MALACHI 2:7 - LEKHARABU INTHENG (BSI)

⁷ Pathen kadik a manhretna kha mi manthei sik hi thempuhei ṭōn kae. Mipui he’n kei lungdo anmanhretna sik a anhnenga akase sik hei kae, ajârchu anmani kha Chunghnung Rōngpu ṭongkarônhei kae.

MALACHI 2:7 ပူးပေါင်းရင်းမြစ်များ

RENGHEI INHNINA 16:11

Khava jâra Uriah khan khava kapō maichâm inkhat asak jo, khana Ahaz ahong inle mak hma aleisyem sō jo.

RENGHEI INHNINA 16:16

Reng ṭongpek dungjuia Uriah khan atloa kae.

THUHMINGHEI INHNINA 30:22

Levihei khan Rōngpu kamukna kha kasing tak a hlam ansât jâra Hezekiah khan aleimanpâk hei. Anpu sōnhei Pathen Rōngpu manpâkna inthoina antōkna shunga ni 7 kha athleng jo pha

THUHMINGHEI INHNINA 31:4

Khava chunga, rengpa’n Jerusalema mipuihei hneng thempuhei leh Levi he’n Rōngpu Dân rangeina dungjuia anpha kha a’ntōksōt torna sik a, anmani chen sik a tōknahei kha anhei choina sik a amanthei hei.

EZRA 7:10

Israel mihei hneng dân leh chôndân rakip mantheina sik leh manjuina sik Rōngpu dân kha inthem chûkna sik a Ezra’n ahringkhō apek sōt a kae.

EZRA 7:25

“Ezra, nang in na-Pathen tapek che singna kha hmang inna tlaitlâk Euphrates a na-Pathen Dân kajuihei vai karôn sik leh ṭong katan sik hei khan akadei sik hei kae. Khava Dân kha a’nhret mak hei hneng namanthei sik hei kae.

ṬONGCHÎK-HEI 5:2

Kha achang inchu heikhong mo omchen kaṭhadek a om sik ti kha namanhret sik, khana naṭong hri khan themna nanei jo ti kha amalâr sik.

MI INTHEIPA 5:5

Intepna neia tlomak sik kanek a chu intepmak in kaṭhachet.

ISAIAH 42:19

Kasōkpa kanek a hmitkacho tu mo aka-om, ṭong kasem a katirpa kakhea tu mo kōr kaset aka-om?

ISAIAH 44:26

Tâk-kha kasōk in hnungṭong asânsōt pha, kaṭōn mantlukna akaphôngsōt sik ngeva katirhei pha, Khava ṭōnhei kha ke’n kamantluk hei khana hnungṭong sânsōt hei kha kadiktak a kasōk heia kae. Ke’n Jerusalem hnenga mipuihei ashunga hong ka-om nôk sik hei, khana Judah khōpui kha athera anta hongsak sik hei kae tia kahri pek. Khava khōpuihei kha ansukset sōa inphut hongkathōi nôk sik hei.

JEREMIAH 15:19

Hiva ṭong hi Rōngpu’n amasôn, “Nang nahe’n le’nchu, kalo manhlut nôk sik che, nang kasōk kachang nôk sik che. Ṭong kahnemmak nahri kanek a, akahnem ṭong thangkōi navahri le’nchu, nang kasân kathem kachang nôk sik che. Mipuihei nahnenga hong inle sik hei, nang in anhnenga vase sik rangei mak ning.

JEREMIAH 18:18

Khava pha mihei khan anhri, “Eini’n, Jeremiah chunga heimo inkhat mantluk rih! Ani’nthei sik thempu, ani-inse sik mikasing, khana Pathen ṭong thangkōi kahrile sik ahei tik a ninei ṭhak sik hei kae. Ama chunga masetna pek rih khana aṭong rangei pek mak jo rih.”

JEREMIAH 2:8

Thempu he’n, ‘Rōngpu khon mo aka-om?’ tia inder mak hei. Kathempu khet he’n amanhret mak jo hei. Vaikarôn he’n kei kadōia inṭang hei; Sânkathem he’n Baal rahminga ṭong ansân akahnem mak limsyem ankamuk hei.

EZEKIEL 22:26

Thempu he’n kadân anvōkkhōi khana a’ntheng chunga kajana neimak hei. Anmani’n a’ntheng leh a’nthengmak ṭhensōt mak hei. A’ntheng leh akabōk in-ang makna kha mi hnenga manthei mak hei, khana Châmhngat kani kha donmak hei. Khava jâra Israel mipui he’n kei akaja mak jo hei.

EZEKIEL 7:26

Insuk inhmangna inkhat bânna inkhat kahong sik, khana ṭong kahōimak ahrui-hruia inthei sik. Nangni’n sânkathemhei kha amak hma heimo antahmu kha anphôngsōtna sik a nanngek sik hei. Sânkathem he’n mipui hnenga manthei sik a heite neimak hei ning, khana kater he’n ṭong manse sik a heite neimak hei ning.

DANIEL 11:33

Mipuihei hlamkakei kasinghei khan chu ansingna kha mi katamtak hnenga ansempek sik hei. Tâk-kha pha bongkhat re shunga ṭhahrep chu anthat sik hei a-emak leh hmeia anro hlon sik hei, ṭhahrep chu anchom heia ankhum sik hei.

HOSEA 4:6

Kami he’n anhnōm mak eng jâra inhmang jo hei. Nangni thempu chei in kei ahnōm mak chei khana kaman theina chei rahlâng mak chei, khava jâra ke’n kahlonsōt jo chei khana nansahei leh kathempuhei kha kahlonsōt heia kae.

LEVI-DÂN 10:11

Moses hnenga kahei pek chei dân seng kha Israel mipuihei namanthei nger sik hei kae.”

ZEPHANIAH 3:4

Asânkathemhei kha inṭangpuina neilo hei, mikahōnhei kae; thempu he’n a’ntheng kha anmanbōk, anbinga hnemna langa Pathen Dân kha anmahe.

HAGGAI 1:13

Khan chu Rōngpu ṭong kha Haggai in mipuihei hneng ahri jo, “Ke’n nangni ka-ompui sik chei, khavakha kei intepna kae.”

ZECHARIAH 7:3

khana thempuhei leh sânkathemhei hneng hiva ṭong hi akader sik a anheitir hei: “Bek-inn a’nset jo jâra kum katamtak a kantaheitlo jo thla 5 tlukna bu hngōia ṭajai suina kha kantalatlo ṭhak sik mo?”

MALACHI 3:1

Chunghnung Rōngpu’n amasôn, “Kei sik a hlam inhleng sik kaṭong karôn mi katir sik. Khava sōa nangni’n nantahngâk a ka-om Rōngpu kha manhret manloa a-Bek-inna kahong sik. Nangni’n nantahmu hnōm ṭongkarôn kha kahong sik khana ka ṭongtep kha aphông sik.”

MIJAHEI 27:21

Ama kha, Urim leh Thummim kahmang Eleazar thempu hnenga in-ngai sik. Hing’hin Eleazar in Joshua leh Israel mipui kha antlona rakip a amanse sik hei kae.”

JOHN 13:20

Akadiktak kamanthei chei kae; tu achang inum kei mitir inhlâng mi khan kei um arahlâng eng kae, tu achang inum kei inhlâng mi khan anijōng katirpa kha arahlâng kae.”

JOHN 20:21

Khava sōa Jesu’n anhnenga ahri nôk a, “Mōngna’n ompui chei rasoh, Pa’n kei atir eng kapōa, ke’n nangni katir chei kae,” ati hei.

ṬŌNTLOHEI 16:17

Amanu khan Paul leh keini kahnung ajuia, “Hiva mihei hi A’nshângpen Pathen sōk-hei kae! Anmani’n heikhong mo huksōt akachang sik chei tia antaphông kae!” tia ka-ông.

CORINTHIANHEI INHNINA 5:20

Hinahin Pathen in keinia inphut ṭong ahri kapōa, keini’n Christa sik a kantahri kae. Christa kahlâng kathlenga kantangek chei kae. A’nrepui nanchangna inphut Pathen in aṭhōn manchang chei rasoh.

GALATIANHEI 4:14

Tâk-kha kataksa chunga natna kha nangni sik a enmansinna kalentak aleichang ravâng, nangni’n aleihmu masimak chei, rahlâng mak um atlo mak chei. Khava kanek a, marvân ngeva kapō leh Jesu Christa kapōa nanlei rahlâng enga kae.

DÂNRABU INHNINA 21:5

Khava kha’num levi thempu akase sik hei kae, ajârchu innâk-inse sōkna rakip a anmani’n ṭong mathlakna antanei sik kae. Rōngpu nan-Pathen in ama inzen sik a leh ama rahminga mahâmṭhat akahrisōt sik a akadei jo hei kae.

DÂNRABU INHNINA 24:8

“Ṭit ka-om tak vunnatna nannei pha, thempuhei mantheina chei kha tlona sik intluk ruh; ke’n anhnenga kamanthei hei kha jui ruh.

THESSALONIANHEI INKHATNA 4:8

Khava jâra, hiva mansena kajuimak mi khan, mihring mansena ajuimak changmak, Rathla Intheng nankapek Pathen mansena kha ajuimak kae.

SAMUEL INKHATNA 2:17

Hiva Eli sahei setna kha Rōngpu hmit-enna kakhôk hêr jo, ajârchu Rōngpu hnenga inthoina kha khanga kajana neiloa anleitloa kae.