N‑na a ɔ sɔn fan, mbɛ mɔgbuya chɛ ɔ min ma nyin, ko chɛndɛ ma koe gbasaya, a ee n faa ɔ. Koe min na mu, n toen mu bɛɛ boo ɔ boo n ni ko chɛndɛ ma, chɛɛ n mbe ee che a ma‑a.
Yataa ɛn wai! A‑a a ma, mmɔ 'a mansa Chisɔsi Chasi‑a n kun bɔ a ɔ. Chɛ an fɛ mu, n ma buɛ ɛ gbɛ ka wan. N mbe bea tena wan Yataa 'a sawa n fɛ n yiima gbɛɛ a. Chɛɛ yɔnɛ mu n na, ko yama 'a gbasaya kɔɔ, mɔgbuya ɔ min ma nyin.
Tima min na mmɔ ni mmɔ kun ye, sawa chɛ na‑a mmɔ 'a ko yama n na kunɛ wan mmɔ ɔ, mmɔ gboo bankandenɛ ni miin ma koe a. A sin, mmɔ faa ma koe yama chɛ n fan‑na a ma, mbɛ saya‑a mmɔ boo kana bia.
Koe min na mu, ni wo ma‑a an gbasaya chɛ kɔɔ, wo e na‑a wan fa‑a kuɔ fɔ ko a. Chɛɛ ni Yataa Nyina chɛ‑a a ma, wo sɛmbɛ‑a fion an ko yama n na, wo e kuɔ fɔ fɔɛ ma sɔn‑da wan.
Mɔɛ chɛ n sin, miin gbɛɛ, an mbe Chisɔsi Chasi ko a, an‑na chɛ an ma. Koe gbɛɛ, min ma nyin an 'na mɔgbuya ɔ, an faa ɛ miin dɔ chɛndɛ chɛ, an‑na an gbangban kɔn gbengbandenɛ ma.
Mmɔ wɛɛ, tima dɔndɔ a, mmɔ bɛ ni wan ben‑da mmɔ bɛ an mɔ bonda chɛ n na, mmɔ ɛ bea mmɔ faa ma koe n fɛ. Mmɔ ni mmɔ yii ma koe n fan na tachɛ, a basan mɔgbuya yama a. A chia chɛ a, tɛ bɔ nii mmɔ ma, mmɔ bɛ an na. Mmɔ ni mɔɛ n fan na, Yataa ni miin tɔɔ‑a.
Wo ma min chɛ‑a mɔ dɔndɔɛ a, wo bɛ Chasi a, wo a ban‑da kamincha‑a. Mɔ gbu ta da kamincha ma, chɛɛ Chisɔsi ta mu. A sin‑na a ma, mbɛ wo kunɛ bɔ‑a wo 'a ko yama n dɔ, miin ma nyin mɔgbuya chɛ ɔ.
Mɔ ɔ mɔ min mu Yataa 'a denɛ a, a ee ko yama ma bia a boo fea a. Koe min na mu, Yataa wandi Nyina ɛ wan a fɛ. A sin, a ee a a tun‑da ko yama ma koe a. Koe min na mu, a ma‑a gbɛ Yataa 'a denɛ a.