Te Kaotioti 22:2 - Te B'aib'ara

² n ri nuukani kawain te kaawa. Ao n iteran te karaanga ake uoua bon iai kaai ni maiu, aika kariki uaaia teuana te tai ni katoa nam'akaina i nanon teuana te ririki; ao baanikaai akekei boni b'aini kamaiuaia botannaomata.

Te Kaotioti 22:2 ပူးပေါင်းရင်းမြစ်များ

Karikani B'aai 2:9

Ao E kariki aekaki n aroka nako ikekei aika tikiraoi b'a a na riki rake ma ni kariki uaa. Ao iai aroka i nuukana, ae te aroka ae anga te maiu, ao te aroka ae anga ataan te raoiroi ma te buakaka.

Taian Areru 147:3

E kamaiuia akana uruaki nanoia, ao E kabae ikoakiia.

Taeka n Rabakau 3:18

Bon te aroka ae e anga te maiu te wanawana, bon te tabo ike e nako mai iai te kukurei i bukiia ni kabane akana a taumatoaia.

Itaia 6:10

“Karaoaia aomata aikai b'a a na taningabono! bonoti taningaia, rabun mataia, karaoaia b'a a na aki ataa te b'ai teuana. Tai katanimaia nako iu b'a a na kamaiuaki.”

Ieremia 17:14

Te UEA, boni Ngkoe ae I neboiko. Ma ngaia are, Ko na kamarurungai ma ni kamaiuai! Ao i mwiina, N na marurung raoi ma ni kaawakinaki raoi.

Etekiera 47:1

Ao e kairai te mm'aane arei rikaaki nakon te Tembora, ike I noora iai te raanga n ran ae e raanga i aan te kawai n rin. E moana raangana man iteran te Tembora are mai maiaki, ike e raanga mai iai ri rarikin te baonikarea ni waaki nako ni waerake i nanon te katawanang.

Otea 14:4

Iteraera, kam a tia ni katinanikuai, ma e a toki uniu; N na kamaiungkami man tangiringkami n akea tiana.

Tekaria 14:8

I nanon bongin te aumaiaki ma te aumeaang, e na raanga te ran are e anga te maiu mai Ierutarem, ao iterana mairouia a na raanga nakon Taari are Mate i maiaki ao iterana e na raanga nakon Taari are te Mereterenian i maeao.

Maraki 4:2

Ma ngkami aika kam karinea arau, e na oota i aomi te tokanikai kaanga taai ma buraenimata aika a uota te maiu, ao kam na kibakiba rake kaanga taian kao ataei aika a takaakaro.

Ruka 4:18

“E mena Tamnein te Uea i aou, i bukina b'a e a tia n rineai b'a N na tataekina te rongorongo ae raoiroi nakoia akana aki kaub'ai. E kanakoai b'a N na tuangiia ake a riki b'a taenikai kainaomataia, ao ake a mataki b'a a na manga noraba, ao ni kainaomataaki ni kabane ake a karawawataki iai,

1.Betero 2:24

Ao E uoti ara bure n rab'atana i aon te kai, b'a ti na mate nakon ara bure ni kitan, ao ti na kabane maiura i bukini karaoan nanon te Atua. Ao kam kamaiuaki n oreana.

Te Kaotioti 2:7

“Ane iai taningana n ongo, ao ke e ongo ana taeka te Tamnei are Raoiroi nakoia ekaretia. “Ane tokanikai ao N na anganna te am'arake man te kai ni maiu are mena n ana B'aretaiti te Atua.

Te Kaotioti 21:21

Ao mataroana ake tebwi ma uoua boni moomi aika tebwi ma uoua; a karaoaki n tatabeua nako mani moomi aika kaka ti teuana; ao kawain te kaawa bon te koora ae itiaki, ae kanga ai aron te kiraati ae itiaki.

Te Kaotioti 21:24

Ane a na nakonako botannaomata n ootana, ao ueea i aonnaba a na uoti kaub'aia nako nanona.

Te Kaotioti 22:1

Ao te anera arei e kaota nako iu karaangan te ran ni maiu, ae te ran ae raneanea n ai aron te kurititaro; ao e raanga nako te ran arei man ana kaintokanuea te Atua ma te Tiibuteteei,

Te Kaotioti 22:14

A a kab'aia akana teboki aia kunnikai aika m'arairai, b'a e na reke nakoia te kona n roko n te kai ni maiu, ao te kona n rin nako i nanoni mataroan te kaawa, b'a a aonga n rin n te kaawa.

Te Kaotioti 22:19

ao ngkana iai te bae e kamaunaa te aomata man taeka ni burabeti n te nira ni boki aei, ao te Atua E na anaa mai rouna tib'angana n te kai ni maiu ao man te kaawa are tabu, ake a koreaki taekaia n te niira ni boki aei.