PETER INKHATNA 3:18 - LEKHARABU INTHENG (BSI)

¹⁸ Ajârchu, nangni Pathen hneng aṭhōi theina sik chei, mikaṭha inkhat kha mikaṭhamak-hei sik, Christa kha setna jâra aheitik a sik vōi khat kathi jo. Ama taksa a anleithat jo, tâk rathla a manhring jo kae.

PETER INKHATNA 3:18 ပူးပေါင်းရင်းမြစ်များ

DANIEL 9:26

Khava pha a’nchai leh Pathen takadeisōt hlamkakei kha dikmaktak a anmahera anthat sik. Khōpui leh Bek-inn kha ratha kaneitak vaikarôn remi he’n ansuk manhmang sik. A’nchaina kha Pathen in amantluksa re leh suk manhmangna ahei rôn kha tuikalen kapōa kahong sik.

ZECHARIAH 9:9

Inpâk ruh, hōi ruh, Zion mihei. Jerusalem mihei inpâk a ông ruh! Enruh, nanrengpa kha nanhnenga kajōng jo! Ama khan chung sōkna leh torna aneia kahong tâk-kha insinsak tak a shakōrtung aheichōng– shakōrtung tere inkhat aheichōng.

MATTHEW 27:19

Pilate kha ṭong tanna den shunga a’n-onglai, anuhmei in, “Tuning karahmanga ama jâra khōdeng theina hingja kaleinei, khava jâra ṭhena kaneimak mi kha heite manlomak roh,” tia ṭong ahei manrôna kae.

MATTHEW 27:24

Pilate in aṭong der hei kha ahnemna om mak jo, mipui inchok inhângna kasōkbei sik jo ti kha ahmu pha, tui ajing aloa mipui hmaikunga akut asôp a, “Hiva mipa thina chunga kei chu mô rônmak ning! Hivahi nanbinga nantatlo kae!” ati hei.

JOHN 16:10

anmani akadik chungchânga anṭhe, ajârchu kei kapa hneng kase sik eng, nangni’n ahmu nôk mak jo chei ning.

ṬŌNTLOHEI 22:14

Ama’n, ‘Nipusōnhei Pathen khan alungdo inhret sik a, akadik Asōkpa akahmu sik a leh akaresōkhet a aṭong hri kathei sik a akadeisōt jo che kae.

ṬŌNTLOHEI 3:14

Ama chu a’ntheng leh akaṭha inkhat kae. Tâk-kha nangni’n ama nanhōt a ama kahlânga, mikathat inkhat jôk amasōna sik a Pilate hneng nanlei der.

ROMANHEI 1:4

khana a’ntheng Rathla achangna dungjuia thina inphut keimathōina leh Pathen Sapa achangna kha ratha kahrattak a amalâr jo.

ROMANHEI 4:25

Eini setna jâra ama akathi sik a pek sōt jo kae, khan chu eini Pathen leh akadiksap nichang theina sik, ama akahring sik a keimathōi jo kae.

ROMANHEI 5:2

Pathen maritna manhret pum a tuna ni-omna shunga hin ama’n taksen jâra aṭhōi manhlut me kae. Khava jâra Pathen lûrna nichen sik tia inhōrna nineia a’n-or me kae!

ROMANHEI 8:11

Thina inphut Jesu akakei inthoi Pathen rathla kha nanshunga a-om inchu, Christa kha thia inphut akakei inthōipa Rathla nanshunga aka-om khan nantaksa akathihei kha hringna ahongpek nôk sik hei.

ROMANHEI 8:3

Ralei mihring hi angaia atlâksam jâra, Dân in atlo tor mak kha Pathen in atlo jo. Setna kator sik a, set kasip mihring ngai kapōa kajōng, Asapa khet kha ajōngtir, mihring ngai shunga setna kha maset apek jo.

CORINTHIANHEI INHNINA 1:24

Nantaksenna ngarna sik a keini’n rumhrat a manse sik chei intluk mak ung; nantaksenna khan kahnet a kangir chei ti kanmanhret. Khava kahlanga nan-inpâkna sik jôk a keini’n nangni leh ṭōn kantatlo kha kae.

CORINTHIANHEI INHNINA 13:4

Ama thingrake chunga thina katlunga akatlasam achang ravâng, Pathen ratha hratna khan amanhringa kae. Keini ama leh kan-inchun jâra katlâksam ung; tâk nangni leh ni’nchunna shunga Pathen rathahrat jâra ama hringna kha chen nineisap sik a kae.

CORINTHIANHEI INHNINA 5:21

Christa khan setna neimak, tâk eini ama leh ni’nchunna shunga khan Pathen dikna kha nichensōm theina sik Pathen in eini setna kha ama chen amanchang jo kae.

GALATIANHEI 1:4

Tûnlai pha kaṭhamak a inphut eini ning leh hnōma masōna sik, ni-Pa, Pathen lungdo kajuia Christa kha abinga nisetnahei jâra inpek sōt jo.

GALATIANHEI 3:13

Tâk-kha Dân tarôn sōt hâksêrna kachen kha Christa kachang joa, eini hâksêrna inphut ning leh hnōma Christa khan amasō jo me; ṭong intheng in hinga, “Tu achang inum thinglera a’nkheihlon kha hâksêr kachen kae,” ati.

EPHESIANHEI 3:12

Eini’n ama nitaksen jâra ama leh inchunna shunga hlamrinna rakip leh inṭhōia Pathen ângshunga inlensaktak a hluttheina ninei jo.

TITUS 2:14

Eini ṭhatmakna rakip a inphut ani kahuksōt sik a leh mi intheng ama ta rōk akachang sik mea khana akaṭha katlo hnōm nichangna sik a, ama’n abinga eini sik a inpek sōt joa kae.

HEBREWHEI 10:10

Ajârchu Jesu Christa’n ataksakhet vōi khat rōk a ahei tik sik a inpek sōt a Pathen tamadu kha atlo jo jâra, eini nikhenga setna inphut amantheng jo me kae.

HEBREWHEI 9:14

Hivahi adik inchu, Christa thisen rarap khan chu heituk akakhe chet a ṭōn achai sik jo mo! Kumsôt Pathen Rathla a inphut Christa kha pui katluk tōkna kachanga Pathen hneng abinga inpek sōt jo. Akahring Pathen kha nirazen theina sik, athisen khan eini mandon ṭhen theina kha hnemna kase bekdâna inphut amantheng pek sik me.

HEBREWHEI 9:26

khanga achang inchu, vânhnōi ralei insyembia inphut ave-avea inrimna aleide jo akachang sik kae. Kha changloa, tûnchu pha rakip a’nchai sik ting, ama intōksōtna hin setna rakip a’nthengna sik ahei tik a sik a vōi khat rōk ava’nlâr kae.

HEBREWHEI 9:28

Khava kapōa Christa kha’m mi katamtak setna kalosōt sik a vōi khat inthoina le’ntōksōt jo. Ama vōi 2 changna, setna chunga ensuina sik changloa, ama kahngâk ṭhak hei kahuk inhring sik a, alajōng inlâr nôk sik kae.

JAMES 5:6

Nangni’n ṭhenakase hei maset nanpek heia nanthat hei khana anmani’n heite ating tor mak hei.

PETER INKHATNA 3:19

Khana ama rathla a ahring lai khan kura a’nkhum rathlahei hneng leikasea ṭong avahrilea kae.

PETER INKHATNA 4:1

Christa’n taksa a aleide manrim achang jâra, nangni’m ama mandonna kapōa nanbinga a’nsuk inngar sik chei kae; ajârchu tu achang inum taksa akade inrim khan setna tlo nôk mak jo.

PETER INKHATNA 4:6

Khava sik jâra Ṭong kaṭha kha mi kathihei kâr a’m a’nhri inthangle kae, mi rakip ṭong antan kapōa khava taksa hringkhōa ṭong antan hei chunga khan; anrathla hringkhōa Pathen ahring kapōa anhring theina sik hivahi anhnenga ava’nhri kae.

JOHN INKHATNA 1:9

Tâk-kha eini’n nisetnahei Pathen hneng nihrisōt inchu, aṭong tepna kha ajui sik khana akadik kha atlo sik: nisetnahei kha arangei mandam sik me khana dikmak nilei tlona rakip a inphut amantheng sik me.