Esai 3:14 - Sră Goh 2018

¹⁴ Yàng Jehôwa cahrña tòmdră mơ ală cau kwang kra bal mơ ală cau kwang at bồ làng bol Kơnràñ dê lah: “Bol mê la cau neh sa loan suơn ño Añ jê; phan tòmpìt geh bơh cau rƀah gam prap lòi tòm ală hìu bol mê dê.

Esai 3:14 ပူးပေါင်းရင်းမြစ်များ

Sră Jop 22:4

Hơ̆ la bơh bơta dòn duh ồng dê tàng Kơnràñ lah pơrhơng ồng, Mơ cèng ồng mut tòm tiah cahrña sơl ơ?

Jakơ 2:6

Mơya oh mi lơh cau rƀah in ƀàssìl. Hơ̆ ò di la cau pas gơs rồn bơklơn oh mi, mơ hwài oh mi lòt tus di tiah cahrña ò ơ?

Amôs 4:1

Iat tĕ jơnau do, Ơ ală kơnrồ me Basan dê ơm hơđang mơnơm Samari, hơ̆ la ală cau rồn bơklơn cau rƀah lơòi mơ tơnlề cau siơ̆u siar, la ală cau đơs mơ ală bau klau bol khai lah: “Cèng tĕ bol he in ală phan ñô!”

Jeremi 5:27

Hìu bol khai bềng bơta ma blac, Be wàng bềng sềm, Tài behơ̆ tàng bol khai gơlik gơs dờng mơ pas sơm.

Esai 5:7

Suơn ño Yàng Jehôwa Gơnap Gơnoar Dờng dê, hơ̆ la hìu Israel, mơ làng bol Juda la ală chi tam Kơnràñ kòñ gơboh. Kơnràñ kơp gơn bơta song ngan, mơya neh gŏ bơta lơh gơhòr mhàm; kơp gơn bơta song ring, mơya neh kơno jơnau nggà ñìm jê sồt bòl glar.

Đơs Crih 143:2

Dan bañ cahrña di cau duh broă Kơnràñ dê, Bơh ò gơs cau kis lơi la song ring di đap Yàng.

Đơs Crih 14:4

Jơh ală cau lơh iơh bơsak ò git wă sơl ơ? Bol khai sa loan làng bol Añ jê be sa ƀañ, Mơ kung ò gơs tŭ lơi hòi dan mơ Yàng Jehôwa sơl.

Sră Jop 24:9

Gơs cau tòmpìt kòn đòi tòm tŭ ơm pô toh; mơ kup bơrkòl kòn cau rƀah.

Mathiơ 21:33

“Iat tĕ dô jơnau pơnyơu ndai. Gơs dô nă cau tòm hìu ne tam dô nơm suơn ño, lơh pơnggàr gùt dar. Tòm dơlam suơn khai tò dô nơm trồm pat ño, mơ bơt dô nơm theng kơp gàr; gen ai ală cau lơh suơn in ơpah gơ, mơ lòt hơ lơgar ndai.

Mice 6:10

Mbe Añ rgơi hŭi đam jàr iơh bơsak tòm hìu cau iơh bơsak, mơ phan kơr sơnoa ò tòm toh pal srat sơntơm sơl ơ?

Mice 2:2

Bol khai hàm kòñ ală ƀlàng sre mơ tòmpìt gơ, hàm hà hìu đam mơ tă sơmbrơt gơ. Bol khai rồn bơklơn cau tòm hìu mơ hìu; la cau mơ sre brê bol khai dê.

Sră Jop 34:23

Yàng Tom Trồ ò bơtào gơs dô tŭ tơngai cau lơi in nàng tus di đap Kơnràñ tòm bơta cahrña.

Sră Jop 24:14

Cau tơnchơt cau ñă ntào tòm kơmbuh ù, tơnchơt cau rƀah mơ cau siơ̆u siar, mơ tòm trồ mang bol khai be cau kơñau.

Đơs Crih 10:9

Khai ơm kơp tòm tiah ndơp ndơr, be klìu triă tòm tiah ơm gơ dê; Khai kơp mòc nàng kup cau rƀah, Tòm tŭ khai hwài cau rƀah tơmut tòm bơtơng khai dê.

Jơnau Pơnđik 30:14

Gơs dô jơi bơtiàn gơs gơnèng be đào, ală sề be pềs, nàng kap crè ală cau dồn sa klàs bơh ù, mơ ală cau rƀah lơòi klàs bơh jơi kòn mơnus

Esai 10:1

Bòl glar cau lơi in bơtào gơs ală bơta boh lam ò song ring, mơ cih ală bơta lơh nền rồn bơklơn,

Esai 10:2

tă tơlik gơnoar cau siơ̆u siar bơh bơta song ring, mơ tòmpìt bơta song ring bơh ală cau rƀah tòm làng bol Añ jê, ai ală cau ùr bơnrau lơh gơs phan ơn pơndòm, mơ cau kòn đòi lơh be phan tòmpìt geh.

Esai 11:4

mơya Kơnràñ ai bơta song ring nàng cahrña cau rƀah, mơ lơh nền dô bă song ring cau lơbơn niam in hơđang ù. Kơnràñ rơp pù lơh plai ù mơ dô nơm gai bơh di bơr Kơnràñ; mơ ai nhơm tă bơh sơndồi Kơnràñ mơ tơnchơt cau iơh bơsak.

Esai 14:30

Cau rƀah rlau jơh digùl ală cau rƀah rơp jòi geh phan sa, cau siơ̆u siar rơp bic rlô lơngap lơngai. Mơya Añ rơp tơnroh ryas mê dê bơh bơta jơgloh rung, gơ rơp tơnchơt ală cau gam wơl mê dê.

Esai 26:6

Ală jơng jă trơm gơ, ală mpàng jơng ală cau rƀah lơòi dê, ală cơnđòa cau siơ̆u siar dê.

Esai 29:19

Cau lơbơn niam rơp dòp geh bơta hòn chò pa tòm Yàng Jehôwa; mơ cau siơ̆u siar rơp hòn chò tòm Bơtau Sàng Goh Israel dê.

Esai 30:12

Behơ̆ tàng, Bơtau Sàng Goh Israel dê đơs be do: “Tài bơh bol mê neh sang lòi jơnau do mơ kơnòm di bơta rồn bơklơn, mơ bơta blac pơrlồm, mơ dòn kơnòm di bol khai.

Esai 58:4

Sền ne, bơta ơt sa bol mê dê mìng cèng tus bơta tòmlah tòm pơndang bal mơ bơta tòmlơh; mơ sơmbat tê iơh bơsak. Bol mê ơt sa kung be bol mê lơh tòm ngai do rơp ò lơh sap đơs bol mê dê geh kơno tòm tiah jơnhoa.

Ejekiel 18:12

Khai rồn bơklơn cau rƀah lơòi mơ cau siơ̆u siar, mơ khai tìs glài ntung kơñau. Khai ò ai wơl phan ai bồ cau ai khai in, khai wèt sền di ală rùp ràk mơ lơh ală bơta cù kìr.

Ejekiel 20:35

Añ rơp cèng bol mê tus tòm ƀlàng ngềt ngơt ală làng bol dê, tềng hơ̆, Añ rơp cahrña bol mê mat tòm toh mơ mat.

Ejekiel 20:36

Añ neh cahrña ồng pàng bol mê dê tòm ƀlàng ngềt ngơt lơgar Ejiptơ dê mbe lơi gen Añ kung rơp cahrña bol mê behơ̆ sơl,’ Jehôwa Yàng Tom Trồ đơs behơ̆.

Mice 3:3

la cau sa poac làng bol Añ jê, klò gơltau bol khai dê mơ dơrpă ală ntìng bol khai dê gơlik rpot rpet; Bol mê la cau tơcoh bol khai kung be poac tòm glah, kung be poac tòm chàng taih?”

Lebi 25:14

Dilah bol mê tac ù tiah mơ dô nă cau lơgar tòm in hala blơi bơh di khai gen bañ lơh blac pơrlồm di oh mi he.

Lebi 25:17

Bañ sa kơrlơm bơh di oh mi he mơya rngòt tĕ di Yàng Tom Trồ. Añ la Jehôwa Yàng Tom Trồ bol mê dê.

Jeremi 12:10

Oă cau ê belàt neh tơnroh suơn ño Añ jê, Jă trơm pơnah sre brê Añ jê, Lơh pơnah ù tiah Añ kòñ gơboh Gơlik gơs dô bă tiah srau gòi ngềt ngơt.

Amôs 2:7

Bol khai jă jơng hơđang bồ cau rƀah lơòi tus di thul tòm ù, mơ chồl tơlo cau gơkòl jê sồt bơh di gùng song ring. Bèp mơ kòn bic mơ mìng dô nă cau ơruh, behơ̆ gen sơnđan sàng goh Añ jê neh gơkòl đơs tràl sơrbil.

Mice 2:1

Bòl glar cau lơi in bơtào kai bơta jàñ bơsak, mơ broă iơh rmơh hơđang cơnòng bic bol khai dê! Tòm tŭ trồ rìng àng, bol khai lơh gơs bơta hơ̆ tài bơh gơ ơm tòm gơnoar bol khai dê.