Ejekiel 13:9 - Sră Goh 2018

⁹ Tê Añ rơp tòmdră mơ ală cau gơnoar hwơr gŏ bơta gơtơnggŏ tìs mơ đơs hwơr ma blac. Bol khai rơp ò gơrê bal mơ mpồl tơrña broă làng bol Añ jê hala geh cih mat tòm sră hìu Israel dê, mơ bol khai kung rơp ò geh mut tòm lơgar Israel dê. Gen bol mê rơp git Añ la Jehôwa Yàng Tom Trồ.

Ejekiel 13:9 ပူးပေါင်းရင်းမြစ်များ

I Ală Bơtau 13:18

Gen cau hơ̆ đơs tai lah: “Añ kung la dô nă cau gơnoar hwơr be mê, mơ cau gơnrơh Yàng Jehôwa dê neh đơs mơ añ lah: ‘Cèng tĕ khai mut tòm hìu bal mơ mê, nàng khai in sa ƀañ mơ hùc dà.’” Mơya cau hơ̆ đơs pơrlồm khai.

Ejra 2:59

Tơnơ̆ do la ală cau tus bơh Tel Melah, Tel Harsa, Kerup, Akdan mơ Immer, bulah bol khai ò gơs cơng tàng bơh hìu nhă bol khai hala kòn sau bol khai dê, gơrê bal mơ làng bol Israel dê:

Nehemi 7:62

kòn sau Delaya, kòn sau Tôbiah mơ kòn sau Nekôda, kung prau rhiang poan jơt bàr nă.

Nehemi 7:64

Ală cau hơ̆ cih tơmut bol khai tòm sră cih sơnđan jơi bơtiàn, mơya jòi ò gŏ, behơ̆ bol khai kòl tă tơlik bơh gơnoar broă ơn phan duh khoai, kòp be la ò goh.

Đơs Crih 101:7

Cau lơi lơh blac pơrlồm gen rơp ò geh ơm tòm hìu añ jê; Cau lơi đơs blac rơp ò gam ơm di đap bơta gơs mat añ jê.

Đơs Crih 69:28

Dan jùt sơnđan bol khai bơh tòm sră bơta kis; Dan bañ cih sơnđan bol khai bal mơ ală cau song ring.

Đơs Crih 69:5

Ơ Yàng Tom Trồ, Kơnràñ git bơta bơrngơl gơla añ jê, Mơ ală bơta tìs añ neh lơh ò rgơi pồn bơh di Kơnràñ.

Đơs Crih 87:6

Tòm tŭ Yàng Jehôwa cih khà ală làng bol, gen Kơnràñ cih lah: “Cau do neh deh tòm Siôn.” (Selah)

Đơs Crih 95:11

Gen tàng tòm bơta gơhào gơjrañ Añ jê, Añ srat să lah: “Bol khai rơp ò geh mut tòm bơta rlô Añ jê.”

Esai 4:3

Ală cau gam wơl tòm Siôn, mơ ală cau gam ơm wơl tòm Jerusalem, hơ̆ la jơh ală cau geh sơnđan la sàng goh, jơh tơl nă cau geh cih tòm sră cau kis dê tòm Jerusalem.

Jeremi 14:15

Gen tàng, Yàng Jehôwa đơs be do bơh ală cau gơnoar hwơr ai sơnđan Añ mơ đơs hwơr, bulah Añ òhềt sồr, mơ bol khai đơs lah: “Đào tà mơ bơta jơgloh rung rơp ò tus hơđang tiah do.” Să tòm ală cau gơnoar hwơr hơ̆ rơp kong tơnroh bơh đào tà mơ bơta jơgloh rung.

Jeremi 17:13

Khoai Yàng Jehôwa, la bơta gơn kơnòm Israel dê, Ală cau lơi sang lòi Kơnràñ gen rơp kong ƀàssìl ƀàsso! Ală cau dô pleh bơh Kơnràñ rơp kong cih sơnđan hơđơm ù, Bơh bol khai neh sang lòi croh dà bơta kis, hơ̆ la Yàng Jehôwa.

Jeremi 23:20

Bơta gơjrañ Yàng Jehôwa rơp ò ruc wơl Jơl tus di tŭ Kơnràñ lơh sir mơ wil tơl bơta Kơnràñ neh lơh nền tòm nùs, Tòm ngai lồi dut, bol mê rơp git wă loh làng bơta hơ̆.

Jeremi 4:9

Yàng Jehôwa đơs: “Tòm ngai hơ̆, cau bơtau mơ ală kwang at bồ gơdô nùs; Ală cau gơnoar ơn phan duh rngòt rngơt, Ală cau gơnoar hwơr mơp dơl.”

Ejekiel 11:10

Bol mê rơp gơpừ bơh đào; mơ Añ rơp cahrña bol mê di tiah nhàr lơgar Israel dê. Gen bol mê rơp git lah Añ la Yàng Jehôwa.

Ejekiel 12:20

Ală ƀòn dờng gơs cau ơm rơp kòl sang lòi srau gòi, mơ ù tiah rơp kong sang lòi ngềt ngơt. Gen bol mê rơp git lah Añ la Yàng Jehôwa.’”

Ejekiel 13:14

Añ rơp sòr tơrlah dơrñang mơ bol mê neh pih mơ cùr bò, mơ rơp tơmù gơ tus di ù, tian gơs mpòl mơnàng gơ. Tòm tŭ gơpừ tơrlah, bol mê rơp kong tơnroh tòm dơlam gơ, mơ bol mê rơp git lah Añ la Yàng Jehôwa.

Ejekiel 13:23

gen tàng bol ai rơp ò tai gŏ bơta gơtơnggŏ blac hala đơs hwơr tai. Añ rơp dong tă làng bol Añ klàs bơh di tê bol ai. Gen bol ai rơp git Añ la Yàng Jehôwa.’”

Ejekiel 20:38

Añ rơp lơh goh bơta tòmdră bơh digùl bol mê, mơ ală cau tòmdră mơ sòdră di Añ. Añ rơp cèng bol khai lik bơh di lơgar mơ bol khai ơm ing, mơya bol khai rơp ò geh mut tòm lơgar Israel dê. Gen bol mê rơp git Añ la Yàng Jehôwa.

Daniel 12:1

“Tòm tŭ tơngai hơ̆, Mikael la cau gơnrơh dờng, cau sền gàr làng bol mê dê rơp guh. Rơp gơs dô tŭ tơngai jê sồt bòl glar tian gơs bơh tŭ pa bơtào gơs ală lơgar tus di tŭ tơngai hơ̆ kung ò gơs tŭ lơi gơs behơ̆. Mơya tòm tŭ hơ̆, làng bol mê dê cau lơi geh cih sơnđan mat tòm sră gen rơp geh dong klàs.

Sră Ôse 4:5

Mê rơp gơtup pừ tòm trồ ngai, mơ ală cau gơnoar hwơr kung gơtup pừ bal mơ mê tòm trồ mang sơl. Behơ̆ Añ rơp tơnroh mè mê dê.

Sră Ôse 9:3

Bol khai rơp ò gam ơm wơl tòm lơgar Yàng Jehôwa dê; mơ Epraim rơp rê wơl hơ Ejiptơ, mơ tòm Asiri bol khai rơp sa phan sa ƀơ̆ ƀơl.

Mice 3:5

Do la jơnau Yàng Jehôwa đơs bơh ală cau gơnoar hwơr neh lam làng bol Añ jê tìs nrah, la cau hòi driau lah: “Ring lơngai!” Tòm tŭ bol khai ò gơs phan lơi nàng sa, gen bol khai yal tơnggit bơta kơlìn tòmdră mơ cau lơi ò cèng phan lơi bol khai in sa.

Mice 3:6

Gen tàng trồ mang rơp tus hơđang bol mê, ò gơs bơta gơtơnggŏ, mơ bơta klam jơngo, ò gơs jơnau yal tơlik. Mattơngai rơp ñơp hơđang ală cau gơnoar hwơr, mơ trồ ngai rơp gơlik jơngo hơđang bol khai.

Luka 10:20

Bulah behơ̆, bañ hòn chò bơh ală cà dòn duh bol mê, mơya hòn chò tĕ bơh sơnđan mat bol mê dê neh geh cih hơđang trồ.”

Philip 4:3

Ơ bi la cau dòn song tui yô bal mơ añ, añ kung dan bi dong bàr nă cau ùr hơ̆, bơh bol khai neh kong bòl glar lơh broă bal mơ añ tòm Jơnau Niam; kung be Kleman mơ ală oh mi ndai lơh broă bal mơ añ; sơnđan mat ală cau hơ̆ Yàng Tom Trồ neh cih tòm sră bơta kis rau.

Hebrơ 12:23

tus hơ Hìu Jum Goh ală kòn tơnhoa dê neh cih sơnđan mat hơđang trồ, tus hơ Yàng Tom Trồ la Kwang Cahrña tơl nă cau, tus hơ hwềng soàn ală cau song ring dê neh geh wil tơl,

Yal Tơlik 13:8

Jơh ală cau ơm tòm plai ù rơp duh khoai gơ, hơ̆ la ală cau lài mơ tŭ òhềt crơng gơs trồ tiah sơnđan mat bol khai ò geh cih tòm sră bơta kis Belàt Kòn dê neh kong chơt.

Yal Tơlik 19:20

Phan poan jơng kòl kup bal mơ cau gơnoar hwơr ma blac la cau neh lơh ală tềl krơi di đap gơ, nàng pơrlồm ală cau neh dòp tềl phan poan jơng dê mơ ală cau duh khoai rùp gơ; bàr nă bol khai gam kis mơ kong sơrbì tòm brong ồs hơng mơ siau.

Yal Tơlik 20:12

Añ gŏ ală cau chơt, dờng mơ dềt, ơm ntào di đap sơbàn mơ ală sră geh pò tơlik. Kung gơs dô dap sră ndai geh pò tơlik sơl la sră bơta kis. Ală cau chơt kong cahrña jat be ală bơta neh cih tòm ală sră hơ̆, jat be ală broă bol khai neh lơh.

Yal Tơlik 20:15

Dilah cau lơi ò geh cih sơnđan mat tòm sră bơta kis gen kong sơrbì tòm brong ồs hơ̆ sơl.