Tekaria 4:6 - Te B'aib'ara

⁶ Ma ngaia are, e kab'arab'araa te anera b'a bon reitan taian rongorongo mairoun te UEA nakon Terub'abera. Bon te UEA Ngai ae Moan te M'aaka. Ma ngaia are, kam na aki onimakina korakorami ma marurungimi, ma kam na onimakina Tamneiu.

Tekaria 4:6 ပူးပေါင်းရင်းမြစ်များ

Karikani B'aai 41:16

Ao e taku, “Te uea, I aki kona ni kab'ara mii, ma E na anga nanon miim te Atua.”

1.Uea 19:12

Ao i mwiina, e a manga roko te ai, ma E aki mena naba iai te UEA. Ao n te kabanea, e a roko te ang ae e aabeebete.

2.Rongorongo 14:11

E tataro Ata ao e taku: Te UEA ae te Atua, bon ti ngkoe ae ko konaa ni buoka te taanga ni buaka ae akea korakorana ma ni katokanikaia i aon ae korakora. Ma ngaia ae, ti onimakinna b'a ko na buokiira. Ti na buakana te taanga ni buaka ae korakora aei i bukin neboan aram, ao ti ataia b'a ko bon aki konaa ni konaaki. Bon te UEA ae Atuara ngkoe.

Etira 2:2

Aikai naake a tararuaia koraki ake a oki rikaaki: Terub'abera, Iotua,

Etira 3:10

Ngke e a bane kawenean aan te Tembora irouia taani kateitei, ao a karin niniiraia n ibonga taian ibonga ao a katang taiani bu b'a karinean te UEA, ngke a tabe n anene kanoan Rewi ake man ana utu Ataba n neboa te Atua n taian timbara. A bane aomata n irii taiani kaetieti man ririki aika a b'aka nako ake mairoun Tawita are te uea.

Etira 5:2

Ma ngaia are, a tuangiia aomata Terub'abera are te koowana ao Iotua are te ibonga b'a a na moana karaoan te Tembora, ao a kaungaaki irouia ana burabeti te Atua.

Taian Areru 33:16

E aki tokanikai te uea i bukina b'a e korakora ana taanga ni buaka; Ao e aki tokanikai te tautia i bukini korakorana.

Te Minita 9:11

Ao aikai b'aai riki tabeua aika I a tia n noori i aan taai: Aika birim'aaka ao aomata aika a ninikoria a aki tootokanikai n taai nako n te kabobirim'aka ao te buaka. Te wanawana, ni ikotaki ma te niniwana ao te ataib'ai a aki anganiko te marurung n taai nako, te kaub'ai, ke tanoatan taekam. Ti bane n toa n te tekebuaka.

Itaia 30:1

Aio ana rongorongo te UEA i bukiia ana Aomata aika a kamangao: Kam iri oin ami babaaire ao kam aki iri au babaaire; kam karaoi taiani boraraoi i marenami ma tautaeka tabeua ao kam titirakinai moa, ao kam teimatoa ni buubure.

Itaia 32:15

Ngkae ti anganaki te Tamnei mai karawa ao a na riki b'a taian m'akoro n aba aika a on n taian aroka aika iai uaaia. aika a nimatenten aroka iai.

Itaia 34:16

Ko konaa ni kakaaea ao ni kunea n ana boki te UEA n are e koreaki iai, “E ikoti ni kabane ana karikib'ai te UEA ni m'aakan Tamneina, ao akea temanna ae e bua.”

Itaia 59:19

E na buaka kaanga te ieka i nanon te angibuaka ae e korakora. Ane a na karinea ma n neboa arana ae e kamimii botannaomata ake i maeao ao i mainiku.

Taniera 2:34

Ao ngke ko bon tabe n tarataraia, ao e a ti b'aka naba i bon i rouna te atiibu ae e korakora man taiani b'aa aika a rietaata, ao e b'akara waen te bouananti arei, are te biti are e renganaki ma te tano ao e kamaerikirikia.

Otea 1:7

Ma bon te UEA Ngai ae Atuan Iuta, ao N na bon akoa Iuta ma ni kamaiua n oin m'aakau-tiaki n te buaka ao n taiani kanoa ni kainikatebe ke n te kabaang ma taani buaka mai aoia aoti.”

Akai 1:1

Ni moanibongin te kaonoua n nam'akaina n ana kauoua n ririki Taraiati ni uea i aon Botia, ao E taetae te UEA n tuanga Akai are te burabeti b'a e na taekina ana rongorongo nakon te kowana i Iuta ao nakon te ibonga are e rietaata. Ma ngaia are, e tuanga te Kowana are Terub'abera ao te ibonga ae rietaata are Iotua te burabeti are Akai.

Akai 2:21

Ko na tuanga te kowana i Iuta b'a N nang ioioi taiani karawa ao te aonnaba

Tekaria 6:12

Tuangnga au taeka ae e kaangai, “Iai temanna ae na nako mai ikai kaanga te m'aanga ao e na katea te Tembora i buku. N na aranna b'a ‘M'aanga’, ao e na tautaeka ma te karineaki.

Warekaia Iteraera 27:16

“Bon te UEA Ngkoe ae te Atua, ao ko atai b'aai ni kabane ake i nanoia aomata. Ma ngaia are, I a butiiko b'a Ko na rinea te tia kairiri irouia Iteraera.

I-Ebeto 6:17

Ao kam na uouota naba te barengaru are te maiu, ma ana kabaang te Tamnei, ae ana taeka te Atua.

1.Betero 1:12

E kaotaki nakoia burabeti akanne b'a a aki taekini baikai i bukiia, ma a taekin i bukimi, aika baika taekinaki ngkai nakoimi irouia ake a tuangngkami te euangkerio iroun te Tamnei are Raoiroi are kanakomaiakaki mai karawa; aika baika a kan atai naba anera.

1.Tamuera 14:6

Ao a tabe n taetae ni kawai Ionatan ma ana tautia ngke a m'ananga nakon aia kaemb'a kaain Biritia ao a taku, “Bon ti ngaira uoman ni kaaitaraia m'aane aika akea atuaia aikai,” Ao e taku Ionatan, “Ma E kona te UEA ni buokiia tautia aika ti tabeman n tokanikai n te buaka n aron naba ae bon akea kangaangan buokaia te taanga ni buaka ae b'anin i Rouna. E na mena ngkoa ao e na buokiira te UEA n te buaka aei.”

1.Tamuera 17:47

A na bane n nooria aomata b'a E aki kainanoa te kabaang ma te kainiwai te UEA ngkana E kamaiuia Ana aomata. E totokanikai n taai nako te UEA n te buaka, ao E na bon buokiira b'a ti na konaingkami.