CHƆN 8:32 - Yataa 'a Dɔbɛnɛ Nama

³² Wo e tea ɔ gbɛ‑a wan, a si Yataa ma, a sin fan mbe a ma‑a, wo kunɛ ni bɔ yɔncha ɔ.”

CHƆN 8:32 ပူးပေါင်းရင်းမြစ်များ

MATIU 11:29

Wo kooya be n ma. Wo ni n 'na kanɛ sɔn. N chinchinchaen mu, a yɛ to, n dɔ ma fasi ni. Ni wo puin‑da n chen gba ɔ, wo e suinɛ ma sɔn‑da wan.

CHƆN 1:14

An ni a wɛn chee, an dɔ, Bai, a na‑a ma wan mɔ gbu a, koadia chinchimaya faenɛ ɛ a faa a, a basan danaya a Yataa tena. A ni wan nn tɛ ɔ. Nn na‑a a ɔ yen fan, a kamayaen ni buɛ min dɔ, kamaya min ni a ɔ, a wan Fa Yataa 'a Den dɔndɔ gbe.

CHƆN 1:17

Yataa na‑a a 'a sawa n na ben Mosisi an na, chɛɛ koadia chinchimaya tana, a basan danaya a, mmɔ‑a an ma sɔn Chisɔsi Chasi an na.

CHƆN 14:6

Mbɛ Chisɔsi ɔ, “N fan mu dechee chia a, tea ɔ sɔn koe a mɔɛ n boo ɔ, a si Fa Yataa ma, mbɛ an‑na fɔɛ ma sɔn, Fa ɛ min be. Mɔ ɔ mɔ ee che ta‑a Fa tena, mɔɔ ni a ben‑da n tena chia a.

CHƆN 16:13

Chɛɛ ni Yataa Nyina chɛ na‑a, min mbe tea ɔ yian a si Yataa ma, ɛ a ma‑a wan, wo ni tea gbɛɛ ɔ sɔn. A ee koɔ‑a wo tena a kun ma gbasaya n dɔ, chɛɛ ɛ min na min‑da Yataa a, ɛ an fɔ‑a wo ye. A sin, koe miin mbe na tena ma‑a, ɛ an fan dɔ yian‑da wo a.

CHƆN 17:17

I 'a bai an mu tea a. Chɛ an‑na a fɔ, a ma i 'a bai chɛ ni an ma, an ni ma i ko a tenchen.

CHƆN 6:45

Yataa 'a gbonka chɛ mɔ dɔndɔ‑a a nyɛn fan a 'a gboo ɔ, a ɔ, ‘Yataa ɛ mɔ ɔ mɔ kan‑da wan.’ A sin, mɔ ɔ mɔ min mbe a too ma sɔ‑a Fa kuiɛ ma, a ni a 'a kanɛ sɔn, a mɔɛ chɛ ɛ na wan n tena.

CHƆN 7:17

Mɔ ɔ mɔ min ma bɛnden mu, Yataa faa ma koe ma koe a, an mbe a ɔ sɔn, n mbe kanɛ min chɛ tena. A mɔɛ chɛ, an mbe a ɔ sɔn, ni n mbe Yataa da a bai an na ben tena. Chɛ ma, an mbe a ɔ sɔn, ni n mbe a chɛ tena n fandi kun ma an na.

CHƆN 8:36

Chɛ an fɛ mu, ni Yataa 'a denɛ‑a i kun bɔ yɔncha ɔ, mbɛ i kun bɔ‑a a ɔ chɛndɛ chɛ.

GBOO DOMI KO A 6:22

Chɛɛ sanche chɛ ɔ, wo kun bɔ‑a wo 'a ko yama n dɔ, wo ma‑a gbɛ Yataa 'a yɔnɛ n na. Wo 'a fɔɛ chɛ ɔ gbɛ, wo e gbɛ tenchen Yataa an ko a. Chɛ sin tɔnɔnɛ mu kuɔ fɔ fɔɛ an na wo ko a.

GBOO DOMI KO A 8:15

A mu min na, Yataa‑a a Nyina min be wo ma, ma koe a wo fɛ, a ee wo ma yɔnɛ n na, a ni a ma chiandia ni ma wo ɔ. Chɛɛ min mbe ma, Yataa Nyina ɛ wo ma Yataa 'a denɛ n fan na. A sin Yataa Nyina chɛ ɛ a ma‑a wan, wo ni Yataa chee, wo ɔ, wo fa.

GBOO DOMI KO A 8:2

A mu min na, Chisɔsi Chasi 'a gbasaya ɔ, mmɔ kunɛ bɔ‑a ko yama 'a gbasaya ɔ, min mbe na saya a. Yataa Nyina min mbe fɔɛ chɛndɛ be, an‑na a ma chɛ ma‑a.

GBOO SAA KƆYINDI KO A 7:22

Koe min na mu, Mansa Chisɔsi ɛ yɔnɛ min chee, a ma‑a mɔ kun kaenɛ a. A chia dɔndɔ gbe chɛ a, mɔɛ min mbe ee yɔncha ɔ, ni Mansa Chisɔsi‑a a chee, a mɔɛ chɛ ma‑a a 'a yɔnɛ a.

Gboo Kadesia Ko A 5:1

Ni yɔncha tana mu, Chasi‑a mmɔ bɔ a ɔ. Chɛ an fɛ mu, mmɔ sɔ chidi, a ko a. Wo butuin chɛ, min mbe a ma, wo ma na don to an yɔncha fanka ma chɛ kɔɔ.

Gboo Kadesia Ko A 5:13

Koe min na mu, n suun ma nyɔɛ nu Chasi ɔ, Yataa‑a wo chee wan, a bɔ yɔncha ɔ. Chɛɛ yuu min tɛ‑a ka wo ma, wo ma ben ko yama ma‑a, wo gboo faa ma koe nu, wo ni a dɛn wo bɔ koe ma yɔncha ɔ. Chɛɛ koadianyɔncha ɔ, wo ma bɔi denɛ a wo nyɔn ko a.

2 TIMOTI 3:7

An ma bɛnden fan mu tima ɔ tima ko nama kan koe a. Chɛɛ an mbe ee che an ni tea ɔ sɔn.

CHIMISI 1:25

Chɛɛ Yataa 'a sakana bai tana, a nyin kaka. An mbe mɔ gbu kun ka. Mmɔ ma nyina a ma, mmɔ a a tun mmɔ too ma sɔ koe a a ma, mmɔ tachɛ chɛ a gbee a. Yataa ɛ mmɔ dua wan ko ɔ ko ɔ, mmɔ ɛ min ma. Mmɔ ɛ ma‑a mɔɛ n fan na, miin mbe bai chɛ a min, an mbe tachɛ a gbee a.

CHIMISI 2:12

Chɛ ko a, ni wo ma‑a koɔ‑a tima ɔ tima, ni wo ma‑a koe ma‑a, a ni ma wo yii ma, mbɛ Yataa ɛ sawa chɛ an ya‑a, kaa a ni tɛ a si wo ma. Sawa chɛ, min mbe wo kun ka.

1 PITA 2:16

Wo kooya be, yɔ Yataa 'a mɔɛ nu, miin mbe ee yɔncha ɔ mɔ dɔ gbɛɛ n kɔɔ. Chɛɛ yuu min tɛ‑a ka wo ma, wo ma ben ko yama ma‑a nun dɔ, wo ni a dɛn wo bɔ koe ma yɔncha ɔ. Chɛɛ wo tachɛ buɛ ni wo ma Yataa 'a yɔnɛ n na, tima ɔ tima ko a.

2 CHƆN 1:1

N fan chɔchi gbakoo, n fan mbe gboo chɛ nyɛn tena i tena, i wan musu chɛ, Yataa faa ma chɛ, wo bɛ i 'a denɛ n na. Wo e Yataa 'a chia an ma, an fɛ mu, wo ko a di n ye. N dɔndɔ gbe ma to ni wo a, chɛɛ mɔɛ chɛ n gbɛɛ, miin‑na Yataa 'a tea sɔn, an gbɛɛ toen fan mu wo a.