Đơs Chò 5:6 - Sră Goh 2018

⁶ Añ guh nàng pò mpồng cau kòñ gơboh añ in, mơya cau kòñ gơboh añ jê neh wơlke lòt rau. Tòm tŭ khai đơs nùs añ gơplơ̆. Añ jòi khai, mơya ò bàn; añ hòi khai mơya khai ò ho wơl.

Đơs Chò 5:6 ပူးပေါင်းရင်းမြစ်များ

Sơnròp Gơlik Gơs 42:28

Gen khai đơs mơ ală oh mi khai lah: “Priă añ jê neh cau ơn wơl, gơs tòm rơnđò añ do!” Ală bol khai bìr bồ rơm să mơ đơs bal lah: “Ñchi Yàng Tom Trồ neh lơh bol he in be do taih?”

II Samuel 16:10

Mơya bơtau ho lah: “Ơ ală kòn klau Jeruya, ñchi bơta gơkoă digùl bol mê mơ añ taih? Dilah khai srat rma gen hơ̆ la Yàng Jehôwa neh đơs mơ khai lah: ‘Srat rma tĕ Dabit.’ Behơ̆ ñcau rgơi lùp lah: ‘Ñchi bơh tài mê lơh behơ̆ taih?’”

Đơs Crih 28:1

Ơ Yàng Jehôwa, añ hòi dan mơ Kơnràñ; Ơ pơnai lŭ añ jê, bañ sềt tồr di añ, Bơh dilah Kơnràñ ơm mŏ mŏ mơ añ. Gen añ gơlik gơs be ală cau mù tòm bơtô.

Đơs Crih 30:7

Ơ Yàng Jehôwa, bơh bơta nđàc Kơnràñ dê, Kơnràñ neh bơtào añ kơ̆ be mơnơm dờng; Kơnràñ pồn mat gen añ ò suk ơm.

Đơs Crih 69:3

Añ bòl glar bơh añ ñìm sùm, rnồng dò añ jê ro rañ, Mat añ lu li tòm tŭ añ ơm kơp gơn Yàng Tom Trồ añ jê.

Đơs Crih 77:3

Añ kah Yàng Tom Trồ mơ añ rac ròc; Añ kơlôi sơnơng is mơ gơplơ̆ nùs. (Selah)

Đơs Crih 80:4

Ơ Jehôwa Yàng Tom Trồ Gơnap Gơnoar Dờng Làm Jơh dê, Nđò jŏ Yàng gơhào gơjrañ wèt hơ jơnau hòi dan làng bol Kơnràñ dê taih?

Jơnau Pơnđik 1:28

Gen bol khai rơp hòi rac mơ añ, mơya añ rơp ò ho wơl; Bol khai rơp jơh nùs jòi jat añ mơya ò bàn.

Đơs Chò 5:2

Añ bic, mơya nùs añ gam kah rngal. Iat! Cau kòñ gơboh añ teh mpồng lah: “Pò tĕ mpồng añ in! Ơ oh ùr añ jê, cau kòñ gơboh añ jê, sềm ntòp añ jê, cau niam wil tơl añ jê! Bơh bồ añ sùh mơ dà tŭ, ală cap sŏ añ sùh bơh tơioh dà trồ mang dê.”

Đơs Chò 5:4

Cau kòñ gơboh añ tơmut tê tòm trồm kai mpồng, nùs tồr añ rngoh rngac bơh khai.

Đơs Chò 6:1

Ơ cau hàng mơnĕ rlau jơh tòm ală cau ùr, cau kòñ gơboh ai dê ntềng đah taih? Cau kòñ gơboh ai dê lòt đah lơi taih? Bol hi rơp lòt bal mơ ai nàng jòi khai.

Esai 12:1

Mê rơp đơs tòm ngai hơ̆ lah: “Khoai Yàng Jehôwa, añ rơp ai jơnau ưnngài Yàng, bulah Kơnràñ neh gơjrañ di añ, bơta gơjrañ Kơnràñ dê neh wèt ngài mơ Kơnràñ neh pơndòm pơniang añ.

Esai 50:2

Ñchi bơh tài tòm tŭ Añ tus, ò gơs dô nă cau lơi taih? Ñchi bơh tài tòm tŭ Añ hòi, ò gơs dô nă cau lơi ho wơl taih? Tơwòr tê Añ la liah ngan tian gơs ò rgơi tơwài bol mê sơl ơ? Añ ò tơl pràn nàng dong tă bol mê sơl ơ? Mìng bơh dô jơnau lah pơrhơng mơ Añ neh lơh soat dàlềng, Añ lơh ală hiòng dà gơlik gơs ƀlàng bràs; ka tòm dà gơ dê chơt ồm bơh siơ̆u dà, mơ chơt tơhìr dà.

Esai 57:16

Añ rơp ò kơt glài sùm sùm, kung ò gơhào gơjrañ sùm sùm; bơh ală hwềng soàn rơp bòl glar di đap Añ, bulah hwềng kis mơ Añ neh crơng gơs.

Esai 58:2

Bơh kòp ngai bol khai jòi Añ; bol khai chò hòp kòñ git ală gùng dà Añ jê; gơlơh be dô nơm làng bol lơh jat bơta song ring mơ ò sang lòi ală bơta lơh nền Yàng Tom Trồ bol khai dê. Bol khai lùp Añ bơh ală bơta cahrña song ring, mơ bol khai chò hòp tus rềp hơ Yàng Tom Trồ.

Esai 8:17

Añ rơp gơn kơp Yàng Jehôwa, Kơnràñ neh pồn mat Kơnràñ dê bơh di hìu Jakôp, añ rơp gơn kơnòm di Kơnràñ!

Ñìm Rac 3:8

Bulah añ hòi driau mơ dan dong kòl, Kơnràñ neh sềt tồr ò iat jơnau hòi dan añ jê;

Sră Ôse 5:15

Gen Añ rơp rê wơl hơ tiah ơm Añ jê, jơl tus di tŭ bol khai đal git tồi glài bol khai dê, mơ jòi jat muh mat Añ; Tòm bơta bòl glar, bol khai rơp jơh nùs rac dan bơta niam nùs Añ jê.

Sră Ôse 5:6

Bol khai cèng bal ală mpồl belàt mơ ală mpồl kơnrồ bol khai dê nàng jòi jat Yàng Jehôwa; mơya bol khai rơp ò bàn Kơnràñ; Kơnràñ neh lik bơh di bol khai.

Sacari 7:13

Be tòm tŭ Añ hòi, bol khai ò bài iat, mơ tòm tŭ bol khai hòi, Añ kung ò bài iat, Yàng Jehôwa Gơnap Gơnoar Dờng Làm Jơh đơs behơ̆.

Mathiơ 26:75

Pier kah wơl jơnau Yàng Jesu neh đơs lah: “Lài mơ tŭ iar nrau, mê rơp pơndang sang Añ pe dơ̆.” Gen khai lik lòt, ñìm rac ròc pơt wòl.

Jơnau Niam Jat Mak 14:72

Tŭ hơ̆ mo iar nrau dơ̆ bàr. Gen Pier kah wơl jơnau Yàng Jesu neh đơs mơ khai lah: “Lài mơ tŭ iar òhềt nrau bàr dơ̆, mê rơp pơndang sang Añ pe dơ̆.” Dơ̆ khai kơlôi sơnơng bơh bơta hơ̆ gen khai ñìm rac.

Yal Tơlik 3:19

Ală cau lơi Añ kòñ gơboh, gen Añ lah pơrhơng mơ lơh glài tơmàl sơl; behơ̆ gơs tĕ nùs ngac ngar mơ gơjrañ sang glài tĕ.

I Samuel 28:6

Khai hòi lùp Yàng Jehôwa, mơya Yàng Jehôwa ò ho wơl khai in bơh bơta mpau, hala bơh Urim, hala bơh ală cau gơnoar hwơr.