I Kôrintô 1:30 - Sră Goh 2018

³⁰ Kơnràñ la tòm ryas bơta kis tòm Yàng Krist Jesu, Kơnràñ neh gơlik gơs bơta jak chài bol he in bơh Yàng Tom Trồ, mơ bơta song ring, bơta gơlik gơs sàng goh mơ bơta tơwài glài.

I Kôrintô 1:30 ပူးပေါင်းရင်းမြစ်များ

Jơnau Pơnđik 1:20

Bơta jak chài ai jơnau đơs dờng đah bơdìh ƀòn, Ai sap đơs dờng tòm ală ƀlàng dờng tiah pơjum làng bol.

Jơnau Pơnđik 2:6

Bơh Yàng Jehôwa ai gòi bơta jak chài. Bơh di bơr Kơnràñ tus bơta git jak mơ bơta git wă.

Jơnau Pơnđik 8:5

Ơ ală cau tùl gơla, bơtê tĕ bơta git kơrhia; Ơ cau siơ̆u bơta jak chài, jòi jat tĕ gơ.

Esai 11:2

Hwềng Yàng Jehôwa dê rơp ơm hơđang Kơnràñ, hơ̆ la Hwềng jak chài mơ git jak, Hwềng jak bơyai mơ gơnoar pràn, Hwềng git wă mơ duh rngòt di Yàng Jehôwa.

Esai 45:17

Mơya Israel rơp geh Yàng Jehôwa dong klàs, mơ bơta dong klàs gam sùm sùm ò lồi; Mê rơp ò tŭ lơi gơkòl tòm bơta ƀàssìl hala gơkòl sền òsơp jơl tus jơh ală rài.

Esai 54:17

Ò gơs phan tòmlơh lơi neh tiar rgơi tòmdră pha rlau mơ ai, mơ ai rơp pơndang sang kòp nơm lơmpiat yă ai tòm tiah cahrña. Hơ̆ la pơnah sre brê ală cau duh broă Yàng Jehôwa dê, mơ bơta tò să bol khai dê tus bơh di Añ.” Yàng Jehôwa đơs behơ̆.

Jeremi 33:16

Tòm ală ngai hơ̆, Juda rơp geh dong klàs; Jerusalem rơp ơm lơngap lơngai; gơ geh sơnđan lah: “Yàng Jehôwa, bơta song ring bol he dê.”’

Daniel 2:20

Daniel đơs lah: “Jòng ro sơnđan Yàng Tom Trồ sùm sùm ò git lồi, Bơta jak chài mơ gơnap gơnoar gơrê bal mơ Kơnràñ.

Daniel 9:24

Poh jơt nơm poh neh gơs lơh nền hơđang làng bol mê dê mơ ƀòn dờng sàng goh mê dê: nàng pơndut bơta tìs glài, tơnlồi bơta tồi glài, mơ tơwài bơta iơh bơsak, mơ cèng tus bơta song ring gam sùm sùm, nàng lơh gơlik di ngan bơta gơtơnggŏ mơ jơnau gơnoar hwơr, mơ bong mơñà Tiah Sàng Goh Ngan in.

Sră Ôse 13:14

Añ rơp dong bol khai klàs bơh gơnap gơnoar lơgar làng ƀồc. Añ rơp tơwài bol khai klàs bơh bơta chơt sơl ơ? Ơ bơta chơt, ntềng đah bơta rung rài mê dê taih? Ơ lơgar làng ƀồc, ntềng đah bơta tơnroh mê dê taih? Bơta nđàc sơngit neh pồn ndơp bơh di mat Añ.

Mathiơ 1:21

Khai rơp deh dô nă kòn klau, mê tơmoh sơnđan tĕ Kơnràñ la JESU, bơh Kơnràñ rơp dong làng bol Kơnràñ dê klàs bơh tồi glài.”

Luka 11:49

Gen tàng bơta jak chài Yàng Tom Trồ dê kung neh đơs lah: ‘Añ rơp sồr ală cau gơnoar hwơr mơ ală cau gơnoar bơto dờng lòt tus hơ bol khai; bol khai rơp tơnchơt cau do, kup kơryan cau ne.’

Luka 21:15

Bơh Añ rơp ai bol mê in jơnau đơs mơ bơta jak chài mơ ală cau sò tơm di bol mê ò rgơi tòmdră hala đơs tơrwơl.

Jang 1:18

Ò gơs cau lơi neh gŏ Yàng Tom Trồ, mìng Kòn Dùl ơm tòm nùs Bèp, la Bơtau sơnio bơh Bèp bol he in.

Jang 14:6

Yàng Jesu đơs lah: “Añ la gùng lòt, jơnau song, mơ bơta kis; ò bơh Añ gen ò gơs cau lơi geh lòt tus hơ Bèp.

Jang 17:26

Añ neh yal bol khai in git sơnđan Bèp, mơ rơp yal bol khai in git tai, tồ bơta kòñ gơboh Bèp neh kòñ gơboh di Añ, ơm tòm bol khai, mơ Añ kung ơm tòm bol khai sơl.”

Jang 17:8

Bơh Añ neh ai bol khai in ală jơnau Bèp neh ai Añ in; bol khai neh dòp mơ git ngan lah Añ neh tus bơh di Bèp, mơ dòn lah Bèp neh sồr Añ lòt tus.

Jang 8:12

Yàng Jesu đơs tai mơ bol khai lah: “Añ la bơta àng dunnia dê; cau lơi jat Añ rơp ò lòt tòm bơta klam jơngo, mơya gơs bơta àng bơta kis dê.”

Broă 26:18

nàng pò mat bol khai, tơrwơl bol khai bơh di klam jơngo tus hơ bơta àng, mơ bơh di gơnap gơnoar cà Satan dê tus hơ Yàng Tom Trồ, behơ̆ kơnòm di bơta dòn di Añ, tồi glài bol khai dê geh toh, mơ dòp geh sre brê bal mơ ală cau geh sac rwah Yàng Tom Trồ dê.’

Rôma 1:17

Tòm Jơnau Niam do, bơta song ring Yàng Tom Trồ dê geh ràng tơlik bơh bơta dòn tus hơ bơta dòn, be neh cih lah: “Cau song ring rơp kis bơh bơta dòn.”

Rôma 11:36

Bơh jơh ală phan la bơh Kơnràñ, tài bơh Kơnràñ, mơ gơrê hơ Kơnràñ. Àng gơklŏ Kơnràñ in gam sùm sùm. Amen.

Rôma 12:5

gen kung behơ̆ sơl, bulah bol he gơs oă cau mơya bol he la dô nơm să jan tòm Bơtau Krist, mơ bol he la ală pơnah bal.

Rôma 16:11

Dan còp să Herôdiôn la cau gơp bơtiàn añ jê. Dan còp să ală cau ơm tòm hìu Narkissus, la ală cau ơm tòm Yàng.

Rôma 16:7

Dan còp să Andrônik mơ Junia la cau gơp bơtiàn Juda mơ bơyô kong jàm bal mơ añ, mơ la cau neh geh tiơng pơnro tòm ală cau gơnoar bơto dờng mơ neh ơm tòm Bơtau Krist lài mơ añ.

Rôma 4:25

Kơnràñ neh kòl bơtào nàng kong chơt bơh tồi glài bol he dê, mơ kis wơl nàng bol he in geh kòp la song ring mơ Yàng Tom Trồ.

Rôma 4:6

Tài bơh hơ̆ Dabit neh đơs bơh bơta lơngai cau mơ Yàng Tom Trồ neh kòp la song ring khai in ò di bơh broă lơh lah:

Rôma 5:19

Ngan behơ̆, bơh bơta ò dòn bơr dô nă cau dê, tàng oă cau in gơlik gơs cau glài be lơi, gen kung behơ̆ sơl, bơh bơta dòn bơr dô nă cau dê, tàng oă cau in geh Yàng Tom Trồ kòp la song ring.

Rôma 5:21

behơ̆, tồi glài neh at bồ lam tus hơ bơta chơt be lơi, gen bơta nđàc kung at bồ tòm bơta song ring behơ̆ sơl, nàng lam bol he tus hơ bơta kis gam sùm sùm bơh Yàng Jesu Krist, la Yàng bol he dê.

Rôma 8:1

Gen tàng tŭ do ò gơs bơta lơh nền glài di ală cau ơm tòm Yàng Krist Jesu

Rôma 8:23

ò di mìng ală phan tòm trồ tiah lơm, bol he la cau gơs Yàng Hwềng be bơta nđàc sơnròp ngan Yàng Tom Trồ dê, kung rac ròc tòm nùs, tòm tŭ kơp gơn Yàng Tom Trồ kòp bol he la kòn ròng Kơnràñ dê mơ bơta hồ toh să jan bol he dê.

Rôma 8:9

Mơya dilah ngan gơs Hwềng Yàng Tom Trồ dê ơm tòm oh mi, gen oh mi ò kis jat poac să, mơya kis jat Yàng Hwềng; mơ dilah cau lơi ò gơs Hwềng Bơtau Krist dê, gen cau hơ̆ ò di bal mơ Kơnràñ.

I Kôrintô 1:2

pơyoa Hìu Jum Goh Yàng Tom Trồ in tòm Kôrintô, tus hơ ală cau neh gơlik gơs sàng goh tòm Yàng Jesu Krist, geh kòp la ală cau sàng goh, dô bă bal mơ jơh ală cau tòm kòp bă tiah hòi dan di sơnđan Yàng Jesu Krist, la Yàng bol khai dê mơ Yàng bol he dê sơl.

I Kôrintô 1:24

mơya gơwèt hơ ală cau geh hòi sac, cau Juda hala cau Grek, gen Bơtau Krist la gơnap gơnoar Yàng Tom Trồ dê mơ la bơta jak chài Yàng Tom Trồ dê.

I Kôrintô 12:18

Mơya ngan Yàng Tom Trồ neh rơndap kòp pơnah tòm să jan, jat nùs kòñ Kơnràñ dê.

I Kôrintô 12:27

Mơ tai, oh mi la să jan Bơtau Krist dê, mơ kòp nă cau la dô pơnah is.

I Kôrintô 12:8

Behơ̆, cau do kơnòm di Yàng Hwềng ai bềng jơnau jak chài, cau ne kơnòm di Yàng Hwềng hơ̆ ai bềng jơnau git jak,

I Kôrintô 4:15

Bulah oh mi gơs jơt rbô nă cau bơto tòm Bơtau Krist, mơya oh mi ò gơs oă bèp; bơh tòm Yàng Krist Jesu añ neh tơnggơs oh mi bơh Jơnau Niam.

I Kôrintô 6:11

Mơ tòm oh mi neh gơs cau behơ̆ sơl. Mơya tòm sơnđan Yàng Jesu Krist mơ Hwềng Yàng Tom Trồ bol he dê, gen oh mi neh geh rào goh bơh tồi glài, mơ oh mi neh geh ơn Yàng Tom Trồ in, mơ neh geh kòp la song ring hơ Yàng Tom Trồ.

II Kôrintô 12:2

Añ git dô nă cau tòm Bơtau Krist, bơh jơt poan nam lài neh geh cèng guh tus hơ tap trồ dơ̆ pe, (dilah tòm să jan añ ò git, hala bơdìh să jan, añ kung ò git; gơs Yàng Tom Trồ git).

II Kôrintô 4:6

Bơh Yàng Tom Trồ la Bơtau neh đơs lah: “Bơta àng pal pơnđàng sòl tòm bơta klam jơngo,” kung neh pơnđàng sòl tòm nùs bol hi, nàng bơh bol hi mơ pơnđàng sòl bơta git wă bơh bơta gơklŏ Yàng Tom Trồ dê tòm muh mat Yàng Jesu Krist dê.

Galati 1:4

la Bơtau neh phi să bơh tồi glài bol he dê, nàng dong tă bol he klàs bơh rài iơh do, jat be nùs kòñ Yàng Tom Trồ la Bèp bol he dê.

Galati 3:13

Bơtau Krist neh tơwài bol he lik klàs bơh bơta srat sơntơm bơta boh lam dê, Kơnràñ neh tài bơh bol he mơ gơlik gơs bơta srat sơntơm, bơh neh cih lah: “Pal srat ngan di cau lơi kong yồng hơđang chi pơng,”

Ephesô 1:10

nàng lơh gơlik gơs di di tŭ tŭ tơngai geh wil tơl, hơ̆ la nàng pơjum bal jơh ală bơta tòm Bơtau Krist, bulah bơta hơđang trồ hala bơta tòm ù.

Ephesô 1:14

Yàng Hwềng Goh la phan ai bồ sre brê bol he dê, jơl tus di tŭ Yàng Tom Trồ tơwài wơl làng bol Kơnràñ dê, nàng jòng ro bơta gơklŏ Kơnràñ dê.

Ephesô 1:7

Tòm Kòn hơ̆ bol he geh bơta tơwài glài bơh mhàm Kơnràñ dê, geh toh ală bơta tìs glài bol he dê, jat bơta nđàc dờng ngan Yàng Tom Trồ dê,

Ephesô 2:10

Bơh bol he la broă lơh Kơnràñ dê, neh geh Kơnràñ crơng gơs tòm Yàng Krist Jesu nàng lơh broă niam, mơ Yàng Tom Trồ neh rcang lài nàng bol he in lơh jat.

Ephesô 4:30

Bañ lơh moat jrùng Yàng Hwềng Goh Yàng Tom Trồ dê, bơh tòm Kơnràñ oh mi geh tap ƀang kì tus di ngai dong tơwài.

Ephesô 5:26

nàng tơnơ̆ mơ tŭ neh ngui dà mơ Jơnau Yàng nàng rào goh rau, gen lơh Hìu Jum Goh gơlik gơs sàng goh,

Philip 3:9

mơ geh ơm tòm Kơnràñ, ò di kơnòm di bơta song ring is añ jê bơh bơta boh lam mơ tus, mơya bơh bơta dòn di Bơtau Krist mơ geh, hơ̆ la bơta song ring tus bơh Yàng Tom Trồ bơh bơta dòn mơ geh;

Kôlôse 1:14

Tòm Kòn hơ̆ bol he gơs bơta dong tơwài la bơta toh glài bol he dê.

Kôlôse 3:16

Ai tĕ jơh ală bơta jak chài nàng jơnau Bơtau Krist dê ơm bềng lìu tòm oh mi; ngui bơta đơs crih, bơta đơs chò, mơ sèng đơs chò đah hwềng mơ bơto tơngkah bal mơ gơp, mơ tòm nùs đơs chò Yàng Tom Trồ in dô bă gơs bơta nđàc.

I Tesalônika 5:23

Dan să tòm Yàng Tom Trồ la Bơtau ai bơta lơngap lơngai lơh oh mi in gơlik gơs sàng goh wil tơl, mơ dan hwềng nùs, hwềng soàn mơ să jan oh mi dê geh prap gàr wil tơl, ò gơs tiah geh lah pơrhơng tòm tŭ Yàng Jesu Krist bol he dê tus wơl.

Sră Pơyoa Pol Dê Pơyoa Tit In 2:14

la Bơtau neh phi să bơh bol he nàng tơwài bol he bơh jơh ală bơta tồi glài iơh bơsak, mơ bơh să tòm Kơnràñ mơ lơh sàng goh dô nơm làng bol gơrê hơ Kơnràñ, la làng bol gơs nùs ngac ngar tòm ală broă niam.

Hebrơ 9:12

Kơnràñ kung ò ngui mhàm ală be dam mơ kơnrồ kòn dê, mơya ngui mhàm să tòm Kơnràñ dê mơ lòt tus hơ tiah sàng goh ngan dô dơ̆ tơl rau, lơh gơs bơta tơwài glài gam sùm sùm.

Jakơ 1:5

Dilah tòm oh mi gơs cau lơi siơ̆u bơta jak chài, dan tĕ mơ Yàng Tom Trồ, gen Kơnràñ rơp ai, bơh Yàng Tom Trồ la Bơtau ai gòi tơl nă cau in dô bă ơnàng, ò lah pơrhơng cau lơi.

I Pier 1:2

oh mi la cau geh sac rwah, jat be bơta git lài Yàng Tom Trồ dê la Bèp, mơ geh gơlik gơs làng bol sàng goh bơh Yàng Hwềng Goh, tồ dòn bơr Yàng Jesu Krist mơ geh lơh goh bơh mhàm Kơnràñ dê. Dan bơta nđàc mơ bơta lơngap lơngai sơlo geh bơtơl oă hơđang oh mi.

II Pier 1:1

Simôn Pier, la dĭ gơna mơ cau gơnoar bơto dờng Yàng Jesu Krist dê, pơyoa ală cau neh dòp dô bơta dòn kas màng be bol he tòm bơta song ring Yàng Tom Trồ mơ Yàng dong klàs bol he dê la Yàng Jesu Krist.

I Jang 5:6

Yàng Jesu Krist la Bơtau neh ai dà mơ mhàm mơ lòt tus; ò di mìng ai dà lơm ò, mơya ai dà mơ mhàm;

Yal Tơlik 14:4

Ală cau hơ̆ òhềt gơs ƀơ̆ ƀơl mơ ală cau ùr, bơh bol khai gam rlùng. Belàt Kòn lòt tiah lơi gen bol khai jat tiah hơ̆. Bol khai neh geh Yàng Tom Trồ tơwài bơh digùl jơi kòn mơnus, tồ gơlik gơs ală cau sơnròp geh ơn Yàng Tom Trồ in mơ Belàt Kòn in.

Yal Tơlik 5:9

Bol khai đơs chò dô bơta đơs chò pa lah: “Kơnràñ di pal ai sră pồt mơ tă ală ƀang kì gơ dê, Bơh Kơnràñ neh kong sreh chơt, ai mhàm Kơnràñ dê tơwài Yàng Tom Trồ in, ală cau tòm jơh ală jơi bơtiàn, jơnau đơs, làng bol, mơ lơgar,