Jude 1:9 - Sră Goh 2018

⁹ Mơya tòm tŭ cau gơnrơh dờng rlau jơh la Mikael tòm pơndang mơ cà ràk nàng tòmpìt ƀồc Môise, gen khai ò khin ai jơnau bơrsèl tơnhial nàng yă cà ràk mơya mìng đơs lah: “Dan Yàng lah pơrhơng mê.”

Jude 1:9 ပူးပေါင်းရင်းမြစ်များ

I Yal Yau 12:17

Dabit lik lòt wă rò bol khai, mơ đơs mơ bol khai lah: “Dilah bol mê tus mơ añ be cau bơyô nàng dong kòl añ, gen nùs añ rơp gơlik gơs dô bă bal mơ bol mê. Mơya dilah bol mê tus nàng tòmdră mơ añ be cau sò tơm añ jê, bulah tê añ jê ò lơh bơta tìs; gen dan ồng pàng bol he dê sền gŏ mơ cahrña bol mê.”

Lik Ejiptơ 22:28

Bañ đơs tràl sơrbil di Yàng Tom Trồ hala srat rma cau kwang at bồ làng bol mê dê.

Daniel 10:13

Mơya bơtau at bồ lơgar Persia neh kơryan añ tòm bàr jơt dùl ngai; gen Mikael la dô nă tòm ală kwang dờng at bồ, neh lòt tus nàng dong kòl añ tài bơh añ kòl kơryan tềng hơ̆ bơh bơtau Persia.

Daniel 10:21

Mơya añ rơp yal mê in git ală bơta geh cih tòm Sră Jơnau Song. Ò gơs cau lơi dong añ nàng tòmdră mơ bol khai, gơs mìng Mikael la kwang dờng at bồ bol mê dê lơm.”

Daniel 12:1

“Tòm tŭ tơngai hơ̆, Mikael la cau gơnrơh dờng, cau sền gàr làng bol mê dê rơp guh. Rơp gơs dô tŭ tơngai jê sồt bòl glar tian gơs bơh tŭ pa bơtào gơs ală lơgar tus di tŭ tơngai hơ̆ kung ò gơs tŭ lơi gơs behơ̆. Mơya tòm tŭ hơ̆, làng bol mê dê cau lơi geh cih sơnđan mat tòm sră gen rơp geh dong klàs.

Sacari 3:2

Cau gơnrơh Yàng Jehôwa đơs mơ Satan lah: “Ơ Satan, dan Yàng Jehôwa lah pơrhơng mê! Dan Yàng Jehôwa la Bơtau neh sac rwah Jerusalem lah pơrhơng mê! Cau do ò di kung be dô gơl lòng ồs sa neh tă tơlik bơh di ồs ò ơ?”

Jơnau Niam Jat Mak 15:29

Ală cau lòt gan tềng hơ̆ dơñŏ tơnhial di Yàng Jesu, rtơs bồ mơ đơs lah: “Hơi! Mê la cau sòr tơrlah hìu duh khoai mơ bơtào gơs wơl tòm pe ngai,

Yal Wơl 34:6

Kơnràñ neh tơp khai tòm Môap, tòm thòng tòm toh đah ne mơ Bet Pheor, mơya jơl tus di ngai do ò gơs cau lơi git ntềng đah bơtô ƀồc khai dê.

I Tesalônika 4:16

Bơh să tòm Yàng rơp mù bơh đang trồ bal mơ jơnau driau sồr mơ jơnau hòi cau gơnrơh dờng rlau jơh dê, bal mơ ntas kơlwòk Yàng Tom Trồ dê, gen ală cau chơt tòm Bơtau Krist rơp kis wơl lài.

I Pier 3:9

Bañ ai bơta iơh sal wơl bơta iơh, kung bañ ai bơta lah sơrpah sal wơl bơta lah sơrpah; mơya gơpơrlơ̆ wơl, pal ai lơngai, bơh bơta hơ̆ mơ oh mi geh hòi sac nàng pơrdòn bơta lơngai lơngò.

II Pier 2:11

Bol khai dờng nùs, lơh be tơl, ò rngòt đơs bơrsèl tơnhial di ală gơnoar dờng ryŭ. Bulah ală cau gơnrơh, la cau gơs gơnoar pràn mơ gơnap gơnoar dờng rlau, kung ò ai jơnau bơrsèl tơnhial nàng yă ală gơnoar dờng ryŭ hơ̆ di đap Yàng sơl.

Yal Tơlik 12:7

Mơ tai, hơđang trồ gơs dô bơta tòmlơh: Mikael mơ ală cau gơnrơh khai dê tòmlơh mơ nagrài, nagrài mơ ală cau gơnrơh gơ dê tòmlơh wơl.