CHIMISI 3:17 - Yataa 'a Dɔbɛnɛ Nama

¹⁷ Chɛɛ koe saa saa mu min na, Yataa ta yiimatɛ, ko ɔ ko ee a ma. Sɔnkɔ sɔnkɔ ee a kɔ chia a, faachima an mbe a ɔ. A yɛ to, basamaya an be a ɔ, chinchimaya, ni ko chɛndɛ ma. Yiimatɛ an nɛ, min mbe ee mɔ ya bɔ, nɛnɛn feaya sin mbe ee a ɔ.

CHIMISI 3:17 ပူးပေါင်းရင်းမြစ်များ

MATIU 23:28

Wo wɛɛ wo e ka wan. Wo bɔen mu mɔɛ n na miin tanden mu Yataa tena. Chɛɛ wo faa ɔ ma gbɛ ni. Nɛnɛn fea ti mu wo a, mbɛ a yɛ to, ko yama ma mɔɛ mu wo a.

MATIU 5:8

“Mɔɛ miin faa ɔ gbɛen mu, an duaen mu. An mbe Yataa yen‑da wan.

MATIU 5:9

“Mɔɛ miin mbe mɔɛ n tɛ ɔ bɛn, an duaen mu. Yataa ɛ an ya‑a wan a 'a denɛ n na.

DUKU 21:15

Koe min na mu, n mbe bai n don‑da wan wo da a, mbɛ n‑na yiimatɛ be wo ma. Ni wo‑a bai kan kɔ kan fɔ, wo chɛɛ ma nyɔɛ n mbe ee che‑a kɔɔsa bia chɛ‑a a ma.

DUKU 6:36

Chinchimaya ni ma wo ɔ, yɔ Fa Yataa wɛɛ chinchimayaen mu buɛ min dɔ.”

CHƆN 1:14

An ni a wɛn chee, an dɔ, Bai, a na‑a ma wan mɔ gbu a, koadia chinchimaya faenɛ ɛ a faa a, a basan danaya a Yataa tena. A ni wan nn tɛ ɔ. Nn na‑a a ɔ yen fan, a kamayaen ni buɛ min dɔ, kamaya min ni a ɔ, a wan Fa Yataa 'a Den dɔndɔ gbe.

CHƆN 1:47

Chisɔsi‑a Natanɛɛ yen kɛn na‑a a tena, a‑a chɛ an fɔ, a si a ma. A ɔ, “Isɔɛɛ mɔɛ chɛndɛ chɛndɛ a yen ko na‑a, tɔɛ chɛ bɛnden mu min kun ma. Mɔɛ mu a a, a ee mɔ ɔ mɔ bun.”

CHISƆSI 'A SƆ MƆƐ NU 11:24

Banabasi chɛ ni mɔ chɛndɛ an na, min danayaen ni, a sin Yataa Nyina ni wan a fɛ gban. Mbɛ a‑a a ma wan, mɔ sɛsɛ sa‑a chɛ n kun ma, miin faa mun‑da Mansa Chisɔsi tena.

CHISƆSI 'A SƆ MƆƐ NU 9:36

Chɔpa duu wɛɛ ɔ, musu dɔndɔ ni wan nɔ, min tɔ ni Tabita. A na‑a a kai fa wan Chisɔsi a. Kiisi mɔɛ n ni a chee, an dɔ, Dɔkasi, min fasaien ni dɔmba. A 'a fɔɛ gbɛɛ ɔ, a ni wai nyima wa an chɛ, a ɛ basan yɔn tɔɛ n bɛɛ ma.

GBOO DOMI KO A 12:18

Wo ta nan gbu, wo butuin chɛ chia ɔ chia a, wo ni ma faachima ɔ mɔ ɔ mɔ a.

GBOO DOMI KO A 12:9

Ni i bɔɛ ko a dia‑a i ye, a ko a ni dia i ye i faa gbɛɛ a. Wo ma to ko yama a, chɛɛ wo ko chɛndɛ ma an bia wo boo fea a.

GBOO DOMI KO A 15:14

N bɔ Chisianɛ nu, n fandi gbu wɛɛ danden fan mu a a, mbɛ mɔ chɛndɛ wa mu wo wɛɛ gbu a. Wo‑a wo boo nyima tɛ bɔɛ sɔn fan wo manɛ a chɛndɛ chɛ. Wo‑a a ɔ sɔn fan, wo e dasi be buɛ min dɔ wo nyɔn ma.

GBOO SAA KƆYINDI KO A 12:8

Mɔɛ dɔndɔɛ ɛ nɔ, Yataa Nyina‑a sakana bai min don a da a, a fɔ koe a mɔɛ n ye, yiimatɛ wa an be a ɔ. Mɔɛ dɔndɔɛ sin, Nyina dɔndɔ chɛ‑a a ma wan, yiimatɛ bai wa, ɛ ma a da a bai ɔ.

GBOO FEAN BƆƐ KƆYINDI KO A 10:1

N fan Pɔɔ, n fan mbe ka wo disa tena. N fɛn mu ka, an dɔ, n ma chimaen mu, n mbe ma wo baima, n sin mbe wo bia wan chinchincha a. An dɔ, chɛɛ ni n ka‑a wo baima, n mbe wo bia wan faaakɔɔɛ a. N mbe wo disa tena, machimaya ɔ, a basan chinchincha a, Chasi ni min yian.

GBOO FEAN BƆƐ KƆYINDI KO A 6:6

Nn‑na a ɔ yian fan, mbɛ nn mbe wai chɛ tena Yataa an ko a. Nn sɔnɛ a koen fan mu Yataa tena, a 'a yiimatɛ ɛ wan nn dɔ, nn mbe nn faa bia wan. A sin to, nn mbe ko chɛndɛ ma wan mɔɛ n na. Yataa Nyina ɛ wai chɛ tena wan nn dɔ, koadia wɛɛ ɛ nn faa ɔ.

GBOO FEAN BƆƐ KƆYINDI KO A 7:11

Wo wandi gbu, wo a ɔ yen bɛ, wo 'a faayɔnɛ chɛ, Yataa‑a min dɔ bɛn wo ko a, a ma‑a koe min na wo tena. Wo ma‑a gbɛ tea mɔ wa an na, wo ma bɛndenɛ ɛ a ɔ yen koe a, mbɛ wo ma ko yama ma ni. Wo faa tɛ‑a wan, wo chian‑da, yiinachii ko a wo ɔ, mbɛ wo‑a wo wandi be, wo ma bɛndenɛ ɛ ko yama ma mɔɛ n tɔɔya koe a. Wo gbu, wo‑a a ɔ yian, mbɛ mabɔ ee wo ma, chia ɔ chia a, an koe gbu gbɛɛ ɔ.

GBOO FEAN BƆƐ KƆYINDI KO A 9:10

Yataa sin fan mbe chin fen kuu be chin fen chin mɔɛ ma, ɛ daun fenɛ be mɔ gbu ma, a daun koe a. Chin fen kuu gbɛɛ, i toen mu min na, ɛ a be‑a wan i ma. Ɛ i boo fenɛ ma munda‑a wan, min mbe a ma, e fenɛ min be yakɔɔtawa tɔɛ n ma, a ni koa.

Gboo Ɛfisɔsi Ko A 5:9

Koe min na mu, a ɔ ɛ yen ka wan, mbɛ mɔɛ ɛ wan manɛ kɔɔ. Mɔ ɔ mɔ min mbe manɛ chɛ kɔɔ, ɛ ko chɛndɛ an ma tea tea ɔ, a sin, a tanden mu Yataa tena.

Gboo Fiipai Ko A 1:11

Chisɔsi Chasi 'a gbasaya ɔ, wo sɔnɛ a dondandenɛ ni ma. Chɛ an mbe ma tando a, Yataa tena, a basan basɔmaya a.

Gboo Fiipai Ko A 4:8

N mbe min fɔ tena gbɛ sanche, n suun ma nyɔɛ nu Chasi ɔ, wo wo yii na chii koe chɛ n ma, baa ɛ miin ma, Yataa toen mu koe miin na. Koe nu, miin nyin, mabɔ ee miin ma ɛnden bɛɛ a, basɔmaya koe nu. Mɔɛ n mbe che kawa‑a koe miin ma, an mbe koe miin bai, dua ɛ koe miin dɔ.

Gboo Kɔdɔsai Ko A 1:10

Chɛ ɛ a ma‑a wan, wo ni kosan tachɛ‑a fɔɛ ɔ, min mbe nyan Mansa Chisɔsi tena, a faa ni chima a da faenɛ ɔ. Tima ɔ tima, wo e ko chɛndɛ sɛsɛ ma‑a wan. Wo 'a yiimatɛ ma ni mun‑da a si Yataa wakoe ma.

Gboo Saa Tɛsadonika Ko A 2:7

Sɔ mɔɛ mu buɛ min dɔ wo a Chasi ko a, nn ni kun fan boo fenɛ n ma kain‑da wo ma. Chɛɛ nn ni tima min na wo tɛ ɔ, nn‑na tima ya wan wo bia koe a. Wo maen fan ni nn tena yɔ denɛ n bɛ an de n na, an mbe bia chɛndɛ min chɛ an na.

1 TIMOTI 5:21

N toen mu i ni dasi chɛ ya i sɔɛ a, i ma a to mɔ ko a, i sin ma a ɔ sii mɔ ko a. Yataa ɛ mɔ yen tena wan, Chisɔsi Chasi ɛ mɔ yen‑da, maeka n bɛɛ, Yataa‑a min ya, an‑na mɔ yen.

2 TIMOTI 2:24

Mansa Yataa 'a wai chɛ mɔɛ sin ma koɔ yan mɔ a. Chɛɛ mɔ chɛndɛ mu a a mɔɛ gbɛɛ tena, kan chɛndɛ chɛ mɔɛ, a sin mbe koe a bia a ma.

TAITƆSI 1:15

Mɔ ɔ mɔ tena min yiima a koen mu, fen kɔ fen nyin fan. Chɛɛ mɔɛ min yiima a ma ko ni, danaya ee mɔɛ min dɔ Chisɔsi ko a, fen kɔ fen ma nyin. Koe min na mu, a yiima ɔ chɛen fan mu, a basan a 'a yiinachii a.

TAITƆSI 3:2

An ma bai yama sa mɔ ɔ mɔ ma, an ni an boo bɔ koɛ ɔ, an ni ma mɔ ma chimaenɛ n na, miin mbe basɔmaya be mɔ ɔ mɔ ma.

GBOO IBU MƆƐ N KO A 12:11

Ni mmɔ ma‑a tɔɔya kɔɔ, a tima chɛ a, mmɔ ɛ a yen koe an na, min mbe mmɔ faa yɔn, a ee mmɔ bu ɔ dia‑a. Chɛɛ chɛ gbɛɛ ɔ, chɛ gbakɔ, an tɔɔya chɛ ɛ miin koo‑a, an mbe faa chima ma sɔn‑da wan, a bɔ tea koe n dɔ, an mbe miin ma‑a.

GBOO IBU MƆƐ N KO A 12:14

Wo butuin chɛ, ma koe a faachima ɔ mɔ ɔ mɔ a. A sin to, wo ni ma tenchen Yataa ko a. Koe min na mu, mɔ ɔ mɔ ee Mansa Yataa yen‑da, ni a ee ka.

CHIMISI 1:17

Ko chɛndɛ gbɛɛ, mabɔ ee min ma, ɛ ka Yataa an tena. Manɛ gbɛɛ, miin na dandenɛ ɛ banda bu ɔ, a boo gba mu an na. Ko chɛndɛ kan kɔ kan, mabɔ ee min ma, a wan‑na an be mmɔ ma, a ka banda bu ɔ. A tana, a ee mun kuɔ fɔ. A ee ka yɔ nininɛ, min mbe ka a gba ɔ.

CHIMISI 1:5

Ni yiimatɛ ee wo ɔ, a ɔ sɔn koe a, Yataa toen mu wo ni ma buɛ min dɔ, wo a ɔ tisa. A ee ban‑da a be koe a wo ma. Koe min na mu, ɛ fen sɛsɛ be wan mɔ gbu ma, a bu ɔ diama ɛ.

CHIMISI 2:13

Koe min na mu, Yataa ɛ kaa a tɛ‑a wan chɛ n ma, miin nii chinchimaya yian, a ni an tɔɔ. Chinchimaya tɔɛ n sin, an mbe chinchimaya sɔn‑da wan.

CHIMISI 2:4

Wo ni a ɔ sɔn, mbɛ wo‑a wo boo don ka mɔɛ n tɛ an dɔ. Wo‑a wo yii na chii buɛ min dɔ, a ma nyin.

CHIMISI 3:15

Toomaya, ni mɔ gbu to koe a a wandi faa ma koe n na dechee, Yataa ta yiimatɛ ma an na. Dunya chɛ ma yiimatɛ an nɛ, Yataa Nyina ma to ni min na. Sitana an mbe dechee sɔ ɔ an yiimatɛ chɛ nyɔn sima kɔ.

CHIMISI 4:8

Wo gbɛn Yataa ma, mbɛ a wɛɛ, ɛ gbɛn‑da wan wo ma. Wo wo boo a ko, wo wan ko yama ma mɔɛ nu. Wo faa ɔ ni gbɛ, wo wan nɛnɛn fea ti nu.

1 PITA 1:22

Wo‑a wo boo a si min chɛ sakana bai chɛndɛ chɛ kɔɔ, tea mu min na, wo ko‑a gbɛ, a bɔ wo 'a ko yama n dɔ. Chɛ ni a ma, koadia chɛndɛ ni ma gbɛ wo ɔ. Ni a sin ma‑a ka, wo ni to wo nyɔn na pien, wo faa gbɛɛ a.

1 PITA 2:1

Chɛ an fɛ mu, wo wo boo bɔ ko yama ma gbɛɛ ɔ. Wo sɛmbɛ fania fɔ koe a. A yɛ to, wo sɛmbɛ ma koe a nɛnɛn fea ti n na. A sin, wo main chɛ kan kɔ kan boo ka, mbɛ wo sɛmbɛ‑a too koe a mɔ dɔ gbɛɛ n na.

1 PITA 2:18

Wo wan bɔi denɛ nu, wo kooya be wo kun ti n ma, wo ni basɔmaya da faenɛ be an ma. Kun ti chɛ nu ma dechee, miin sɔnɛ n nyin, a yɛ to, an mbe chinchin wo ma. Chɛɛ wo a be chɛ n bɛɛ ma, miin mbe wo bia tena yama yama.

1 CHƆN 3:18

N 'na denɛ nu, mmɔ 'a koadia, a ma ma dechee bai n na, mmɔ ɛ miin fɔ. A ni ma tea koadia a, min dɔ ɛ yian mmɔ chɛ chɛ wai an dɔ.

1 CHƆN 3:3

A sin, mɔ ɔ mɔ, danaya chɛ ɛ min dɔ a ko a, a mɔɛ chɛ ee dɔn a ni a boo chɛ ko yama kan kɔ kan dɔ. Koe min na mu, Chisɔsi ee a boo chɛ ko yama ɔ.