Mbɛ an dɔ, “Domi kun ti wa an nɛ.” Mbɛ Chisɔsi ɔ, “Mbɛ fen chɛ nu, miin mu Domi kun ti wa boo fenɛ a, wo an be a ma. Mbɛ wo yɛ‑a, fen chɛ nu, miin mbe Yataa ko a, wo‑a an be Yataa ma.”
Chɛ an fɛ mu, n faa ma suun ma nyɔɛ nu Chasi ɔ, wo sɔ gban wo 'a danaya ɔ. Wo ma ka wo gba ɔ, wo ma Mansa Chisɔsi 'a wai a tima ɔ tima ko a. Koe min na mu, wo‑a a ɔ sɔn fan, wai ɔ wai, wo e min chɛ‑a Mansa chɛ ko a, a ee ma wai gbama a.
Koe min na mu, Yataa boo gba mu mmɔ a. A‑a mmɔ a dan, koe min na mu, mɔ dɔndɔɛ mu mmɔ a, mmɔ bɛ Chisɔsi a, mmɔ chɛ chɛ wai chɛndɛ ko a. Mmɔ chɛ chɛ wai chɛ nu, Yataa‑a miin to mmɔ ya ɔ, mmɔ ni tachɛ an chia chɛ n na.
Chɛ ɛ a ma‑a wan, wo ni kosan tachɛ‑a fɔɛ ɔ, min mbe nyan Mansa Chisɔsi tena, a faa ni chima a da faenɛ ɔ. Tima ɔ tima, wo e ko chɛndɛ sɛsɛ ma‑a wan. Wo 'a yiimatɛ ma ni mun‑da a si Yataa wakoe ma.
Samunɛ ni chɛ mansa n ko a, a basan mɔɛ tɔɛ chɛ n na, miin mbe sɔ tena nu. Chɛ ni ma, min mbe a ma, sɔnkɔ sɔnkɔɛ ni bɔ mmɔ 'a fɔɛ ɔ, mbɛ faachima ma‑a mmɔ ma, mmɔ ɛ ta‑a ma‑a Yataa fɔɛ ɔ, basɔmaya wɛɛ ɛ mmɔ ɔ chia ɔ chia a.
Ni i gboo ɔ ma fa ni dasi chɛ be koe a suun ma nyɔɛ n ma, ni i‑a Chisian danaya ɔ bai sa i faa ɔ, a basan kan chɛndɛ a, i bea‑a min fɛ chɛ gbɛɛ ɔ, e ma‑a wan wai chɛ mɔɛ chɛndɛ a Chisɔsi Chasi ko a.
Mɔɛ n sin mbe a bai wan a 'a ko chɛndɛ maenɛ wɛɛ ko a, min ni a ɔ. Mbɛ musu mu a a, min‑na a 'a denɛ n bɔ a ɔ chɛndɛ chɛ, a‑a a boo si sonda n kɔɔ a 'a chenɛ a, a‑a ko chɛndɛ sɛsɛ ma Chisianɛ n na. Mɔɛ miin bɛ ni yakɔɔtawa ɔ, a‑a an deman, a sin‑na a wandi be ko chɛndɛ ma a a.
Chɛ an fɛ mu, n mbe a fɔ tena i ye to, mbɛ i ni tachɛ fen chɛ a chɛndɛ chɛ, Yataa‑a boo fenɛ min be i ma, n na‑a n boo bun i ma tima min na i dua koe a.
Chɛ puin i 'a mɔɛ n yii ma, mbɛ i‑a dasi gbau gbau be an ma Yataa chen kɔɔ, i ɔ an ma koɔ kɔnɔ bai kun ma. Chɛ ee den chɛndɛ suun an ye, chɛɛ ɛ chɛ n fan yɔn gbɔkɔɔ, miin mbe an too ma sɔ‑a a ma.
A chia dɔndɔ gbe chɛ a, mɔɛ min mbe a wandi boo a ko‑a ko yama ma a, baa ɛ ma‑a wan a ma Yataa tena. A mu min na, ɛ tenchen a kun ti an ko a, a sin ma gbɔsɔɛ ɛ wan a ma. A mɔɛ tana, a ma bɛnden fan mu wai chɛndɛ chɛ koe a.
A wɛn‑na a wandi be mmɔ ko a, mmɔ bɔ koe a ko yama n dɔ, mmɔ ni ma mɔ ma koenɛ n na. Mmɔ ni ma a ta mɔɛ n na tenchen, mmɔ ma bɛndenɛ ni ma ko chɛndɛ ma koe a.
A yɛ to, mmɔ 'a mɔɛ n ni an mayan ko chɛndɛ ma bia koe a an boo fea a, min mbe a ma, an ni che an fandi deman‑da ko gbɛa tima a, an ma na ma tataya tɔɛ n na.
Tea bai an nɛ, n mbe ka min fɔ tena. N toen mu i ni koe chɛ n ma i ma gbɔsɔɛ a, min mbe a ma, mɔɛ miin kai faen mu Yataa a, an ni tachɛ gbee chɛ a. Chɛ ɛ a ma‑a wan, an ni ko chɛndɛ ma bia an boo fea a, min nyin. A sin, tɔnɔnɛ ɛ wan a ɔ, mɔ ɔ mɔ ko a.
a ni basan wo ma chia ɔ chia a, wo toen mu min na, a faa ma koe ma koe a. A sin ni a ma, Chisɔsi Chasi 'a gbasaya ɔ, mmɔ ni ko ɔ ko ma, min mbe a faa chima. A sin, tando ni ma Chasi tɔɛ ma, kuɔ fɔ ni kuɔ fɔ ko a. A ni ma ka.
Chɛ an fɛ mu, n mbe wo yiima n na che tena tun koe chɛ n ma. Wo‑a an tea n dɔ sɔn bɛɛ ka boo ɔ boo, min dɔ yian‑da wo a, a si Chisɔsi ma. A yɛ to, wo e a sɔ tena wan an tea chɛ fɛ gbau gbau.
Wo‑a chɛ ɔ sɔn bɛɛ boo ɔ boo, chɛɛ n mbe a ɔ yian‑da wan to wo a. Mbɛ Yataa na‑a Isɔɛɛ mɔɛ n bɔ wan yɔncha ɔ Ichipi chɛnyɛ ɔ. Chɛɛ chɛ gbakɔ, an dɔ nu, a‑a an kasaa wan, koe min na mu, an ma dɔn ni dan koe a a wan Yataa a.