Esai 63:3 - Sră Goh 2018

³ “Mìng dô nă Añ lơm neh jă mpal pat tơrnòm; digùl ală làng bol ò gơs dô nă cau lơi bal mơ Añ. Tòm bơta gơjrañ Añ jê, Añ neh jă hơđang bol khai, mơ tòm bơta gơjrañ dờng Añ jê, Añ neh tơnlề bol khai hơđơm jơng Añ; mhàm bol khai gơđềt di ală ồi ào Añ, mơ Añ neh lơh jơh ală ồi ào Añ gơđềt mơ mhàm lơm.

Esai 63:3 ပူးပေါင်းရင်းမြစ်များ

Sơnròp Gơlik Gơs 49:11

Khai kơt alàng dra khai dê di tòm ño, mơ kơt alàng kòn khai dê di ntê ño niam rlau jơh, Khai pìh ào khai tòm tơrnòm, Mơ ào jrùh khai tòm mhàm ño.

II Ală Bơtau 9:33

Khai đơs lah: “Sơrbì tĕ khai di tiah.” Behơ̆ bol hơ̆ sơrbì khai tòm tiah, mhàm khai gơđat hơđang dơrñang mơ di ơseh, mơ gơ jă hơđang khai tơn.

Sră Jop 40:12

Tiang gơ rtơs kung be tòm chi nho rề; Ară bơnô gơ dê tàñ tòmklĕ bal.

Đơs Crih 60:12

Kơnòm di Yàng Tom Trồ bol hi rơp tòmlơh dô bă khin cha, Bơh să tòm Kơnràñ rơp jă trơm ală cau sò tơm bol hi dê.

Esai 22:5

Bơh Yàng Jehôwa la Yàng Tom Trồ Gơnap Gơnoar Dờng neh gơs dô ngai nggồr nggàc, jă trơm mơ sơlồng sơlàng tòm thòng bơta gơtơnggŏ, dô ngai nàng phà tơrlah ală dơrñang, hòi driau bơta dong kòl hơ ală mơnơm.

Esai 25:10

Tê Yàng Jehôwa rơp ơn hơđang mơnơm do; Cau Môap rơp kong Kơnràñ jă trơm lề lac tòm tiah bol khai dê, kung be rhe kong jă lề tòm trồm ơn phan pơnđồm ù.

Esai 28:3

Sơgơn dơwàng bơkào jòng să ală cau bơñul ñô Epraim dê, rơp kòl jă lề hơđơm mpàng jơng.

Esai 59:17

Kơnràñ soh bơta song ring lơh gơs kung be ào lòs, mơ dô nơm sơgơn lòs bơta dong klàs hơđang bồ Kơnràñ; Kơnràñ soh ồi ào bơta sal tê, mơ pùt să Kơnràñ mơ bơta gơjrañ dờng kung be dô nơm ào jrùh.

Esai 63:6

Añ neh jă trơm ală làng bol tòm bơta gơjrañ Añ jê; neh tơnlề bol khai bơh bơta gơjrañ dờng Añ jê, mơ neh tuh tơlik mhàm bol khai dê hơđang ù.”

Ñìm Rac 1:15

Yàng Jehôwa neh sang lòi ală cau ling jak tòmlơh bơh digùl añ. Kơnràñ neh yal tŭ tơngai tòmdră mơ añ, jă trơm ală cau pơnu añ. Yàng Jehôwa jă trơm ală cau ơruh dềt Juda dê, kung be cau pat tơrnòm ño.

Jôel 3:13

Ơn tĕ mơ̆, bơh kơnhai toès neh tus. Tus tĕ pat plai ño, bơh mpal pat tơrnòm neh bềng, mơ ală thùng dờng neh bềng, bơh bơta iơh bơsak bol khai dê dờng ngan.

Mice 7:10

Gen cau sò tơm di añ rơp gŏ, mơ rơp kong bơta ƀàssìl jơm gòm khai la cau neh đơs mơ añ lah: “Ntềng đah Jehôwa Yàng Tom Trồ mê dê taih?” Mat añ rơp gŏ bơta gơplơ̆ khai dê; tŭ do khai rơp kong jă trơm hơđơm mpàng jơng kung be bŏ tòm ală gùng lòt.

Sacari 10:5

Bol khai rơp kung be ală cau ling jak tòm tiah tòmlơh, jă trơm cau sò tơm tòm bŏ tòm ală gùng ƀòn dờng; bol khai rơp tòmlơh, bơh Yàng Jehôwa ơm bal mơ bol khai, mơ bol khai rơp ơn bơta ƀàssìl hơđang ală cau hào ơseh.

Malaci 4:3

Gen bol mê rơp jă trơm ală cau iơh bơsak, bol khai rơp kung be la bùh ơm hơđơm kơndòl jơng bol mê dê tòm ngai tòm tŭ Añ lơh ală bơta hơ̆,” Yàng Jehôwa Gơnap Gơnoar Dờng Làm Jơh đơs behơ̆.