Taniera 3:7 - Te B'aib'ara

⁷ Ao ni bon te tai naba are a ongo iai tangin taiani b'ai ni katangitang, ao a bane ni bobaraaki botannaomata ma reeti nako, ma taetae nako n taromauria te bouananti are te koora are e kateia te uea are Nebukaneta.

Taniera 3:7 ပူးပေါင်းရင်းမြစ်များ

Ieremia 51:7

B'aburon bon Au m'angko te koora ae e kanoaaki ni wainin uniu. A na manging n te wain aei botannaomatan nako te aonnaba ao a na rangirang.

Taniera 2:46

Ao i mwiin anne ao e bobaraaki te uea are Nebukaneta nako aontano, ao e anga ana taeka i bukin te karea ma te angab'ai b'a e na karaoaki i bukin Taniera.

Taniera 3:10

Te uea ae ko karineaki, ko a tia n anga am taeka b'a ngkana a ongo te katangitang aomata ao a na bane ni bobaraaki n taromauri te bouananti are te koora,

Taniera 3:4

ao e nako te taeka n te b'anaa ae e korakora ae e kangai, “Ngkami aika aomatan aaba nako, ma reeti nako, ao taetae nako!

Taniera 3:5

Kam na ongora tangin taiani bu, aika a rimwiaki n tangin te bikura, ma te raea, ma te tita, ma te aabi, ao te bikura; ma taiani b'ai ni katangitang riki tabeua. Ao n te tai naba are kam ongo iai tangin b'aai akanne, ao kam na bane ni bobaraaki n taromauriia te bouananti te koora are e a tia ni kateia te uea are Nebukaneta.

Taniera 3:6

Ao ane e aki bobaraaki n taromauri, ao e na anaaki naba n te tai anne n teweakinako nako nanon te ai ae e uram'aaka.”

Taniera 3:8

Tabeman kaaini B'aburon a karekea te tai aei b'a aia tai ni kabuakakaia I-Iutaia nakon te uea are Nebukaneta.

M'akuri 14:16

I nanon rooro ake rimoa, ao E aki tutukiia botannaomata nako mani karaoani baike a tangiri;

1.Ioane 5:19

Ti ataira b'a mairoun te Atua ngaira, ao aomata aika aomatan te aonnaba ae bubure a mena i aani m'aakan teuare buakaka.

Te Kaotioti 12:9

Ao e teweaki nako mai eta te rakon are korakora, are te naeta are ngkoangkoa, are arana te Riaboro ke Tatan, are m'am'anaia kaain aonnaba ni kabaneia: e teweaki nako aon te aba, ao a teweaki nako naba ana anera ma ngaia.

Te Kaotioti 13:14

Ao e m'am'anaia ake a maeka i aon te aba ni kanikina ake e anganaki b'a e na karaoi i matan te man are moa ni kaoti; ao e tuangiia ake a maeka i aon te aba b'a a na karaoa te bouananti ae na katotonga aron tein rab'atan te man are aki mate ngke e ikoaki n te kabaang.

Te Kaotioti 13:3

Iai atun te man arei teuana ae a tia n ikoaki n te ikoaki ae tara n rangi ni kakaiaki, ma e a tia ni mao. Ao a bane kaain te aonnaba n irira te man arei ni mimiakinna.

Te Kaotioti 13:8

Ao ane a na taromauria te man arei aomata nako i aonnaba, ake a aki koreaki araia ni bokin te maiu ma ngke a moa ni karikaki aonnaba; ao te boki arei bon ana boki te Tiibuteteei are kamateaki.

Te Kaotioti 17:8

Te man are ko noria bon iai ngkoa, ma akea ngkai: ao e nangi rierake mai Abuto, ma n nako n te kamateaki. Ao a na mimi akana maeka i aon te aba, akana aki koreaki araia ni bokin te maiu ma ngke a moa ni karikaki aonnaba, ngkana a nora te man arei b'a bon iai ngkoa ma akea ngkai, ao b'a e na manga kaoti.

Te Kaotioti 19:20

Ao e tauaki te man are tiritiri, ma te burabeti ni kewe are karaoi kanikina i matana, ake e m'am'anaia iai te koraki ake a kanikinaeaki n ana kanikina te man are tiritiri, ma te koraki naba ake a taromauria te bouananti are karaoaki b'a katotongana. E teweaki nako te man are tiritiri ma te burabeti ni kewe, ngke e maiu, i nanon te nama are te ai are ura n te burimton.