Esai 13:6 - Sră Goh 2018

⁶ Ñìm rac tĕ, bơh ngai Yàng Jehôwa dê neh rềp; ngai hơ̆ tus kung be bơta tơnroh bơh Bơtau Gơnap Gơnoar Làm Jơh.

Esai 13:6 ပူးပေါင်းရင်းမြစ်များ

Sră Jop 31:23

Bơh añ rngòt di bơta rung rài tus bơh Yàng Tom Trồ, Mơ añ ò rgơi ơm di đap mat bơta ryŭ ryơm Kơnràñ dê.

Esai 10:25

Bơh gam dô êt jŏ tai, bơta gơjrañ Añ jê rơp tus di tŭ lồi; mơ bơta gơjrañ dờng Añ jê rơp wèt hơ bơta tơnroh bol khai.”

Esai 10:3

Ñchi bol mê rơp lơh tòm ngai lơh glài, tòm bơta rung rài rơp tus bơh tiah ngài taih? Bol mê rơp ntoat dô tus hơ ñcau nàng geh dong kòl taih? Ntềng đah bol mê rơp prap lòi phan mơna bol mê dê taih?

Esai 13:9

Do, ngai Yàng Jehôwa dê tus, iơh rmơh, bal mơ bơta gơjrañ dờng mơ gơhào gơjrañ, nàng lơh plai ù in gơlik gơs dô bă tiah srau gòi, mơ tơnroh ală cau tồi glài tòm hơ̆.

Esai 14:23

“Añ rơp lơh ù tiah gơ dê gơlik gơs tiah klàng kò in, mơ gơlik gơs tiah bŏ ală phan brê in; Añ rơp pơs gơ mơ pơrnơs bơta tơnroh dê.” Yàng Jehôwa Gơnap Gơnoar Dờng đơs behơ̆.

Esai 14:31

Ơ mpồng ƀòn, ñìm rac tĕ! Ơ ƀòn dờng, nggà driau tĕ! Ơ jơh tơl nă cau Philistin, lề lac tĕ! Bơh ñhŭ tus bơh đah đang, mơ ò gơs dô nă cau lơi sang lòi mpồl ling he dê.”

Esai 2:12

Bơh Yàng Jehôwa Gơnap Gơnoar Dờng gơs dô ngai, tòmdră mơ jơh ală cau pơnhừ să mơ ală cau jòng să, mơ tòmdră mơ jơh ală cau yò tơngguh is să he;

Esai 23:1

Jơnau đơs hwơr bơh Tirơ: Ơ ală ơhò Tarsi, ñìm rac tĕ! Tài bơh Tirơ neh kong tơnroh, ò gam hìu tum hala gùng lòt! Tòm tŭ bol khai tus bơh Kittim, bol khai neh git bơh jơnau yal hơ̆.

Esai 34:2

Bơh Yàng Jehôwa gơhào nùs tòmdră mơ ală lơgar; bơta gơjrañ dờng Kơnràñ dê tòmdră mơ jơh ală mpồl ling bol khai dê; Kơnràñ lơh bol khai in gơkòl tơnroh, Kơnràñ rơp jào bol khai tòm bơta hàl tơnchơt.

Esai 34:8

Bơh Yàng Jehôwa neh gơs dô ngai nàng sal tê, gơs dô nam nàng lơh cơng bơh bơta gơrềng tus di Siôn.

Esai 47:11

Mơya bơta iơh rơp tus mơ ai, mơ ai rơp ò rgơi ting bơtrơh gơ. Dô bơta bòl glar rơp dùh hơđang ai, mơ ai ò geh pleh klàs kơnòm di phan tơwài; dô bơta tơnroh rơp tus hơđang ai nisơna la bơta ai ò git.

Esai 52:5

Gen tàng tŭ do, ñchi Añ lơh tềng do taih?” Yàng Jehôwa đơs lah: “Sền ne, hơ̆ la làng bol Añ jê neh kong kup cèng ò bồ ơ? Ală cau at bồ bol khai dê pơt wòl.” Yàng Jehôwa đơs behơ̆ mơ gam pơnjat sùm, “sơnđan Añ jê gơkòl sền òsơp sùm kòp ngai.

Esai 61:2

nàng yal tơnggit nam ai bơta nđàc Yàng Jehôwa dê, mơ ngai sal tê Yàng Tom Trồ bol he dê; nàng pơndòm pơniang jơh ală cau ñìm rac pơt wòl;

Esai 63:4

Bơh ngai sal tê gơ ơm tòm nùs Añ, mơ nam dong tơwài Añ jê neh tus.

Esai 65:14

Ală cau duh broă Añ rơp đơs chò bơh nùs bềng bơta chò hòp, mơya bol mê rơp ñìm rac bơh nùs moat jrùng, rac ròc bơh hwềng nùs sràt bơtang.

Jeremi 25:34

Ơ ală cau ê, ñìm rac tĕ, pơt wòl tĕ! Ơ ală cau ê mpồl belàt, pơrlac tĕ să tòm bùh! Tài bơh ală ngai bol mê kong tơnchơt neh tus rau, mơ ngai mê kong nrah nring neh tus; Bol mê rơp gơpừ mơ bơcah kung be gri màng ryŭ.

Jeremi 49:3

“Ơ Hesbôn, ñìm rac tĕ, bơh Ahi neh kong phà tơrlah! Ơ kòn ùr Rapbah, driau nggà tĕ! Soh tĕ ào ƀào sơnò kiat, ñìm rac tĕ, mơ sơyoă să tòm bol mê mơ gai sơyoă! Bơh Milkôm rơp kong kup cèng gơs dĭ bal mơ ală cau gơnoar ơn phan duh khoai mơ ală kwang at bồ gơ dê.

Jeremi 51:8

Babilôn nisơna kong tuh tơlup mơ bơcah lề lac. Ñìm rac tĕ bơh gơ! Ai tĕ sơnơm ƀô sơm bơta jê sồt gơ; Digơlan gơ rơp geh sơmbòi

Ejekiel 13:5

Bol mê ò lòt tus di ală tiah tơrlah dơrñang dê nàng bơt wơl dô nơm dơrñang hìu Israel in, nàng gơ rơp ntào kơ̆ tòm bơta tòmlơh tòm ngai Yàng Jehôwa dê.

Ejekiel 21:12

Ơ kòn mơnus, driau nggà tĕ mơ ñìm rac, bơh hơ̆ la bơta tòmdră mơ làng bol Añ jê, tòmdră mơ jơh ală cau kwang at bồ Israel dê, bol khai kòl jào phi đào in bal mơ làng bol Añ jê. Behơ̆ tàng, tur tĕ ntơh bol mê dê!

Daniel 5:26

Do la jơnau gơtha ală jơnau hơ̆ dê: Mene la kòp, Yàng Tom Trồ neh kòp ală ngai bơtau at bồ, mơ pơndut gơ rau.

Daniel 5:9

Bơtau Belsassar rngòt rngơt oă ngan tòm nùs, muh mat khai sơlo pàl rlau tai, mơ ală cau kwang dờng khai dê ò suk ơm.

Jôel 1:11

Ơ cau lơh mìr lơh sre, gơdô nùs tĕ; Ơ cau tam ño, ñìm pơt wòl tĕ, moat jrùng tĕ bơh kòi mơ kòi pràng, tài bơh kơnhai toès tòm ƀlàng neh gơkòl tơnroh.

Jôel 1:13

Ơ ală cau gơnoar ơn phan duh khoai, soh tĕ ào bài sơnò kiat mơ ñìm rac. Ơ bol mê la cau duh broă di đap cơnòng duh khoai, ñìm rac ròc tĕ. Ơ bol mê la cau duh broă di đap Yàng Tom Trồ añ jê, tus tĕ soh ào bài sơnò kiat mang àng, bơh phan ơn mơ kòi mbo bal mơ phan ơn ñô ò gam tai tòm hìu Yàng Tom Trồ bol mê dê.

Jôel 1:15

Ơ hơh! Bơh ngai hơ̆, bơh ngai Yàng Jehôwa dê neh tus rềp! Gơ rơp tus kung be bơta tơnroh gơprah gơpring tus bơh Bơtau Gơnar Dờng.

Jôel 1:5

Ơ cau bơñul ñô, kah rngal tĕ mơ ñìm rac! Ơ jơh ală bol mê la cau jak ñô tơrnòm, ñìm rac tĕ bơh tơrnòm pa, bơh neh kong tă bơh di bơr bol mê dê.

Jôel 2:1

Uh tĕ kơlwòk tòm Siôn; ntas jơnau yal tơnggit hơđang mơnơm sàng goh Añ jê. Lòi jơh làng bol tòm lơgar rơm să, bơh ngai Yàng Jehôwa dê mòr tus, ngai hơ̆ neh tus rềp rau.

Jôel 2:11

Yàng Jehôwa lơh gơlik sap Kơnràñ dê di đap mpồl ling Kơnràñ dê, mpồl ling Kơnràñ dê la gal ngan ò rgơi kòp, mơ ală cau lơh jat jơnau sồr Kơnràñ dê ò rgơi kòp. Ngan, ngai Yàng Jehôwa dê la dờng ngan mơ kìr rngòt ngan, Ñcau rgơi kong jai taih?

Jôel 2:31

Mattơngai rơp gơlik klam jơngo, mat kơnhai gơlik gơs mhàm, lài mơ tŭ tus ngai dờng mơ rngòt rngơt Yàng Jehôwa dê.

Amôs 5:18

“Bòl glar ngan bol mê in la cau kơp gơn ngai Yàng Jehôwa dê! Ñchi bơh tài bol mê kơp gơn ngai Yàng Jehôwa dê taih? Ngai hơ̆ rơp la klam jơngo, ò gơs bơta àng;

Sôphôni 1:14

“Ngai dờng Yàng Jehôwa dê neh tus rềp, neh tus rềp mơ tus mhar. Ntas sap ñìm sràt bơtang tòm ngai Yàng Jehôwa dê, ală cau ling tòmlơh driau dờng tềng hơ̆.

Sôphôni 1:7

Ơm tĕ mŏ mŏ di đap Jehôwa Yàng Tom Trồ, bơh ngai Yàng Jehôwa dê neh tus rềp. Yàng Jehôwa neh rcang sir dô nơm phan ơn duh khoai; Kơnràñ neh ơn is ală cau neh geh jà.

Sacari 14:1

Do, ngai Yàng Jehôwa dê rơp tus tòm tŭ ală phan phà kup rơp tòmpà digùl bol mê.

Malaci 4:5

Ne, Añ rơp sồr cau gơnoar hwơr Eli tus mơ bol mê lài mơ tŭ tus ngai dờng mơ rngòt rngơt Yàng Jehôwa dê.

Jakơ 5:1

Tŭ do, ơ oh mi la ală cau pas sơm! Ñìm rac tĕ, hòi driau tài bơh ală bơta rung rài rơp tuh hơđang bol mê.

Yal Tơlik 18:10

Mơ bơh rngòt di bơta jê sồt bol glar khai dê, gen bol khai rơp ơm ngài mơ đơs lah: “Nđàc sơngit ngan, pơlai soh ngan, ƀòn dờng Babilôn la ƀòn kơ̆ cê ne! Tòm dô jơ bơta lơh glài ai neh tus rau!”