5 Chɛɛ ni mɔ ɔ mɔ‑a a da a kuiɛ a min, an mɔɛ chɛ an mu mɔɛ a, min toen mu Yataa a tea tea ko a. Mmɔ ɛ a ɔ sɔn‑da ka wan, mbɛ mmɔ ma‑a mɔ dɔndɔɛ a Yataa a.
Chɛɛ Chisɔsi ɔ, “I‑a tea an fɔ ka, chɛɛ miin mbe Yataa 'a bai a min‑da, mbɛ an‑na a ma, yɔ bai chɛ‑a min fɔ an ye a ma koe a, dua chenama wa gbu ɛ ma‑a an fan ma.”
“Mɔɛ min mbe koe n ma‑a, n mbe miin fɔ an ma koe a, an mɔɛ chɛ an toen mu n na. A sin, an mɔɛ chɛ, a toen min chɛ‑a ka n na, Fa wɛɛ, a ɛ to‑a wan a a. N bɛɛ, n mbe to‑a wan a mɔɛ chɛ a, mbɛ n‑na a ma, a‑a n sɔn chɛndɛ chɛ.”
Mbɛ Chisɔsi ɔ, “Mɔɛ min toen mu n na, ɛ koe chɛ n ma wan, n‑na miin fɔ a ye, an ma koe a. Fa ɛ to‑a wan a mɔɛ chɛ a. A sin, Fa ni ma, ni n fan, nn mbe na‑a wan a tena, mbɛ nn bɛ gbɛɛ ɛ ma‑a kaina dɔndɔ.
“N fan mu kɔnɛ a, wo sin, n bonɛ n mu wo a. Nn mbe ma‑a mɔ dɔndɔya ɔ, mɔɛ min na, a ma n boo ka ni, n bɛɛ, n ma a boo ka ni, a mɔɛ chɛ ɛ gbɔ sɛsɛ be‑a wan. Koe min na mu, wo ee che ko ɔ ko ma‑a, wo kun ma a a, ni n mbe ee wo kɔ.
A wan Yataa dɔndɔ gbe, a wan‑na a ma, wo ma‑a mɔ dɔndɔɛ a Chisɔsi Chasi a. Ni mmɔ‑a a fɔ, yiimatɛ ɛ mmɔ ɔ, Chasi mu. Ni mmɔ‑a a fɔ, mmɔ tanden mu, a wan mu. A‑a mmɔ kun bɔ mmɔ 'a ko yama n dɔ, mmɔ ma‑a Yataa 'a mɔɛ n na.
Mmɔ ko a ni, Yataa‑a ko yama gbɛɛ si Chasi kun ma. Chɛɛ Chasi chɛ nii ma ko yama kan kɔ kan ma ni. Yataa‑a chɛ ma, min mbe a ma, mmɔ ni ma mɔ tandenɛ a a chen kɔɔ. Koe min na mu, mmɔ ma‑a mmɔ dɔndɔɛ a Chasi a.
Wo‑a a ɔ yen fan, mbɛ a kai faen ni buɛ min dɔ Yataa a, an fea a chɛ chɛ wai a, an na kanden fan ni. Koe min na mu, a chɛ chɛ wai na‑a a ɔ yian fan, a kai faen mu buɛ min dɔ Yataa a.
Mɔɛ miin mbe Yataa da a kuiɛ ma, an mbe ma wan mɔ dɔndɔya ɔ a a. A sin, Yataa wɛɛ, ɛ ma wan mɔ dɔndɔya ɔ an na. Mmɔ sin mbe a ɔ sɔn ka wan, mbɛ Yataa ɛ wan mmɔ dɔndɔya ɔ mmɔ a. Mmɔ ɛ a ɔ sɔn fan, koe min na mu, a Nyina ɛ mmɔ fɛ.
Koe min na mu, Yataa 'a koadia mmɔ ko a, ɛ faagbaa bonda chɛ ban fan mmɔ ma. Ni mmɔ‑a mmɔ yii na chii, mbɛ tɔɔya ɛ wan mmɔ ya ɔ, an mbe a ma, mmɔ faa ɛ gbaa ka. Chɛ ɛ a ɔ yian fan, mbɛ Yataa 'a koadia kuu ma si nin bɛ mmɔ faa ɔ.
Mmɔ‑a a ɔ sɔn fan, mbɛ Chisɔsi, Yataa 'a denɛ na‑a, mbɛ a‑a tea Yataa yian mmɔ a. Mmɔ mu gbɛ mɔ dɔndɔɛ an na tea Yataa chɛ a, koe min na mu, mmɔ dɔndɔɛ mu mmɔ a Chisɔsi a, a 'a denɛ. An mu tea Yataa a, min mbe kuɔ fɔ fɔɛ be.
Chɛ sin fan mu koadia a, bea koe a Yataa 'a sawa fɛ. A sin‑na a fɔ wan wo ye, a ka sakana bai chɛndɛ chɛ a min tima saa saa ma, mbɛ wo ni tachɛ chɛ koadia ɔ.
Chɛ‑a a ma wan, fɔɛ fen ma chianden chɛ faa gbandia‑a kaka, musu chɛ boo ɔ. Mbɛ a‑a a kun sɔ gbɛ musu chɛ cheeya n na, a‑a chɛɛ bun an ma. Cheeya chɛ nu, an mu mɔɛ chɛ n fan na, miin mbe Yataa da a kuiɛ ma, an sin, an kai faen fan mu tea chɛ a, min ka‑a Chisɔsi tena.