Jeremi 31:33 - Sră Goh 2018

³³ Yàng Jehôwa đơs: “Do la bơta ho bal mơ Añ rơp bơtào bal mơ hìu Israel tơnơ̆ mơ ală ngai hơ̆. Añ rơp ơn bơta boh lam Añ tòm dơngoh bol khai mơ cih tòm nùs bol khai. Añ rơp lơh gơs Yàng Tom Trồ bol khai, bol khai rơp lơh gơs làng bol Añ jê.

Jeremi 31:33 ပူးပေါင်းရင်းမြစ်များ

II Samuel 7:24

Mơ Yàng neh bơtào kơ̆ làng bol Israel să tòm Yàng in be la làng bol Yàng dê gam sùm sùm. Đah mơ Yàng, ơ Yàng Jehôwa, Yàng neh gơlik gơs Yàng Tom Trồ bol khai dê.

I Ală Bơtau 8:58

dan Kơnràñ chồl nùs bol hi wèt mơ Kơnràñ, tồ bol hi lòt tòm ală gùng dà Kơnràñ dê, prap gàr ală bơta sồr lam, bơta boh lam, mơ gơnoar sồr Kơnràñ dê neh nting sồr ồng pàng bol hi dê.

Đơs Crih 37:31

Bơta boh lam Yàng Tom Trồ khai dê ơm tòm nùs khai, Cơnđòa lòt khai dê ò gơsèng.

Đơs Crih 40:8

Ơ Yàng Tom Trồ añ jê, añ chò hòp lơh jat nùs kòñ Kơnràñ dê; Bơta boh lam Yàng dê ơm tòm nùs añ.”

Đơs Crih 40:9

Tòm mpồl jơnum dờng añ neh yal jơnau chò hòp bơh bơta dong tă; Ne, ơ Yàng Jehôwa, añ ò mềm bơr, be Kơnràñ neh git rau.

Lik Ejiptơ 6:7

Añ rơp dòp bol mê lơh gơs làng bol gơrê is mơ Añ, mơ añ rơp lơh gơs Yàng Tom Trồ bol mê dê. Gen bol mê rơp git Añ la Jehôwa Yàng Tom Trồ bol mê dê, neh tă tơlik bol mê klàs bơh di yô cau Ejiptơ dê.

Jơnau Pơnđik 7:3

Kơt tĕ gơ di ràs tê kòn, cih gơ hơđang mpàn nùs kòn.

Esai 51:7

Iat tĕ Añ! Ơ bol mê la ală cau git bơta song ring, la làng bol gơs bơta bơto sồr Añ jê tòm nùs bol mê dê; Bañ rngòt di bơta lah pơrhơng kòn mơnus dê, hala rngòt rơm să di jơnau lah sơrpah bol khai dê.

Esai 59:21

Yàng Jehôwa đơs lah: “Đah mơ Añ, do la bơta ho bal Añ neh bơt bơtào mơ bol khai. Hwềng Añ la Bơtau ơm hơđang bol mê, mơ ală jơnau Añ neh ơn tòm bơr bol mê rơp ò lik bơh di bơr bol mê, hala bơh di bơr kòn sau bol mê, hala bơh di bơr kòn sau bol khai dê bơh tŭ do jơl tus sùm sùm,” Yàng Jehôwa đơs behơ̆.

Jeremi 17:1

Tồi glài Juda dê neh geh cih mơ gai cih lòs, Mơ mơng lŭ kră kơldang; Geh pac hơđang mpàn nùs bol khai, mơ hơđang ngke ală cơnòng duh khoai bol khai dê.

Jeremi 24:7

Añ rơp ai bol khai in nùs đal git Añ la Yàng Jehôwa. Bol khai rơp lơh gơs làng bol Añ, mơ Añ rơp lơh gơs Yàng Tom Trồ bol khai; bơh bol khai rơp jơh nùs rê wơl mơ Añ.’

Jeremi 30:22

Behơ̆ gen, bol mê rơp lơh gơs làng bol Añ, Añ rơp lơh gơs Yàng Tom Trồ bol mê.’”

Jeremi 31:1

Yàng Jehôwa đơs: “Tòm tŭ hơ̆, Añ rơp lơh gơs Yàng Tom Trồ jơh ală jơi bơtiàn Israel in; mơ bol khai rơp lơh gơs làng bol Añ jê.”

Jeremi 32:38

Bol khai rơp lơh gơs làng bol Añ, mơ Añ rơp lơh gơs Yàng Tom Trồ bol khai dê.

Jeremi 32:39

Añ rơp ai bol khai in dô nơm nùs mơ dô nơm gùng, tồ bol khai duh rngòt di Añ sùm sùm, bơh bơta niam bol khai in mơ niam kòn sau bol khai in pơnjat tơnơ̆.

Jeremi 32:40

Añ rơp bơtào bơta ho bal gam sùm sùm mơ bol khai; ò tŭ lơi sang lòi mơya kư̆ ai lơngai bol khai in; mơ Añ rơp ơn bơta duh rngòt di Añ tòm nùs, nàng bol khai ò sang lòi Añ.

Ejekiel 37:27

Tiah ơm sùm Añ jê rơp gơs digùl bol khai; Añ rơp gơs Yàng Tom Trồ bol khai dê, bol khai rơp gơs làng bol Añ jê.

Sră Ôse 2:20

Añ rơp bau mơ ai tòm bơta dòn song, mơ ai rơp đal git Yàng Jehôwa.”

Sôphôni 3:13

Ală cau gam wơl Israel dê rơp ò lơh bơta tìs, bol khai rơp ò đơs blac, bơta blac pơrlồm jòi ò bàn tòm bơr bol khai dê. Bol khai rơp sa mơ bic rlô, mơ ò gơs cau lơi lơh bol khai in rngòt rngơt.”

Sacari 13:9

Añ rơp cèng tơmut dô pơnah pe hơ̆ tòm ồs, Añ rơp tiar bol khai kung be priă, mơ lòng bol khai kung be màh. Bol khai rơp hòi di sơnđan Añ, mơ Añ rơp ho wơl bol khai; Añ rơp đơs lah: ‘Bol khai la làng bol Añ jê,’ mơ bol khai rơp đơs lah: ‘Yàng Jehôwa la Yàng Tom Trồ bol hi dê.’”

Jang 20:17

Yàng Jesu đơs lah: “Bañ ƀư di Añ, bơh Añ òhềt guh rê hơ Bèp. Mơya ai lòt tus tĕ hơ oh mi Añ, mơ đơs mơ bol khai lah: Añ guh rê hơ Bèp Añ, mơ la Bèp bol mê sơl, hơ Yàng Tom Trồ Añ mơ la Yàng Tom Trồ bol mê sơl.”

Rôma 11:27

“Hơ̆ la jơnau ho bal Añ rơp bơtào mơ bol khai, Tòm tŭ Añ tă sang tồi glài bol khai dê.”

Rôma 7:22

Bơh jat cau đah dơlam, añ geh hừh nùs tòm bơta boh lam Yàng Tom Trồ dê;

II Kôrintô 3:3

Loh làng ngan oh mi la sră pơyoa Bơtau Krist dê, bơh gơnoar broă bol hi mơ cih gơs, ò di cih mơ dà cih, mơya cih mơ Hwềng Yàng Tom Trồ gam kis sùm dê; ò di cih hơđang mpàn lŭ, mơya cih hơđang nùs cau dê.

Yal Wơl 30:6

Jehôwa Yàng Tom Trồ bol mê dê rơp siat gơltau nùs bol mê dê mơ nùs ală kòn sau bol mê dê, tồ bol mê rơp jơh nùs mơ jơh hwềng soàn kòñ gơboh di Jehôwa Yàng Tom Trồ bol mê dê, nàng bol mê in geh kis.

I Tesalônika 4:9

Bơh bơta kòñ gơboh bal oh mi dê, gen ò càng cau lơi cih oh mi in, bơh să tòm oh mi neh geh Yàng Tom Trồ bơto lah pal kòñ gơboh bal mơ gơp;

Hebrơ 10:16

Yàng đơs lah: “Do la bơta ho bal Añ rơp bơtào mơ bol khai. Tơnơ̆ mơ ală ngai hơ̆, Añ rơp ơn bơta boh lam Añ jê tòm nùs bol khai, Mơ cih gơtòm dơngoh bol khai dê,”

Hebrơ 8:10

Yàng đơs tai lah: “Do la bơta ho bal Añ rơp bơtào bal mơ hìu Israel, Tơnơ̆ mơ ală ngai hơ̆: Añ rơp ơn bơta boh lam Añ jê tòm dơngoh bol khai dê, Mơ cih gơtòm nùs bol khai; Añ rơp la Yàng Tom Trồ bol khai dê, Mơ bol khai rơp la làng bol Añ jê.

Yal Tơlik 21:3

Añ kơno dô jơnau dờng lik bơh di sơbàn, đơs lah: “Ne, tiah ơm Yàng Tom Trồ dê ơm digùl jơi kòn mơnus. Kơnràñ rơp ơm bal mơ bol khai, mơ bol khai rơp lơh gơs làng bol Kơnràñ dê, să tòm Yàng Tom Trồ rơp ơm bal mơ bol khai, mơ lơh gơs Yàng Tom Trồ bol khai dê.

Yal Tơlik 21:7

Cau lơi geh pha lin rlau rơp geh ală bơta hơ̆ lơh gơs sre brê; Añ rơp lơh gơs Yàng Tom Trồ khai dê mơ khai rơp lơh gơs kòn Añ jê.