Te Kaotioti 12:14 - Te B'aib'ara

¹⁴ Ao e anganaki neierei bain te ikare aika uaai aika ab'ab'aki, b'a e na kibakiba nakon te rereua nakon ana tabo, ike e na tararuaki iai i nanon tenua ma te iterana te ririki, ao ike e raroa nako iai mairoun te naeta.

Te Kaotioti 12:14 ပူးပေါင်းရင်းမြစ်များ

Taian Areru 55:6

A bia reke baiu ni kiba n ai aron te taobe: Ao I a kona ni kibakiba nako ni karekea motikan rawau.

Te Otinako 19:4

“Kam bon noori b'aai ake I karaoi Ngai ae te Atua nakoia kaain Aikubita, ma arou ni uotingkami kaanga te ikare ngkana e uotiia natina i aoni baina ni kiba, ma ni uotingkami nako ikai nako Iu.

Itaia 40:31

Ma e na manga reke te korakora ae boou irouia akana a onimakina te UEA. A na korakora kaanga ikare a na betiraoi i aoni baiia ni kiba; a na nakonako ao a na biribiri ao a na aki kua.

Taniera 12:7

Ao e tabeka baina te anera ni kauaai nako karawa, ao e berita n aran te Atua ae akea tokina. Ao I ongo ana taeka ae e kaangai, “E na nakon tenua ma te iterana te ririki. Ngkana e a toki karawawaataia ana Aomata te Atua, ao a na tia ni bane n riki baikai.”

Taniera 7:25

E na taetae n eekaanako te Atua ae Moan te M'aaka, ao e na karawawataia ana Aomata te Atua. Ao e na kataia ni bita tuan ma botakin aia aro, ao a na mena ana Aomata te Atua i aani m'aakana i nanon tenua ma te iterana te ririki.

Taniera 8:14

Ao I ongo aia kaeka anera ake tabeman ae e kaangai, “E na reitinako te aki angakarea ni karokoa uoua tengaa tenibubua te moaningabong ao te tairiki. Ao i mwiina, e a tib'a okira arona te Tembora.”

Te Kaotioti 12:6

Ao e biri nako te aine arei nakon te rereua, nakon te tabo are E katauraoia te Atua i bukina, ike e na tararuaki iai i nanon tengaa ao uabubua ao onongaun te bong.

Te Kaotioti 17:3

Ngke I mena i aani m'aakan ana kairiri te Tamnei, ao E uotai nakon te rereua; ao I nora te aine ae tekateka i aon te man ae uraura ae tiritiri, aika a mena i aon rab'atana ni kabuta aara ni bakanatua, ao itiua atuna, ao tengauni korona.