Ejekiel 12:2 - Sră Goh 2018

² “Ơ kòn mơnus, mê ơm digùl dô nơm làng bol jak tòmdră. Bol khai gơs mat nàng sền mơya ò gŏ, gơs tồr nàng iat mơya ò kơno, bơh bol khai la dô nơm làng bol jak tòmdră.

Ejekiel 12:2 ပူးပေါင်းရင်းမြစ်များ

II Ală Bơtau 17:14

Mơya bol khai ò bài iat, bol khai kư̆ kơldang bồ, be ală ồng pàng bol khai dê ò dòn di Jehôwa Yàng Tom Trồ bol khai dê.

II Ală Bơtau 17:15

Bol khai sền òsơp ală bơta boh lam mơ bơta ho bal Kơnràñ neh bơtào mơ ồng pàng bol khai dê, mơ ală jơnau yal tơnggit mơ Kơnràñ neh ai bol khai in. Bol khai lòt jat ală rùp ràk ma blac, mơ bol khai gơlik gơs ma blac, bol khai đòm krơh ală làng bol ơm gùt dar, bơh ală làng bol hơ̆ mơ Yàng Jehôwa neh ai gơnoar sồr bol khai lah bañ đòm jat krơh bol khai dê.

Đơs Crih 78:40

Ò git nđò dơ̆ bol khai sòdră mơ Kơnràñ tòm ƀlàng ngềt ngơt, Mơ lơh Kơnràñ in moat jrùng jê sồt tòm ƀlàng bràs.

Esai 1:23

Ală cau kwang at bồ ai dê la cau pơrlơ̆ dră, lơh yô mơ cau ntung kơñau, jơh tơl nă bol khai hàm kòñ phan sa loă, mơ jòi ală phan ai gòi. Bol khai ò dong tò cau kòn đòi, ò pơnring bơta cau yă cau ùr bơnrau.

Esai 30:1

Yàng Jehôwa đơs: “Ơ ală kòn sau jak tòmdră, bơtào rơndap tơnggume broă ò jat nùs Añ; lơh gơs dô bă bal tòmdră mơ nùs kòñ Añ jê, bơtơl tồi glài hơđang tồi glài;

Esai 30:9

Bơh bol khai la dô nơm làng bol jak tòmdră, kòn sau ò gơs bơta dòn, kòn sau ò bài iat jơnau bơto sồr Yàng Jehôwa dê.

Esai 43:8

Cèng tơlik tĕ ală cau gơs mat mơya ò gŏ, gơs tồr mơya ò kơno.

Esai 44:18

Bol khai ò git bơta lơi, bol khai ò git wă bơta lơi; gar mat bol khai gơkòl lềt wơl gen tàng bol khai ò rgơi gŏ, nùs tồr bol khai gơkòl kal wơl gen tàng bol khai ò rgơi git wă.

Esai 6:5

Tŭ hơ̆ añ đơs: “Bòl glar añ in! Dut rài añ rau! Bơh añ la cau gơs sơndồi ƀơ̆ ƀơl, mơ añ kis digùl dô nơm làng bol gơs sơndồi ƀơ̆ ƀơl, mơ bơh mat añ neh gŏ Bơtau la Yàng Jehôwa Gơnap Gơnoar Dờng.”

Esai 65:2

Añ neh pò tê Añ jê jơh ngai mho wèt mơ dô nơm làng bol jak tòmdră, la ală cau lòt tòm ală gùng ò niam, jat nùs kơlôi sơnơng is bol khai dê,

Jeremi 4:17

Bol khai gơrwàng Jerusalem be cau kơp gàr sre; Tài bơh gơ neh pơrlơ̆ dră mơ Añ.’” Yàng Jehôwa đơs behơ̆.

Jeremi 5:21

Iat tĕ bơta do, ơ làng bol tùl gơla mơ ò wă wơng, La làng bol gơs mat mơ ò gŏ, Gơs tồr mơ ò kơno.”

Jeremi 5:23

Mơya làng bol do gơs nùs kră kơldang mơ jak pơrlơ̆ dră, Jơh tơl nă dô pleh mơ lòt ngài.

Jeremi 7:26

Mơya bol khai ò iat Añ, ò ơn tồr kơno, mơya lơh ngko bol khai kră kơldang. Bol khai lơh bơta iơh rmơh oă rlau mơ ồng pàng bol khai neh lơh.”

Ejekiel 12:1

Gơs jơnau Yàng Jehôwa đơs mơ añ lah:

Ejekiel 12:25

Mơya Añ la Yàng Jehôwa, Añ rơp đơs jơnau lơi Añ đơs, mơ jơnau hơ̆ rơp gơlik gơs di ngan, ò òbat nyà. Mơya tòm ală ngai bol mê dê, ơ làng bol jak tòmdră, Añ rơp lơh gơlik gơs di ngan ală jơnau Añ đơs, Yàng Jehôwa đơs behơ̆.”

Ejekiel 17:12

“Đơs tĕ mơ hìu jak tòmdră do lah: ‘Bol mê ò git bơta hơ̆ gơs jơnau gơtha mbe lơi ơ?’ Đơs tĕ mơ bol khai lah: ‘Bơtau Babilôn neh lòt tus tòm Jerusalem, neh kup cau bơtau mơ ală cau ryŭ ryơm gơ dê cèng bal mơ khai hơ Babilôn.

Ejekiel 2:3

Kơnràñ đơs lah: “Ơ kòn mơnus, Añ sồr mê lòt tus hơ làng bol Israel, tus hơ dô nơm làng bol jak tòmdră neh tòmdră di Añ; bol khai bal mơ ồng pàng bol khai dê neh tìs glài tòmdră mơ Añ jơl tus ngai do.

Ejekiel 24:3

Yal tĕ mơ hìu jak tòmdră in dô jơnau đơs pơnhồr mơ đơs mơ bol khai do la jơnau đơs Jehôwa Yàng Tom Trồ dê: ‘Ơn tĕ glah hơđang bơnhă ồs, ơn tĕ hơđang mơ tuh dà tòm hơ̆.

Ejekiel 3:9

Añ rơp lơh bìng liang mê dê gơlik kung be lŭ kră ngan, kră rlau mơ lŭ tơrneh. Bañ rngòt di bol khai hala rơm să tài bơh bol khai, bulah bol khai la dô nơm hìu jak tòmdră.”

Ejekiel 44:6

Đơs tĕ mơ hìu jak tòmdră Israel dê lah: Do la jơnau đơs Jehôwa Yàng Tom Trồ dê: ‘Ơ hìu Israel, ală broă lơh iơh bol mê dê pal kòl pơndut!

Jơnau Niam Jat Mak 4:12

Tồ bol khai in: sền gen gŏ mơya ò git đal, iat gen kơno mơya ò git wă. Behơ̆ gen bol khai rê wơl mơ geh toh glài mòn.”

Luka 8:10

Kơnràñ đơs lah: “Neh ai bol mê in git ală bơta ndơp ndơr lơgar Yàng Tom Trồ dê, mơya gơwèt mơ ală cau ndai gen ngui jơnau pơnyơu, nàng bol khai in sền mơ ò gŏ, kơno mơ ò git wă.

Jang 12:40

“Yàng neh lơh mat bol khai jơngo, nùs bol khai kră kơldang, Rngòt mat bol khai sền gŏ, nùs bol khai git wă, Mơ gơjrañ sang glài, Nàng Añ sơmbòi bol khai in.”

II Kôrintô 3:14

Mơya nùs bol khai neh gơs kră kơldang; jơl tus dê ngai do tòm tŭ sền Sră Goh Bơta Ho Bal Yau, gen bài kơrnìng hơ̆ òhềt tă tơlik, ngan la mìng tòm Bơtau Krist mơ bài kơrnìng hơ̆ geh tă tơlik.

Ephesô 4:18

nùs bol khai klam jơngo, ơm ngài mơ bơta kis Yàng Tom Trồ dê, tài bơh bơta bơrngơl gơla tòm bol khai gơlik bơh nùs kră kơldang bol khai dê.

Yal Wơl 29:3

Mat tòm bol mê neh gŏ ală broă gơlòng bòl glar dờng hơ̆, ală tềl is crih crài mơ ală bơta krơi dờng.

Yal Wơl 29:4

Mơya jơl tus di tŭ do Yàng Jehôwa òhềt ai bol mê in dơngoh jak nàng git wă hala ală gar mat nàng sền gŏ hala ală trồm tồr nàng kơno.

Yal Wơl 31:27

Bơh añ git bol mê la dô nơm làng bol jak tòmdră mơ kơldang bồ. Dilah bol mê neh bơtào tòmdră mơ Yàng Jehôwa tòm tŭ añ gam kis digùl oh mi, tơ ài lah tơnơ̆ mơ tŭ añ neh chơt rau gen bol mê rơp bơtào tòmdră oă rlau tai!

Yal Wơl 9:24

Bol mê sùm sùm bơtào tòmdră mơ Yàng Jehôwa bơh di ngai añ mòng git mơ bol mê.

Yal Wơl 9:7

Kah tĕ bơta do mơ bañ gơs tŭ lơi hŭi mbe bol mê neh bơrcek Jehôwa Yàng Tom Trồ bol mê dê gơhào gơjrañ tòm ƀlàng ngềt ngơt. Bơh di ngai bol mê lik bơh Ejiptơ jơl tus di tŭ bol mê tus hơ tiah do, bol mê kư̆ bơtào tòmdră mơ Yàng Jehôwa sùm.