MATIU 24:24 - Yataa 'a Dɔbɛnɛ Nama

²⁴ A mu min na, fania kunka mansa an mbe na‑a wan, an basan fania fɔ mɔɛ n na, miin mbe an fandi ya Yataa 'a gbonka chɛ mɔɛ n na. An mbe kamaya koe n ma‑a wan, an ni koe tɔmɔsi n yian, mɔɛ n woo koe a. Ni an mbe kun fan, an mbe mɔɛ chɛ n bɛɛ woo‑a wan, Yataa‑a a boo sɔ miin ma, ma koe a a 'a mɔɛ n na.

MATIU 24:24 ပူးပေါင်းရင်းမြစ်များ

MATIU 22:14

Mbɛ Chisɔsi ɔ te gbɛ, “Yataa 'a chenɛ da a kaen fan mu mɔ sɛsɛ ko a, chɛɛ miin mbe don nɔ, an ma kɔkoo.”

MATIU 24:11

A tima chɛ a, mɔ sɛsɛ n mbe fania fɔ‑a wan, mbɛ Yataa 'a gbonka chɛ mɔɛ mu an na. An sin mbe mɔ sɛsɛ n sɔ‑a wan chia yama ma.

MATIU 24:22

Chɛɛ Yataa‑a a tee chɛ n ma wua, ko yawaen bia tee chɛ nu. Ni a nii ma an ma wua ni, mɔ gbu kan kɔ kan kun nii bɔ‑a a ɔ. Chɛɛ a‑a tee chɛ n ma wua a 'a mɔɛ chɛ n fan ko a, a‑a a boo sɔ miin ma, an ma koe a a 'a mɔɛ n na.”

MATIU 24:25

Wo‑a ɔ yen gbɛ, mbɛ koe miin mbe na tena ma‑a, n ban‑da an dɔ yian‑da wo a.

MATIU 24:31

Ni buu fɛ‑a gbankon, n mbe n 'na maeka n na ta‑a wan dunya gbɛɛ ɔ, an ni mɔɛ chɛ n na sɔn sɔn, n‑na n boo sɔ miin ma, ma koe a n 'na mɔɛ n na.”

MATIU 24:5

Koe min na mu, mɔ sɛsɛ n mbe na‑a wan n tɔɛ ɔ. An mbe a fɔ‑a wan, an dɔ, an fan mu Chasi a, kunka mansa. A sin, an mɔɛ chɛ n mbe mɔ sɛsɛ sɔ‑a wan chia yama ma.

MATIU 7:15

Chisɔsi ɔ, “Wo wo kun ma fɛn mɔɛ chɛ n boo ɔ, miin mbe fania fɔ, mbɛ Yataa 'a gbonka chɛ mɔɛ mu an na. An mbe na‑a wan wo tena, an ma chimaenɛ a, yɔ sa. Chɛɛ min mu ka, tea tea ɔ, an yau yɔ yaa.

MAKI 13:22

A mu min na, fania kunka mansa an mbe na‑a wan, a basan fania fɔ mɔɛ n na, miin mbe an fandi ya Yataa 'a gbonka chɛ mɔɛ n na. An mbe kamaya koe n ma‑a wan, an ni koe tɔmɔsi n yian, mɔɛ n woo koe a. Ni an mbe kun fan, an mbe mɔɛ chɛ n bɛɛ woo‑a wan, Yataa‑a a boo sɔ miin ma, ma koe a a 'a mɔɛ n na.

DUKU 18:7

Ni ɛ chɛ ma wan, mbɛ Yataa ɛ tea be‑a wan a 'a mɔɛ n ma, miin mbe di chɛ‑a a tena su ɔ tee a. A ee wo sa‑a tima ma, tee ɔ tee a.

CHƆN 4:48

Mbɛ Chisɔsi ɔ a ma, a ɔ, “Wo wan, ni wo ma kamaya koe n dɔ yen ni ma‑a, wo dɔndɔ wɛɛ ee wo kai fa n na.”

CHƆN 6:37

Chɛɛ chɛ gbɛɛ ɔ, Fa Yataa‑a miin be n ma, an mbe na‑a wan n tena. N sin, n mbe ee mɔ ɔ mɔ a yɛ‑a, min mbe na‑a n tena.

CHƆN 6:39

A sin, a wɛn‑na n sɔ, a faa ma koe n fan nɛ. Mbɛ n ma fo a 'a mɔɛ chɛ n dɔndɔ wɛɛ a, mɔɛ chɛ nu, a‑a miin be n ma. Chɛɛ tee dankama ma, n ni a ma, an gbɛɛ kɔɔ ni sɔ, a yɛ fɔɛ ɔ.

CHISƆSI 'A SƆ MƆƐ NU 20:16

Pɔɔ yiima ɔ bɛnden fan ni, a ni Ɛfisɔsi ma sangba. Koe min na mu, a nii ma to ni tima kan kɔ kan yayi koe a Esia chɛnyɛ ɔ. A toen ni tachɛ a gbandi ma an chɛ koe a. Ni a ni bɛn fan, a ni che Chuusaɛn duu ɔ, tee chɛ ma, an ni min chee Pɛndekɔsi.

GBOO DOMI KO A 12:18

Wo ta nan gbu, wo butuin chɛ chia ɔ chia a, wo ni ma faachima ɔ mɔ ɔ mɔ a.

Gboo Kadesia Ko A 4:15

Buɔdia min ni wo ɔ, n ma a ɔ sɔn ɛ gbɛ buɛ min dɔ. Ni wo ni kun fan, wo ni wo ya n bɔ, wo ni an be n ma, wo ni a ma‑a wan. N mbe chɛ siiya bɔ wan.

2 TIMOTI 2:19

Chɛɛ Yataa‑a fenɛ min kuu si gban, a ɔ ee ma‑a. A sin, bai chɛ, an nyɛnden mu a si a ma, a ɔ, “Mansa Yataa‑a a ɔ sɔn fan mɔɛ miin mbe a ko a,” a sin to, a ɔ, “Miin mbe a fɔ‑a, mbɛ an mbe Mansa Yataa an ko a, an ni an kan kɔ sɔ an 'na ko yama a.”

1 PITA 1:5

Wo danɛ min chɛ‑a Chisɔsi Chasi a, an fɛ mu Yataa ɛ wo kun ma fɛn tena gbasaya ɔ, aan wo ni bauncha ma sɔn. Wo e an bauncha chɛ sin ma sɔn‑da tee dankama tee ma wan.

2 PITA 3:17

Chɛɛ n dia nyɔɛ nu, wo tana, wo‑a chɛ ɔ sɔn fan gbɛ. Chɛ an fɛ mu, wo wo kun ma fɛn, sawa sɔn bai chɛ n ma na a ma, wo ni saman, mbɛ wo ka‑a chia ma. An ni a ma, wo ni bea, a bɔ wo sɔ tena chɛndɛ chɛ ɔ.

1 CHƆN 2:18

N 'na denɛ nu, mmɔ ɛ ka gbɛ tee dankama tee an kɔɔ, Chisɔsi Chasi na koe a to. A na‑a a fɔ wan wo ye, mbɛ Chasi chɛɛ ma nyɔɛ ɛ na tena wan, ɛ bɔ‑a mɔ gbu n tɛ ɔ wan. Sanche chɛ ɔ, a chɛɛ ma nyɔɛ n‑na an kun na bɔ. Chɛ an mbe a ɔ yian mmɔ a, mbɛ tee dankama tee che‑a.

1 CHƆN 2:22

Fania fɔ mɔɛ, a mu mɔɛ chɛ an na, min mbe kɔɔ sa bia chɛ, mbɛ Chisɔsi an ma Chasi a, kunka mansa. An mɔ bonda chɛ an mu Chasi chɛɛ ma nyɔɛ a, mɔɛ min mbe ban Fa Yataa ɔ, an fea a 'a denɛ a.

1 CHƆN 5:18

Mmɔ danden fan mu chɛ a, mbɛ Yataa 'a denɛ nu, an mbe ee an boo a chii ko yama ma ma. Koe min na mu, Yataa 'a denɛ Chisɔsi ɛ an kun ma fɛn fan. Nyina yama chɛ sin, Sitana, a ee che ko ma‑a an na.

KO Ɔ NUNDENƐ 19:20

Mbɛ an‑na soe yama chɛ bia wan, an fea fania fɔ mɔɛ chɛ a, min ni a wandi ya Yataa 'a gbonka chɛ mɔɛ a. A‑a kamaya koe n ma wan an soe yama chɛ ya kɔɔɛ ma. An koe chɛ n fan na‑a mɔɛ chɛ n bun, miin na‑a soe yama chɛ 'a nyɛnɛ sa an ma, miin bɛɛ na‑a fen chɛ fai, fenɛ min bɔen ni soe yama chɛ a. Soe yama chɛ, an fea soe yama fean bɔɛ chɛ a, an na dɛ‑a wan ta man ba chɛ ɔ, sen gbandima wa faen ni min na.