JAMES 4:4 - LEKHARABU INTHENG (BSI)

⁴ Eh taksenthei kachangmak mihei! Vânhnōi ṭhōn changna hi Pathen kadōi kae ti manhret mak chei mo? Tu achang inum vânhnōi ṭhōn chang sik indu khan Pathen kadōia a’nsyem hei kae.

JAMES 4:4 ပူးပေါင်းရင်းမြစ်များ

A’NPHUTNA 3:15

Nang leh nuhmeinu kâra in-enkadana kaman om sik jo; nuhmeinu sōn in nalu asukkhōi sik khana nang in asōn apâr kerahmit namachuk pek sik kae,” ati.

HLAHEI 21:8

Rengpa khan a’nrepuihei seng asur sik hei; ama kahōt hei seng asur sik hei.

HLAHEI 50:18

Inru nahmu rakip hei leh ṭhōn kachang che, khana akajông hei kha na’nthlop pui hei.

HLAHEI 73:27

Nang kahlonsōt hei kha kathi nger sik hei; nahnenga taksenthei kachangmak hei kha nasuk manram sik hei.

ISAIAH 57:3

Nangni mikaset-hei, nanṭong tanna sik a hong ruh! Nangni dôi kachoi, mikajông leh notinu kanek a akaṭha changmak chei.

JEREMIAH 2:2

Jerusalema ka-om mi rakip hnenga hiva ṭong hi vaphôngsōtna sik a amanthei eng. “Ke’n kamandonsōt, nakhangdông changlai heituk-hrep a taksenthei aleikachang che mo, niluhông bilai khan chu heituk-hrep a nalungset eng mo; Nêrdiram a, heite kekmakna ram a khan naleijui eng.

JEREMIAH 9:2

Kami heia inphut kasesōt a nêrdiram a omna sik hmun kahmu’nchu tia kamandon. Anmani ankhenga taksenthei kachangmak, mikahōn mipuihei kae.

EZEKIEL 16:32

Apuise lungset rôn sik kanek a nang hi khōhmehei leh akajônglele nuhmei kapō che kha kae.

HOSEA 3:1

Rōngpu’n kahnenga ati, “Avea se nôk ina mi leh akajông nuhmei inkhat hneng nalungsetna vamalâr roh. Israel he’n pathen ralak ansora vomhrui kachâr kha limsyem hnenga antōk heia a-enum, tûn katlung kamalungset hei kapōa nang in ama nalungset sik kae.”

MATTHEW 12:39

Jesu’n inhnak a ahri “Tûnlaia mihei hi heituk a akaṭhamak leh Pathen kadonmak jo hei mo! Ṭōn-inlak katlo sik a nantader eng mo? Changthei mak! Nanhnenga a’npek sik ṭōn-inlak inkhat rōk khachu sânkathem Jonah ṭōn-inlak kha kae.

MATTHEW 16:4

Tûnlaia mihei hi heituk a akaṭhamak leh Pathen kadonmak jo hei mo! Nangni’n mêrchîkna ṭōn-inlak inkhat malâr sik a nantader eng mo? Changthei mak! Nangni hnenga mêrchîkna ṭōn-inlak inkhat rōk a’npe sik chei khachu Jonah ṭōn-inlak kha kae.” Khan chu ama’n adahlon heia kase jo.

MATTHEW 6:24

“Tûte inkhat in akapu 2 sōk chang tor mak; inkhat a-enkada sik a kha inkhat alungset sik; inkhat arazen sik a kha inkhat donmak ning. Nangni’n Pathen leh karōi kha razensap tor mak chei.

LUKE 19:27

Tûn ke’n reng kachang sik ani-indumak kakadōi hei kha hin kahmai kunga heiṭhōi hei una that hei ruh,’ ati.”

JOHN 15:19

Nangni vânhnōi ralei ta nanchang inchu, vânhnōi in atâ kapōtak a alungset sik chei kae. Tâk-kha ke’n nangni hiva vânhnōi raleia inphut kakadei chei kae, khana vânhnōi ralei ta changmak chei, khava jâra vânhnōi in nangni antahōt chei kae.

JOHN 17:14

Ke’n anhnenga ṭongpui hi kapek hei khana vânhnōi in anmani ahōt hei, ajârchu kei vânhnōi ta kachangmak kapōa anmani vânhnōi ta changmak hei.

JOHN 7:7

Vânhnōi in nangni chu hōtmak hei chei, tâk kei chu anṭōnhlam kadikmak karakôk hei jâra anhōt eng.

ROMANHEI 5:10

Eini hi Pathen kadōi leikachang me; tâk asapa thi jâra khan ama’n aṭhōn amanchang jo me. Tûnchu eini Pathen ṭhōn kha kachang jo me, khan chu Christa hringkhō khan heituk ahukchet sik jo me mo!

ROMANHEI 8:7

Khava jâra anmihring ngai tamadu vairôn hei khachu Pathen kadōi hongkachang hei; ajârchu Pathen Dân kha juimak heia kae, khana inchêntak a ajui um juitor mak hei.

CORINTHIANHEI INKHATNA 1:20

Chu achang inchu akasinghei, akathemhei, hiva raleichunga mi makhena kathemhei kha khon mo adahlon jo hei? Pathen in hiva raleichung singna hi akamo amanchang jo!

CORINTHIANHEI INKHATNA 1:21

Mihringhei binga singna vâng Pathen manhretna nei sik kha Pathen singna khan man-e theimak. Khava kanek a, eini “mikamo” inti hei ṭong hrilea inphut akataksenhei hukmanhringna sik Pathen in amantluk kae.

GALATIANHEI 1:10

Hivahi mihring hnōm pekna jongna kahri mo? Kha changkhet mak! Kamadu khachu Pathen mandikna kae! Kei mipuihei manhretna sik kajong mo? Ke’n tûn katlung hin mipuihei manhretna sik eng kalajong achang inchu, kei Christa sōk inkhat changmak ning.

JAMES 1:27

Pa Pathen in akadik leh a’ntheng bekṭong tia alo khachu hi kae: nu leh pa kasehei leh renghmeihei khōdengthei pha ensui sik khana raleichung hōn mathlâkna inphut binga sōksōt sik hi kae.