GBOO IBU MƆƐ N KO A 2:18 - Yataa 'a Dɔbɛnɛ Nama

¹⁸ Koe min na mu, a wandi gbu wɛɛ, Sitana na‑a a yiima yan fan, ko yama ma koe a. A sin, a tɔɔya‑a wan. Chɛ ko a, ɛ che wan, a ni mɔɛ n deman, Sitana ɛ miin yiima yan‑da, ko yama ma koe a.

GBOO IBU MƆƐ N KO A 2:18 ပူးပေါင်းရင်းမြစ်များ

DUKU 22:28

“Wo to‑a wan n fɛ tima ɔ yansama ko a, n 'na ko yawaenɛ n gbɛɛ ɔ.

DUKU 22:53

Mmɔ‑a tee sɛsɛ wa chɛ gbɛɛ ban Yataa 'a kata ɔ, wo ma n bia ni. Chɛɛ wo ta tima an che‑a ka wo faa ma koe ma koe a, tima min na Sitana 'a gbasaya ɛ wɛ dunya chɛ kun ma.”

CHƆN 10:29

Fa min‑na an be n ma, a 'a gbasaya benden mu fen kɔ fen ma. A sin, mɔ ɔ mɔ ee che an bia‑a gbasaya a, an ni bɔ Fa boo ɔ.

GBOO SAA KƆYINDI KO A 10:13

Dɔsiman kan kɔ kan mbe ee wo tan, min sima ma mɔ gbu tan nin bɛ. Chɛɛ Yataa ee a da a kuiɛ yɔn, a sin mbe ee dɔn dɔsimanɛ ni na mɔ gbu tena, i 'a danaya ɔ ma gbɛ min dɔ bia koe a. Ni dɔsimanɛ na‑a i tena tima min na, a tima dɔndɔ gbe chɛ kɔɔ, ɛ chia yian‑da wan e kun buɛ min dɔ, i ni bɔ a ɔ. Ɛ i ɔ gbɛa‑a wan a ɔ bia koe a.

Gboo Fiipai Ko A 3:21

Mmɔ gboo chɛ, baa a tenden mbe ee ka min ma, a wan mbe a mun‑da. A sin, ɛ a ma‑a wan, yɔ a ta gboo, min kamayaen mu. A 'a gbasaya min mbe a ɔ, min mbe a ma, fen kɔ fen mbe don a kɔɔ, ɛ an na tachɛ a a.

2 TIMOTI 1:12

A sin, chɛ an fɛ mu n mbe ka mɔnɛ bonda chɛ ɔ bia tena. Chɛɛ mau ee n dɔ, koe min na mu, n‑na a ɔ sɔn fan, n kai faen mu min na. A sin n danden fan mu a a, mbɛ a‑a fenɛ min be n ma, ɛ che wan a kun ma fɛn‑da aan a tee dankama chɛ ni che.

GBOO IBU MƆƐ N KO A 5:2

An tɛ mɔ wa chɛ, ɛ kun fan, a ni a bɔɛ n bia faa chima a. Chɛ nu, miin ma ko sɔn, ni chɛ nu miin bia koe gbɛ, ɛ an bia wan. Koe min na mu, a wandi wɛɛ, a yama chia nu, an mbe wan sɛsɛ.

2 PITA 2:9

Chɛɛ Mansa Yataa an kosan kɛn gbɛ mɔɛ n kun bɔ‑a ko gbɛama n dɔ, mɔɛ miin mbe a ko a. A sin fan kosan to mɔɛ n chɛ‑a tɔɔya kɔɔ, aan gbɛmbo tee ma, mɔɛ miin sɔnɛ yau.

CHUDA 1:24

Sanche gbɛ, mmɔ tando be Yataa ma. An mu dechee mmɔ 'a Yataa a, an mbe mmɔ baun, a 'a denɛ Chisɔsi Chasi ɔ, mmɔ 'a mansa. A wan Yataa, an mbe a ma, mmɔ ee bea, mbɛ a‑a a ma, mmɔ sɔ‑a a chen kɔɔ manɛ ɔ, mabɔ kan kɔ kan mbe ee mmɔ ma, mɔɔ buɔdia mmɔ ɔ. Mansaya, ni bemaya, a basan gbasaya a, a ka suun ma, aan sanche, ɛ Yataa an boo ɔ, kuɔ fɔ, ni kuɔ fɔ ko a. A ni ma ka.

KO Ɔ NUNDENƐ 3:10

Koe min na mu, wo‑a n da a kuiɛ a min, wo‑a wo faa bia. N bɛɛ, n mbe wo kun ma fɛn‑da wan tima chɛ a, tima min na dunya gbɛɛ ɛ ma‑a dɔsimanɛ kɔɔ, mɔɛ gbɛɛ ɛ ma‑a tɔɔya ɔ.