Taeka n Rabakau 5:22 - Te B'aib'ara

²² A m'ane taani bure ni bon oin aia m'akuri ake a tia ni karaoi.

Taeka n Rabakau 5:22 ပူးပေါင်းရင်းမြစ်များ

1.Uea 18:18

Ao e taku Eria, Tiaki ngai te tia kakiriwe ae moan te buakaka ma boni ngkoe. Boni ngkoe ma am utu aika kam aki ongotaeka nakon ana Tua te UEA ngkai kam taromauria B'aara.

Etita 9:25

Ma e nako Nei Etita ni kawara te uea, ao te uea e katanoataa ana taeka are e na karawaawataaki iai Aaman i bukin ana babaaire nakoia I-Iutaia, ao e tiringaki ma natina m'aane ni kabaeaki roroaia i aon te kainikabaeroroa.

Iobi 18:8

b'a e a manga bon uotia waena nako nanon te karaun, ma ni kab'aka nako nanon te kinono are te b'ai ni kam'ane.

Taian Areru 40:12

A bati kaangaanga aika otab'aniniai, a riao m'aitiia! A taonai nako au bure aika bati, ao akea te bae I kona n noria; a m'aiti riki nakon iran atuu, ao e a b'ara nanou.

Taian Areru 9:15

A b'aka botannaomata ake a aki onimakiniko i nanon kinono ake a ken. A boni manga bae waeia n aia b'ai ni kam'aam'ane.

Taian Areru 9:17

A na nako Tiore akana buakaka, nakon abaia maate n raoniia akana a rawa nakon te Atua.

Taeka n Rabakau 1:18

A ikoikotaki n tiringa te aomata ma bon taani m'ane rimoa ngaiia.

Taeka n Rabakau 11:3

Ngkana kam karaoa te m'akuri ae e eti, ao e na riki maiuakinan te eti b'a te tia kairiko. Ma ngkana kam aonikai, ao kam na m'ane ni bon oin ami m'akuri n aonikai.

Taeka n Rabakau 11:5

Ngkana kam bon raoiroi, ao kam na karaoa ae e eti; ao ngkana kam buakaka, ao a na uruanaki aromi ni bon oin am bure.

Taeka n Rabakau 11:6

E konaa ni kaawakiningkami te maiu ae e raoiroi, ma ngkana kam aki konaa n onimakinaki, ao kam bon kam'aneingkami i bon iroumi.

Taeka n Rabakau 12:14

Ti bon anganaki kaniwangara ke ti katuaaeaki ni b'aai ake ti taekin mani karaoi.

Taeka n Rabakau 14:32

A uruanaki aroia aomata aika a buakaka n tain te kangaanga; ma e bon teimatoa naba n onimaki ane akea ana bure n tain te mate.

Taeka n Rabakau 18:7

Taekinan b'aai aika a nanobaba boni kaanga kawenean te b'ai ni kam'ane ni bon manga uruana aromi.

Taeka n Rabakau 24:12

Tai kaangai, “I aki ataia!” E konaa n ataa nanom te Atua. E tarataraira ni tatabemaniira nako ao e atai ara iango. Ao e na manga kabooa mwiin are ti karaoia te Atua.

Taeka n Rabakau 26:27

Ko na manga boni b'aka i nanon te m'anono are ko kenna; Ngkana ko moan karabinoa te atiibu, ao e na manga rabino n okiriko.

Te Minita 7:26

Aei mwiin te b'ai ae I kunea: E buakaka riki te aine ae e kam'araa nakon te mate. Bon te b'ai ni kam'ane ngaia, ae e kaaenakoa rab'atana ma nanona n raweiko. Ma ngkana ko ongotaeka iroun te Atua, ao ko na konaa ni biri nako mai rouna. Ngkana ko aki ongotaeka, ao e a tia ikanne.

Ieremia 2:19

Ane a na katuaeko am bure, b'a bon te bure ae moan te buakaka b'a kam kiitanai ao kam aki roko n te maaka te rekenikai. Bon aei Au taeka Ngai ae te UEA ae Moan te M'aaka.

B'aeb'aeti 1:14

“E atai au bure ni kabane, ao E bootii n ti teuana. E katokaa i aon akuu b'a kaanga te amo. Ao e a taonai rawawatana. E anga ngai te UEA nakoia au kairiribai ao i aki konab'ai ni kaaitaraia.

Ob'aria 1:15

“N nang karokoi aia bong botannaomata b'a N nang katuaaia. Ngkoe ae Etom, e na manga bon okiriko te b'ai are ko a tia ni karaoia. E na bon reireiniko am m'akuri.

Warekaia Iteraera 32:23

Ma ngkana kam aki kakoroa bukin ami berita, ao kam na bure iai nakon te UEA, ao kam na katuaaeaki.

Ebera 13:4

E na karineaki te mare irouia aomata ni kabaneia, ao a na aki urua aroia ni maiu n taanga te mm'aane ma buuna; b'a te Atua E na motiki taekaia ni kabuakakaia taani wene ni bure ma ainenum'a ke mm'aanenum'a ao taani wene ni bure ma ake akea buia.

Tani Motiki-taeka 9:57

Ao E katuaaia naba kaain Tekem i bukina ngke a boutokaa Abimereka. A bane ni koro bukin ana taeka ni kamaraia Iotam.