Taniera 12:1 - Te B'aib'ara

¹ Ao e taku te anera are e kunnikaia n te rinen, “Ao ane e na kaoti te anera are Kabiriera are e kakawakiniia am aomata. Ane e na roko tain te kangaanga, aika a tuai ma n noonoria taiani botannaomata ma ngke a moani kaoti nakon te aonnaba aio. Ao ngkana e roko te tai anne, ao a na bane ni kamaiuaki am aomata ake a m'akoro araia n ana boki te Atua.

Taniera 12:1 ပူးပေါင်းရင်းမြစ်များ

Taian Areru 56:8

Ko ataa arou n aki rau; Ko kawakin taekan mwin m'aitin rannimatau tiaki a koreaki taekaia n am Boki?

Taian Areru 69:28

A bia kamaunaki araia mani bokin te maiu; A bia aki karinaki araia i rarikin araia am Aomata.

Itaia 4:3

A na bane n atongaki aomata ake nikira ni maiu i aon Ierutarem b'a aomata aika a tabu,

Itaia 9:7

E na aki tootoki m'aakana; e na akea tokin te raoi. E na tautaeka n abanuean Tawita ao e na kakorakoraa. E na tautaeka n taai nako ma te raoiroi ao te eti. E na bon kakoaua raoi te UEA ae Moan te M'aaka b'a a na koro nanon baikai.

Ieremia 30:10

Iteraera, bon au aomata ngkami, ma ngaia ae kam na aki maaku. Iteraera, kam na aki nim'atoaua. N na kamaiungkami man te aba are e raroa nako, man te aba are kam kataenikaiaki ngkoa iai kam na oki nakon mwengami ao kam na maiu ma te rau; Ane kam na mano raoi, ao akea ae e na konaa ni kakamaakuingkami.

Ieremia 30:7

Au aomata, e na rangi ni korakora riki marakimi nakon are mai i m'aaina n te tai ae e aki maan mangkai, ma N na kamaiungkami.

Etekiera 13:9

N na eekiia nako ao N na manga karikiia b'a au aomata. A na aki manga atongaki b'a Iteraera ke n toua Iteraera. Ane a na tib'a uringnga b'a bon te UEA Ngai ae te Atua.

Etekiera 34:24

E na riki b'a ami tia kairiiri, ao N na riki b'a Atuami. Bon aei au taeka Ngai ae te UEA.

Etekiera 5:9

i bukin ami bure. N na katuaaingkami n te tuua ae I tuai man kaakaraoia mangkoa ao te tuua naba ae N na aki manga karaoia riki rimwi.

Taniera 10:13

E kakaitaraai aneran te tautaeka ni Bootia i nanon uabwi ma teuana te bong. Ni karokoa e a roko Mikaere are mataniwiia anera ni buokai, i bukina ngke I kitanaki, ao I a tiku n ti ngai i Bootia.

Taniera 10:21

Ao i mwiin anne, e na kaoti aneran Kuriiti. Bon akea ae e na buokai b'a bon ti Kabiriera, are te anera are e teiakina Iteraera.

Taniera 11:45

Ane e na katea ana um'anrianna n uea ae e korakora i marenan taari ma te maunga n te tabo are e tei iai te Tembora. Ma ane e na mate, ao bon akea temanna ae e na buokia.”

Taniera 7:10

ao e raanga nako te ai mai iai. Ao iai ngaa n aomata aika a m'akuri i bukina, ao mirion aika a tei i matana. Ao e moanaki te kabowi ni motikitaeka, ao a kaukaki taiani boki.

Taniera 9:12

Ko karaoi nakoira baike Ko taku b'a Ko na karaoi nakoira ma ara taan tautaeka. Ko kakorakoraa riki tuuan Ierutarem nakoni kaawa tabeua n te aonnaba aio,

Ioera 2:2

E na roo ao ni kananokawaki ma nangin te buaka i aora. A na kaona aon te maunga nako te taanga ni buaka kaanga ai aron nangin buakan karawa. Bon akea te taanga ni buaka ae e korakora ae e a tia n ikotaki mai m'aaina ke ae e na manga ikotaki rimwi.

Maraki 3:16

Ao ngke a moanna aomata aika a karinea UEA ma nanoia ma ni karinea arana ni maroroakin baikai, ao E koroi araia b'a a aonga n ururingaki n ana boki te UEA ngke e noora te b'ai are e riki.

Mataio 24:21

B'a n te tai anne ao e na iai te rawawata ae bati ae akea n aia arona ma ngke e moa n riki aonnaba ni karokoa ngkai; bon akea n ai arona, ao a na bon akea naba nakoni boong aika rimwi.

Mareko 13:19

B'a ni boong akanne ao ane a na karawawataaki aomata n te aekaki ni karawawata ae akea n ai arona mani moani karikan aonnaba iroun te Atua ni karokoa ngkai. Ao e na akea naba aekakina nakon taai aika na roko.

Ruka 10:20

Ma e ngae n anne, ao kam na aki kakatonga n aei, ae a aantaeka i roumi anti; ma kam na kakatonga b'a a koreaki arami i karawa.”

I-Rom 11:15

B'a ngkana e riki kaakan taekaia b'a aroia aomata nako n riki b'a raoraon te Atua, ao tera ngkanne aroia ngkana a manga butim'aeaki? Kaanga ai aroia maate ake a manga uti.

I-Rom 11:26

B'a n te aro aei, ao a na kamaiuaki kaain te botannaomata ae Iteraera ni kabaneia, n ai aron are koreaki ni kaangai: “Ane E na nako mai Tion te Tia Kamaiu E na kaaki te buakaka mairouia ana kariki Iakob'a.

I-Ebeto 1:21

ike E tautaeka iai i aoia uea ni kabaneia, ma ake a korakora, ma ake a m'aaka, ma ake a tautaeka, ao i aoia aara ni kabane aika atongaki, tiaki i aon ti te aba aei, ma i aon naba te aba are na roko.

I-Biribi 4:3

Eng, ao I butiko naba, ngkoe ae raou ni m'akuri ni koaua, b'a ko na buokiia nakanne, b'a a tia ni kakorakoraia ni m'akuri ma ngai i bukin te euangkerio; ao raoia naba Kiremenito ma raou ni m'akuri ake tabem'aang, ake a mena araia n te boki ni Maiu.

Iuta 1:9

Ao Mikaera are te mataniwi temanna irouia anera, ngke e un ma te riaboro ni kauntaeka i bukin rab'atani Mote, ao e maku n atonga kabuakakana n taetaebuakaia; ma e kangai, “E na boaiko te Uea.”

Te Kaotioti 1:5

ao ami b'ai naba te akoi ma te raoi mairoun Iesu Kristo, are kakaonimaki, are te moa ni kamaiuaki mai buakoia maate are E manga uti mai buakoia maate, ao are aia Mataniwi uea i aonnaba. E tangirira, ao E kainaomataira man ara bure ni matena;

Te Kaotioti 12:7

Ao e riki te buaka i karawa: Mikaera ma ana anera a buakana te rakon; ao e buaka te rakon ma ana anera,

Te Kaotioti 13:8

Ao ane a na taromauria te man arei aomata nako i aonnaba, ake a aki koreaki araia ni bokin te maiu ma ngke a moa ni karikaki aonnaba; ao te boki arei bon ana boki te Tiibuteteei are kamateaki.

Te Kaotioti 17:14

Ane a na buakana te Tiibuteteei, ao a na konaaki aoia iroun te Tiibuteteei ma raona ake a weteaki ma n rineaki ake a kakaonimaki, b'a kioina ngkai te Tiibuteteei bon aia Uea ueea ao aia King kiing.”

Te Kaotioti 20:12

Ao I nooriia maate, ake te koraki ake a kakannato ma ake a mangori, b'a a tei i nanoaan te kaintokanuea; ao a kaukaki niira ni boki. E kaukaki naba te niira ni boki teuana, ae bokin te maiu. Ao a motikaki taekaia maate ni kaeti ma baike a tia ni karaoi, n ai aron taekaia ake a koreaki n taian niira ni boki akekei.

Te Kaotioti 20:15

Ao ngkana iai ae ataaki b'a akea arana ni bokin te maiu, ao e teweaki nako nanon te nama are te ai.

Te Kaotioti 3:5

Ane tokanikai ao e na kunnikaia ni kunnikai aika mainaina; ao N na bon aki kamaunaa arana man te boki ni maiu arei, ao N na kaotia b'a bon au aomata i matan Tamau ao i mataia ana anera.

Te Kaotioti 7:14

Ao I taku nakoina, “Teuae ko karineaki i rou, ko bon ataiia.” Ao e kaangai nako iu, “Aomata aikai ake a butaki nako mai aan te rawawata are korakora, ao a teboki aia kunnikai ake a m'am'arai ao a kamainainai n raraan te Tiibuteteei.