rơp sa poac, mơ tòm àng drim bol mê rơp sa hòm piang lă. Gen bol mê rơp git lah Añ la Jehôwa Yàng Tom Trồ bol mê dê.’”

Lik Ejiptơ 19:10

Yàng Jehôwa đơs mơ Môise lah: “Lòt tĕ tus hơ làng bol mơ lơh bol khai in sàng goh ngai do mơ ngai hìng. Sồr bol khai pìh ồi ào bol khai dê,

Lik Ejiptơ 19:6

mơya bol mê rơp gơlik gơs Añ in dô nơm lơgar cau gơnoar ơn phan duh khoai mơ dô nơm làng bol sàng goh.’ Hơ̆ la ală jơnau mê pal đơs mơ cau Israel.”

Lik Ejiptơ 20:2

“Añ la Jehôwa Yàng Tom Trồ bol mê dê, Bơtau neh cèng bol mê bơh di Ejiptơ, klàs bơh di tiah ơm dĭ.

Lik Ejiptơ 22:30

Kung lơh behơ̆ gơwèt mơ kơnrồ mơ belàt bol mê dê. Lòi bol gơ ơm mơ mè bol gơ dê tòm poh ngai, mơya ơn tĕ gơ Añ in tòm ngai phàm.

Lik Ejiptơ 22:31

Bol mê rơp la làng bol sàng goh Añ jê. Behơ̆, bañ sa poac phan poan jơng lơi neh gơkòl crè bơh phan brê; sơrbì tĕ so in sa.

Lik Ejiptơ 23:25

Duh khoai tĕ Jehôwa Yàng Tom Trồ bol mê dê; Kơnràñ rơp ai lơngai ală phan sa phan ñô bol mê dê. Añ rơp tă tơlik jơh ală bơta kòp jê bơh digùl bol mê,

Lik Ejiptơ 6:7

Añ rơp dòp bol mê lơh gơs làng bol gơrê is mơ Añ, mơ añ rơp lơh gơs Yàng Tom Trồ bol mê dê. Gen bol mê rơp git Añ la Jehôwa Yàng Tom Trồ bol mê dê, neh tă tơlik bol mê klàs bơh di yô cau Ejiptơ dê.

Esai 43:3

Bơh Añ la Jehôwa Yàng Tom Trồ mê dê, Bơtau Sàng Goh Israel dê, Yàng Dong Klàs mê dê. Añ ai Ejiptơ lơh gơs phan tơwài mê, Ethiôpi mơ Seba lơh gơs phan ala mê.

Esai 51:15

Bơh Añ la Jehôwa Yàng Tom Trồ bol mê dê, la Bơtau lơnggac dàlềng lơh ryà dà gơ dê nggồr ur ur, Yàng Jehôwa Gơnap Gơnoar Dờng la sơnđan Kơnràñ dê.

Lebi 10:3

Gen Môise đơs mơ Arôn lah: “Do la jơnau Yàng Jehôwa neh đơs bơh bơta hơ̆: Digùl ală cau tus rềp di Añ; Añ rơp yal tơlik să tòm Añ sàng goh, mơ di đap jơh ală làng bol Añ rơp geh jòng ro.” Arôn ơm mŏ mŏ.

Lebi 11:43

Bañ lơh ƀơ̆ ƀơl să tòm bol mê dê bơh dô nơm phan lơi tòm ală phan neh geh crơng gơs hơ̆. Bañ lơh să tòm bol mê in gơlik gơs ƀơ̆ ƀơl tài bơh ală phan hơ̆ hala lòi ală phan hơ̆ lơh bol mê in gơlik gơs ò goh.

Lebi 18:2

“Yal tĕ mơ cau Israel mơ đơs mơ bol khai lah: Añ la Jehôwa Yàng Tom Trồ bol mê dê.

Lebi 19:10

Bañ lòt wơl dơ̆ bàr tòm suơn ño bol mê dê nàng dòñ ală plai ño neh rung tòm ù. Lòi tĕ ală plai hơ̆ cau rƀah lơòi mơ ală cau làng bơdìh in. Añ la Jehôwa Yàng Tom Trồ bol mê dê.

Lebi 19:2

“Yal tĕ jơh mpồl jơnum Israel dê mơ đơs mơ bol khai lah: ‘Sàng goh tĕ tài bơh Añ Jehôwa Yàng Tom Trồ bol mê dê, la sàng goh.

Lebi 19:3

Kòp nă bol mê pal ki ngàm di mè bèp he dê, mơ bol mê pal prap gàr ngai Saƀat Añ jê. Añ la Jehôwa Yàng Tom Trồ bol mê dê.

Lebi 19:4

Bañ wèt hơ ală rùp ràk hala lơh gơs bol mê in ală yàng tŏ mơ màh priă. Añ la Jehôwa Yàng Tom Trồ bol mê dê.

Lebi 20:26

Bol mê pal la sàng goh Añ in, tài bơh Añ, Yàng Jehôwa, la sàng goh, mơ Añ neh cah is bol mê bơh di ală làng bol nàng bol mê gơrê is bal mơ Añ.

Lebi 20:7

Ơn is tĕ sàng goh să tòm bol mê dê tài bơh Añ la Jehôwa Yàng Tom Trồ bol mê dê.

Lebi 21:8

Sền tĕ di bol khai la sàng goh tài bơh bol khai ơn phan sa Yàng Tom Trồ bol mê dê. Sền tĕ bol khai la sàng goh, tài bơh Añ, Yàng Jehôwa, la sàng goh, mơ Añ neh lơh bol mê in gơs sàng goh.

Amôs 3:3

Dilah bàr nă cau lòt bal, mìng tòm tŭ bol khai ò dô nùs bal ngan sơl?

Khà Làng Bol 15:40

Gen bol mê rơp kah wơl mơ dòn bơr lơh jat jơh ală jơnau Añ sồr mơ rơp geh ơn is sàng goh Yàng Tom Trồ bol mê in.

Mathiơ 5:48

Behơ̆ bol mê gơlik gơs tĕ wil tơl, be Bèp bol mê hơđang trồ la wil tơl.”

Yal Wơl 14:2

bơh bol mê la dô nơm làng bol goh Jehôwa Yàng Tom Trồ bol mê in. Yàng Jehôwa neh sac rwah bol mê bơh digùl jơh ală làng bol hơđang plai ù nàng lơh gơs phan tòm kas màng Kơnràñ dê.

I Tesalônika 4:7

Bơh Yàng Tom Trồ ò di hòi bol he tus hơ bơta ngkòr ngkàc ò, mơya tus hơ bơta gơlik gơs sàng goh.

Jôsue 24:19

Jôsue đơs mơ làng bol lah: “Bol mê ò rgơi duh broă Yàng Jehôwa. Kơnràñ la Yàng Tom Trồ sàng goh; Kơnràñ la Yàng Tom Trồ gơjrañ di rùp ràk. Kơnràñ rơp ò toh bơta lơh tìs mơ bơta tồi glài bol mê dê.

I Pier 2:9

Mơya oh mi la jơi bơtiàn geh sac rwah, la cau gơnoar ơn phan duh khoai cau bơtau dê, la làng bol sàng goh, la làng bol is Yàng Tom Trồ dê, tồ oh mi in yal tơlik ală broă crih crài ngan Kơnràñ dê, la Bơtau neh hòi oh mi lik klàs bơh tiah klam jơngo mơ tus hơ tiah àng gơcrà krơi is Kơnràñ dê.

Yal Tơlik 22:11

Cau lơh iơh kư̆ lòi khai lơh iơh tai, cau ngkòr ngkàc kư̆ lòi khai kòl tòm bơta ngkòr ngkàc tai, cau song ring kư̆ lòi khai lơh bơta song ring tai, cau sàng goh kư̆ lòi khai ơm sàng goh tai.”

I Samuel 2:2

Ò gơs cau lơi sàng goh be Yàng Jehôwa, ò gơs cau lơi rlau mơ Kơnràñ; ò gơs Pơnai Lŭ lơi ndròm be Yàng Tom Trồ bol he dê.

I Samuel 6:20

Gen ală làng bol Bet Semes đơs lah: “Ñcau rgơi ntào di đap mat Yàng Jehôwa la Yàng Tom Trồ sàng goh do taih? Kơnràñ rơp lòt tus hơ ñcau nàng bol he rgơi klàs bơh Kơnràñ taih?”