1 PITA 5:9 - Yataa 'a Dɔbɛnɛ Nama

⁹ Wo sɔ chidi wo 'a danaya ɔ, Chasi a. Sitana ma kun wo ma. Koe min na mu, wo‑a a ɔ sɔn fan, mbɛ wo bɔɛ miin bɛɛ kai faen mu Chasi a dunya gbɛɛ ɔ, an mbe ko yawaen dɔndɔ gbe chɛ an dɔ bia tena.

1 PITA 5:9 ပူးပေါင်းရင်းမြစ်များ

DUKU 22:32

Saimɔn, chɛɛ n‑na samunɛ chɛ i ko a, i chenɛ ni sɔ gban i 'a danaya ɔ n na. A sin, ni i‑a i ya a yɛ to n ma, a ma i bɔɛ n bɛɛ, an chenɛ ni sɔ gban an 'na danaya ɔ n na.”

CHƆN 16:33

N mbe chɛ gbɛɛ fɔ tena wo ye, min mbe a ma, wo ni faachima sɔn. Koe min na mu, mɔ dɔndɔɛ mu mmɔ a, mmɔ gbɛɛ. Ko yawaenɛ n mbe wo tan‑da wan dunya chɛ ɔ. Chɛɛ wo wo faa sɔ, n kun‑da gbasaya ti ma dunya chɛ ɔ.”

CHISƆSI 'A SƆ MƆƐ NU 14:22

Mbɛ an‑na a ma, mɔɛ chɛ n 'na danaya ɔ gbɛa‑a, miin ni ka Chisɔsi fɛ mɔɛ n na. An mbe ta‑a an faa n ma nande‑a, an ni to tun an kai fa‑a Chisɔsi a. Mbɛ an‑na an kan, an dɔ te, “Mɔ ɔ mɔ ɛ mɔnɛ sɛsɛ ɔ bia pɛn, a e na to don‑da Yataa 'a mansaya chɛ kɔɔ.”

GBOO SAA KƆYINDI KO A 10:13

Dɔsiman kan kɔ kan mbe ee wo tan, min sima ma mɔ gbu tan nin bɛ. Chɛɛ Yataa ee a da a kuiɛ yɔn, a sin mbe ee dɔn dɔsimanɛ ni na mɔ gbu tena, i 'a danaya ɔ ma gbɛ min dɔ bia koe a. Ni dɔsimanɛ na‑a i tena tima min na, a tima dɔndɔ gbe chɛ kɔɔ, ɛ chia yian‑da wan e kun buɛ min dɔ, i ni bɔ a ɔ. Ɛ i ɔ gbɛa‑a wan a ɔ bia koe a.

Gboo Ɛfisɔsi Ko A 4:27

Wo ma na chia yian Sitana a, wai chɛ koe a.

Gboo Ɛfisɔsi Ko A 6:16

A ka chɛ gbɛɛ ma, wo wo kai fa Chisɔsi Chasi a, tima ɔ tima ko a. Chɛ ɛ ma‑a wan, yɔ chɛɛ chɛ fenɛ wo boo a, min mbe a ma, soya mɔ dɔ gbɛɛ ee che wo sɔɔ‑a. Chɛ ɛ wo konde gbain‑da wan chia gbɛɛ a, an nyina yama, Sitana ɛ bɔ miin na.

Gboo Kɔdɔsai Ko A 2:5

N mbe wɛɛ nɛ pɔɔ, chɛɛ n faa ɛ wo tena. N bu ɔ diama mu, koe min na mu, wo e chia chɛndɛ ma, wo ma ka ni ɛnden bɛɛ a wo gba ɔ, wo kai fa koe a Chasi a.

Gboo Saa Tɛsadonika Ko A 3:3

Chɛ an mbe a ma‑a, an ni ko yawaenɛ sa wɛɛ wo ma, wo dɔndɔ wɛɛ ee mun‑da to. Koe min na mu, tɛnɛ ko ma a Yataa wandi tena, mbɛ mmɔ ɛ ko yawaen bonda chɛ n dɔ bia wan.

1 TIMOTI 6:12

Butuinɛ chɛ i 'a danaya ko a Chisɔsi a, butuin chɛndɛ an nɛ. I che‑a wan kuɔ fɔ fɔɛ ma sɔn‑da. I sin‑na a fɔ wan den mɔ sɛsɛ ya kɔ, mbɛ i‑a i kai fa Chisɔsi Chasi a. Kuɔ fɔ fɔɛ chɛ bia i boo fea a.

2 TIMOTI 3:12

Tea ko a, ni mɔ ɔ mɔ‑a a wandi be Yataa chia ma, ni an ma‑a mɔ dɔndɔɛ a Chisɔsi Chasi a, ɛ ko yawaenɛ ɔ yen fan.

2 TIMOTI 4:7

N‑na butuin chɛndɛ chɛ chɛ, n che‑a a danka a. N sin ma ka ni n 'na danaya gbee a.

GBOO IBU MƆƐ N KO A 11:33

an 'na kai fa Yataa a, a na‑a a ma wan, an kun‑da chɛnyɛ sɛsɛ n ma chɛɛ ɔ. An na‑a tea din fan mɔɛ n ma. A sin, too ɔ dia na‑a chɛ wan an na, a yɛ to, an‑na a ma wan, yaa n ma che ni bia chɛ‑a.

GBOO IBU MƆƐ N KO A 12:8

Ni a ma wo tɔɔ ni, yɔ a 'a denɛ n gbɛɛ, mbɛ a 'a denɛ chɛndɛ chɛndɛ ma wo a, ko tɛ denɛ mu wo a.

CHIMISI 4:7

Chɛ an‑na a fɔ, wo kooya be Yataa ma. Wo ma dɔn Sitana ni kun wo ma. Ni wo‑a chɛ ma, ɛ a bui‑a wan, a ni ka wo fɛ.

1 PITA 1:6

Chɛ ni ma buɔdia a wo ma. Buɔdia chenama wa ni ma wɛɛ wo ma ya ɔ ma, chɛɛ tima ɛnden ko a, wo e na‑a wan ma‑a faayɔnɛ ɔ. Koe min na mu, wo e ko gbɛama sɛsɛ n dɔ bia‑a wan.

1 PITA 2:21

An ko bonda chɛ mu, Yataa na‑a wo chee, a ɔ, wo ni a ma. Koe min na mu, Chasi wandi gbu‑a ko yawaenɛ ɔ bia wan wo ko a, min mu tɔmɔsi a wo tena. Chɛ ni a ma, wo wɛɛ ni puin a chen gba ɔ.

1 PITA 3:14

Chɛɛ ni wo‑a tɔɔya ɔ bia wɛɛ, ko chɛndɛ ma gbaa chia a, dua wa mu wo ma. Mɔ ɔ mɔ ma a ma chianɛ ni ma wo ɔ, wo sin faa ma gbaa a.

1 PITA 4:13

Chɛɛ a ni ma buɔdia a wo tena, mbɛ wo e ko yawaenɛ min dɔ bia tena, Chasi na‑a an sima ɔ bia. Chɛ ɛ ma‑a wan wo ni ma buɔdia da faenɛ ɔ, ɛ yen‑da tima min na gbasaya ɔ, dunya chɛ ɔ.

KO Ɔ NUNDENƐ 1:9

N fan mu, n fan Chɔn, wo suun ma nyɔɛ Chasi ɔ. Mmɔ gbɛɛ, mɔ dɔndɔɛ mu mmɔ a, mmɔ bɛ Chisɔsi a, an mu mmɔ 'a mansa a. A sin, mmɔ gbɛɛ, mmɔ ɛ tɔɔya dɔndɔɛ an dɔ bia tena, mmɔ ɛ mmɔ faa bia‑a, a ko a. Yataa 'a sakana bai sa koe a, a basan Chisɔsi wakoe a, n na ta‑a Patimɔsi bia ɔ an ko a, yii tinɛ ɔ duu gboo chɛ ma.

KO Ɔ NUNDENƐ 6:11

Mbɛ mɔɛ chɛ nu, an‑na miin fa ka, doma wa dɔndɔ dɔndɔ be‑a an ma, doma gbɛ fo. Mbɛ a fɔ‑a an ye, mbɛ an ni a ma kɔn, aan an bɔɛ wai chɛ mɔɛ n da ni fa, an suun ma nyɔɛ nu Chasi ɔ, miin mbe fa‑a yɔ an fan.

KO Ɔ NUNDENƐ 7:14

Mbɛ n dɔ, “Kai, n ma ko ɔ sɔn chɛ ma. N mbe i wan dɔ tisa chɛ a.” Mbɛ a ɔ n ma, “Mɔɛ chɛ nu miin kun bɔ‑a ko gbɛama wa chɛ ɔ, an fan nɛ ka. An fan‑na an 'na koa n ko, an‑na an gbɛ fo, sa tɔngbɔɛ chɛ wii a.