Jeremi 31:20 - Sră Goh 2018

²⁰ Epraim ò di la kòn klau gơboh đềt mềr Añ jê ơ? La kòn mơ Añ niam nùs ò ơ? Bulah Añ òs lah pơrhơng khai, Añ gam kah khai sùm. Gen tàng nùs Añ rngoh rngac ngan bơh khai; Nền cê ngan Añ rơp nđàc sơngit di khai,” Yàng Jehôwa đơs behơ̆.

Jeremi 31:20 ပူးပေါင်းရင်းမြစ်များ

Sơnròp Gơlik Gơs 43:30

Bơh khai gŏ oh khai gen tàng Jôsep gơs nùs rngoh rngac, sơrbac sơrbang lik di tiah, jòi tiah nàng ñìm. Khai mut tòm ơdŭ dơlam mơ ñìm.

I Ală Bơtau 3:26

Gen cau ùr gơs kòn klau gam kis nđàc sơngit di kòn khai dê đơs mơ bơtau lah: “Ơ cau tòm añ jê, dan ai tĕ cau ne in kòn dềt gam kis, bañ tơnchơt khai!” Mơya cau ne đơs lah: “Khai rơp ò gơrê mơ añ, mơ kung ò gơrê mơ ai; blah tĕ khai gơs bàr pơnah!”

Đơs Crih 103:13

Yàng Jehôwa nđàc sơngit di cau duh rngòt di Kơnràñ, Ò gơkrơi be bèp nđàc sơngit di ală kòn khai dê behơ̆ sơl.

Jơnau Pơnđik 3:12

Bơh Kơnràñ lơh glài tơmàl di cau lơi mơ Kơnràñ kòñ gơboh, Kung be bèp gơwèt mơ kòn klau kòñ gơboh he dê.

Đơs Chò 5:4

Cau kòñ gơboh añ tơmut tê tòm trồm kai mpồng, nùs tồr añ rngoh rngac bơh khai.

Esai 16:11

Nùs Añ tài bơh Môap mơ rac ròc kung be kơñi rơs, tòm hwềng nùs Añ kung behơ̆ tài bơh Kir Hareset.

Esai 30:18

Bulah behơ̆, Yàng Jehôwa kơp gơn nàng ai bơta nđàc bol mê in, Kơnràñ rơp guh nàng yal tơlik bơta nđàc sơngit bol mê in. Bơh Yàng Jehôwa la Yàng Tom Trồ song ring. Lơngai jơh tơl nă cau in gơn kơp Kơnràñ!

Esai 55:7

Lòi tĕ cau iơh bơsak sang lòi gùng dà khai dê, mơ lòi tĕ ală cau kơlôi sơnơng ală bơta ò song ring rê wơl hơ Yàng Jehôwa, Kơnràñ rơp nđàc sơngit di bol khai, mơ rê wơl hơ Yàng Tom Trồ bol he dê, bơh Kơnràñ rơp toh glài dờng ơnàng.

Esai 63:15

Dan Yàng tơmềt sền bơh đang trồ, bơh tiah ơm sàng goh mơ gơklŏ Kơnràñ dê. Ntềng đah bơta ngac ngar mơ gơnoar pràn Kơnràñ dê taih? Nùs lơbơn niam mơ bơta nđàc sơngit Kơnràñ dê neh tă tơlik bơh Añ.

Jeremi 3:12

Lòt tĕ mơ yal tơnggit ală jơnau do wèt hơ đah đang lah: ‘Ơ Israel ò dòn song, rê wơl tĕ! Yàng Jehôwa đơs, Añ rơp ò sền di ai mơ muh mat gơjrañ tai, Bơh Añ jak nđàc sơngit; Añ ò prap bơta gơjrañ sùm sùm.’ Yàng Jehôwa đơs behơ̆.

Jeremi 3:19

Añ neh kơlôi lah: ‘Añ rơp ơn mê digùl ală kòn sau Añ jê, Añ rơp ai mê in dô bă tiah ù niam, Phan jơtài hàng mơnĕ rlau jơh tòm ală lơgar Añ neh kơlôi: Mê rơp hòi di Añ la “Bèp Añ jê!” Mơ ò pơrlac sang bơh bơta lòt jat Añ.

Jeremi 31:9

Bol khai ñìm rac mơ tus, mơ Añ rơp tề lam tòm bơta rac dan; Añ rơp jun bol khai lòt rò gah ală hiòng, Jat gùng song ngan, ò kòl gơtup pừ. Bơh Añ neh lơh gơs bèp Israel in, Ai Epraim la kòn tơnhoa Añ jê.

Jeremi 33:26

gen kung behơ̆, Añ rơp sang lòi jơi bơtiàn Jakôp mơ jơi bơtiàn Dabit dĭ gơna Añ jê, tian gơs Añ rơp ò sac rwah dô nă tòm ală kòn sau khai dê lơh gơs cau at bồ jơi bơtiàn Abraham, Isak, mơ Jakôp dê. Bơh Añ rơp bơtào wơl sre brê bol khai dê, mơ rơp nđàc sơngit di bol khai.’”

Jeremi 48:36

Behơ̆ gen, nùs Añ bơh Môap gơlik sap moat jrùng kung be sap uh kơwào; nùs Añ gơlik sap moat jrùng bơh làng bol Kirheres kung be sap kơwào uh; bơh ală bơta pas gơs bol khai jòi geh neh roh jơh rau.

Ñìm Rac 3:22

Bơta kòñ gơboh kơ̆ dơn Yàng Jehôwa ò tŭ lơi gơkòl tơnroh. Bơta kòñ nđàc Kơnràñ dê ò tŭ lơi lồi jơh;

Ejekiel 33:11

Đơs tĕ mơ bol khai lah: ‘Jehôwa Yàng Tom Trồ đơs lah: Ngan be Añ kis sùm, Añ ò niam nùs tòm bơta chơt cau iơh bơsak dê, mơya Añ niam nùs gŏ bol khai pơrlac sang ală gùng dà bol khai dê mơ kis. Pơrlac sang tĕ! Pơrlac sang ală gùng dà iơh bơsak bol mê dê! Ñchi bơh tài bol mê kòñ chơt, ơ hìu Israel?’

Sră Ôse 14:4

Añ rơp sơmbòi bơta ò dòn song bol khai dê, Añ rơp kòñ gơboh dê bol khai jơh nùs; bơh bơta gơjrañ Añ jê neh pơrlac bơh di bol khai.

Lebi 26:44

Bulah neh gơs ală bơta hơ̆, tòm tŭ bol khai ơm tòm lơgar ală cau sò tơm di bol khai, Añ rơp ò sang lòi bol khai hala cù kìr di bol khai nàng tơnroh jơh hir bol khai mơ sang lòi jơnau Añ neh ho bal mơ bol khai. Añ la Jehôwa Yàng Tom Trồ bol khai dê.

Luka 15:24

Bơh kòn añ do neh chơt mơ kis wơl, neh roh mơ geh bàn wơl.’ Chòp bol khai sơntòm sa chò hòp.

Luka 15:32

Mơya di pal ngan sa chò hòp mơ hòn chò, bơh oh mê do neh chơt mơ kis wơl, neh roh mơ geh bàn wơl.’”

Yal Wơl 32:36

Ngan Yàng Jehôwa rơp cahrña làng bol Kơnràñ dê, mơ gơs nùs nđàc sơngit di ală cau duh broă Kơnràñ dê, tòm tŭ Kơnràñ gŏ bơta pràn kơldang bol khai dê ò gam tai, bulah cau dĭ hala cau khat gơboh kung ò gam wơl.

Philip 1:8

Bơh Yàng Tom Trồ lơh cơng añ in lah ngan añ kòñ gơboh di jơh ală oh mi bơh nùs nhơm Yàng Krist Jesu.

Ală Kwang Cahrña 10:16

Gen bol khai tă sang ală yàng lơgar bơdìh bơh digùl bol khai mơ duh broă Yàng Jehôwa. Kơnràñ ò jai kong tai sền bơta bòl glar Israel dê.