Inrengna hringkhō kha a’nchaisōa, avea hōina kha achen sik; hnemna kasea ama’n inrengna athōk changmak ti kha ama’n ahong manhret sik. A’npek sōt kasōkpa chunga kamalung katlai, mi katamtak hei karâkna chen sik kha arôn pek sik hei khana ama jâra anmani kha karangei mandam sik hei.
Jerusalem, nang hi sa kaneimak nuhmei kapō leikachang che, tâk tûnchu inpâk a hla nasak a ka-ông thei jo che. Tûnchu nang in sa katamchet nanei sik jo, apuise’n adahlon jenmak nuhmei kanek a!
Heisik a mo khangtuk rasa inshângtak a akaṭap che? Nuhmei naiha kaphu kapōa hei sik a mo natna nade? Reng naneimak jâra mo, khana nang mansena kaneihei anthisō jâra mo khanga natlo?
Khava jâra sa kanei sik nuhmei khan asa kha aneimak hma seng Rōngpu’n amihei kha a-inrepuihei kut a adahlon sik heia kae. Khana rehring sura miram a aka-om Israelhei seng kha vōi khat anmihei leh inchun nôk sik jo hei.
Nuhmei inkhat in nai anei sik ting amalung inrim, ajârchu a’nrengna pha kha jōng katlung jo; tâk nai kha aneisō pha anat ade manrim seng kha amahngi jo, ajârchu amanu’n raleichunga nai inkhat anei jo jâra inpâk joa kae.
Kasa marit hei! Vōi khat nôk, nu inkhat in anai neia ade kapōa nanshunga Christa nunchen a’nsyemsōt mak lai seng khava natna leh a’n-anghrep kha nangni sik a kadea kae.
Ajârchu ṭong intheng in ahri: “Sa kanei hêrmak nuhmei kha, amahâm kaṭha! Naiha kaphu kade mak nu, inpâk a ông ruh, peng ruh! Ajârchu apuise’n adahlon hêrmak nu kanek a dahlon nu khan sa katam anei jôk sik kae inti.”
Ama khan arahmei vâng bōirōk a ârsi sem thuma sem khat raleichunga akei mathlâk a kae. Khana nuhmeinu nai jōng matet sik kha ajo’ntet lim leh made loina sik, nuhmeinu hmaikunga ama kangir ṭhak a ka-om.