Taian Areru 41:9 - Te B'aib'ara

⁹ Ao e eekainako naba te aomata ae bon raou ni koaua ae I onimakinna, ae raoraou n am'am'arake.

Taian Areru 41:9 ပူးပေါင်းရင်းမြစ်များ

2.Tamuera 15:12

Ao a roko riki aomata aika a m'aiti ni kaakawara Abetarom ma ni uataboa ana iango ni kam'arua. I nanon taai akanne, e a tia ni karaba ni kanakoa te tia uarongorongo b'a e na tuangiia aomata ni kabane ni kaangai, “Ngkana kam ongo tangin te buu ao kam na bane n takaarua ni kaangai, ‘E a uea ngkai Abetarom i aon Eberon!’ ”

Iobi 19:13

E a tia te Atua ni karaoia au utu b'a a na kiitanai; a manga aki kinaai aomata ake a bon kinaai ngkoa.

Iobi 19:19

A taraai raoraou ma te mata n riribai. A manga taboribaai raoraou ake I tangitangiri ma ngaiia ngkoa.

Taian Areru 101:3

Akea te bae buakaka ae N na noria; I ribaai aia m'akuri aomata akana rairaki nako mairoun te Atua; N na aki reitaki ma ngaiia.

Ieremia 20:10

I ongo aia maningongoo aomata ae e kaangai, “A bane ni maaku aomata nako. Ara tai ngkai ni bukina Ieremia!” Akea te b'ai riki ae a karaoia raoraou ake I tataneiai ma ngaiia b'a ti tataningaan b'akau. A taku, “Tao e na bon konaa ni kam'aneaki Ieremia. Ao i mwiina, ti kab'aka ao e na booraoi arora ma ngaia rimwi.”

Ob'aria 1:7

E a tia ni kam'aneko am itabon; a tia ni karekea te anga are ko na kitana iai abam. Aomata aika ko iraorao ma ngaia, bon ngaia aika a na ekinakoko. Raraom aika ko itabon am'arake ma ngaiia, bon ngaiia aika a na kam'aneko; A kakanikoko ao a kaangai, ‘E ngaa te baere rabakaum?’

Mika 7:5

Tai onimakina ane ko itabon auti ma ngaia, ke ni kakoaua raraom. Kakawakina naba wiim man te b'aab'arantiko, e ngae ngkana boni buum.

Mataio 26:23

Ao E kaekaia ni kangai, “Teuae kateboa baina n te raurau ma Ngai, boni ngaia ae na kam'aneai.

Ioane 13:18

I aki taekiningkami ni kabaneingkami, I ataiia aika I a tia n rineia; ma e na kakoroaki nanon are taekinaki n te B'aib'ara ni kaangai: “Te aomata ae I am'arake ma ngaia, e riki b'a te tia kam'aruaai.”

Te Tua-Kaua 32:15

Iteraera, ngke kam a marikarika, ao kam a kakaitaraa te UEA are ami Tia Karikib'ai; kam rawa nakon te B'a ae Korakora, are bon ti Ngaia ami tabo n rawei maiumi.